ନୂଆଦିଲ୍ଲୀ: ଦେଶରେ ହୃଦଘାତ ଜନିତ ମୃତ୍ୟୁ ଚିନ୍ତାର କାରଣ ପାଲଟିଛି । ଇତିମଧ୍ୟରେ ଗୁଜରାଟର ଶିକ୍ଷା ମନ୍ତ୍ରୀ କୁବେର ଡିନ୍ଦୋର ଶୁକ୍ରବାର କହିଛନ୍ତି ଯେ, ରାଜ୍ୟରେ ଗତ ୬ ମାସରେ ହୃଦଘାତରେ ମୋଟ ୧୦୫୨ ଜଣଙ୍କ ମୃତ୍ୟୁ ହୋଇଛି । ସେଥିମଧ୍ୟରୁ ୮୦ ପ୍ରତିଶତ ମୃତକଙ୍କ ବୟସ ୧୧ରୁ ୨୫ ବର୍ଷ ମଧ୍ୟରେ ବୋଲି ଜଣାପଡ଼ିଛି । ହୃଦଘାତ ମାମଲା ବୃଦ୍ଧିକୁ ଦୃଷ୍ଟିରେ ରଖି ଦୁଇ ଲକ୍ଷ ସ୍କୁଲ ଶିକ୍ଷକ ଓ କଲେଜ ଅଧ୍ୟାପକଙ୍କୁ ସିପିଆର ପ୍ରଶିକ୍ଷଣ ଦିଆଯିବ ବୋଲି ମନ୍ତ୍ରୀ କୁବେର ଡିନ୍ଦୋର କହିଛନ୍ତି ।
ଗାନ୍ଧୀନଗରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କୁବେର ଡିନ୍ଦୋର କହିଛନ୍ତି, ରାଜ୍ୟରେ ଛଅ ମାସରେ ହୃଦଘାତରେ ମୋଟ ୧୦୫୨ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୮୦ ପ୍ରତିଶତ ହେଉଛନ୍ତି ୧୧ରୁ ୨୫ ବର୍ଷୀୟ । ହୃଦଘାତ ସମସ୍ୟା କମ କରିବାକୁ ଦୁଇ ଲକ୍ଷ ସ୍କୁଲ ଶିକ୍ଷକ ଓ କଲେଜ ଅଧ୍ୟାପକଙ୍କୁ ସିପିଆର ପ୍ରଶିକ୍ଷଣ ଦିଆଯିବ । ଏହା ସହ ୧୦୮ ନମ୍ୱର ଆମ୍ୱୁଲାନ୍ସ ସେବାକୁ ହୃଦ ରୋଗ ସମ୍ପର୍କରେ ପ୍ରତିଦିନ ହାରାହାରି ୧୭୩ କଲ୍ ଆସୁଛି ।
ସେପଟେ ଡିସେମ୍ୱର ୩ରୁ ୧୭ ଯାଏ ୩୭ ମେଡିକାଲ କଲେଜରେ ଶିବିର ଆୟୋଜନ କରାଯାଇ ଦୁଇ ଲକ୍ଷ ସ୍କୁଲ ଓ କଲେଜ ଶିକ୍ଷକଙ୍କୁ ସିପିଆରର ପ୍ରଶିକ୍ଷଣ ଦିଆଯିବ । ଗୁଜରାଟରେ ନିକଟ ଅତୀତରେ ହୃଦଘାତ ଜନିତ ଅନେକ ମୃତ୍ୟୁ ମାମଲା ସାମନାକୁ ଆସିଛି । ନବରାତ୍ରି ଉତ୍ସବ ବେଳେ ଗରବା କାର୍ଯ୍ୟକ୍ରମରେ ମଧ୍ୟ ହୃଦଘାତ ମାମଲା ବଢିଥିଲା । ଏହାପରେ ରାଜ୍ୟର ସ୍ୱାସ୍ଥ୍ୟ ମନ୍ତ୍ରୀ ଋଷିକେଶ ପଟେଲ ହୃଦରୋଗ ବିଶେଷଜ୍ଞଙ୍କ ସହ ବୈଠକ କରିଥିଲେ ବୋଲି କୁବେର ଡିନ୍ଦୋର କହିଛନ୍ତି ।
