ମୋହନା, ୨୭।୪: ଗଜପତି ଜିଲ୍ଲା ମୋହନା ଅଞ୍ଚଳରେ କାଳବୈଶାଖୀ ତାଣ୍ଡବ ଦେଖିବାକୁ ମିଳିଛି । ଏହାର ପ୍ରଭାବରେ ବଜ୍ରପାତ ଯୋଗୁଁ ୨ ଜଣ ଯୁବକ ଗୁରୁତର ଆହତ ହୋଇଛନ୍ତି । ଗୁରୁତର ଆହତ ହୋଇଥିବା ବ୍ୟକ୍ତି ପ୍ରତାପପୁର ଗାଁର କାଳୁଚରଣ ପାଇକ ଓ ଅଶୋକ ଗାଁର ଟିଟୁ ମଲ୍ଲିକ ବୋଲି ଜଣାପଡ଼ିଛି । ମୋହନା ଥାନା ଝାଟିକାସାହି ଗାଁରେ ଏଭଳି ଘଟଣା ଘଟିଥିବା ସୂଚନା । ଗୁରୁତର ୨ ଯୁବକଙ୍କୁ ଗାଁ ଲୋକେ ଉଦ୍ଧାର କରି ମୋହନା ମେଡିକାଲରେ ଭର୍ତ୍ତି କରିଛନ୍ତି । ଶୁକ୍ରବାର ଅପରାହ୍ନ ପ୍ରାୟ ୫ଟାରେ ହଠାତ୍ ଘଡ଼ଘଡ଼ି ସହ ବର୍ଷା ହୋଇଥିଲା । ଝାଟିକାସାହି ଗାଁ ଛକର ଦୋକାନ ପାଖରେ ଥିବା ଏକ ଗଛକୁ ବଜ୍ରପାତ ହୋଇଥିଲା । 

ତେବେ ଦୋକାନରେ ଥିବା କାଳୁ ଓ ଟିଟୁ ଉପରେ ବଜ୍ରପାତ ପ୍ରଭାବ ପଡ଼ିବାରୁ ଉଭୟଙ୍କୁ ଗୁରୁତର ଅବସ୍ଥାରେ ଗାଁ ଲୋକେ ଉଦ୍ଧାର କରି ଚିକିତ୍ସା ପାଇଁ ମୋହନା ମେଡିକାଲରେ ଭର୍ତ୍ତି କରିଥିଲେ । ସେହିପରି ଅଣ୍ଡିରାଗଡ଼ ଗାଁରେ ୧୦ରୁ ଅଧିକ ଘର ଛପର ଉଡ଼ିଯାଇଥିବା ବେଳେ ମହେନ୍ଦ୍ରଗଡ଼ ମୁଖ୍ୟ ରାସ୍ତାରେ ଥିବା କାର୍ ଉପରେ ଗଛ ପଡ଼ିଯାଇଛି । ସେପଟେ ଲୁହାଗୁଡ଼ି ରାସ୍ତା କଡ଼ରେ ଥିବା ଦୋକାନକୁ ଧକ୍କା ଦେଇଛି ଏକ ଟ୍ରକ୍ । କାଳବୈଶାଖୀ ପ୍ରଭାବରେ ବିଭିନ୍ନ ସ୍ଥାନରେ ବିଦ୍ୟୁତ୍ ତାର ଛିଣ୍ଡିଯାଇଥିବା ବେଳେ ବେତାରସିଂ ଗାଁରେ ବିଦ୍ୟୁତ୍ ତାର ଲାଗି ଜଣେ ବୃଦ୍ଧଙ୍କ ମୃତ୍ୟୁ ଘଟିଛି । ମୋହନା ଅଗ୍ନିଶମବାହିନୀ ରାସ୍ତାରେ ପଡ଼ିଥିବା ଗଛଗୁଡ଼ିକୁ ହଟାଇ ଯାତାୟତ ସ୍ୱାଭାବିକ କରିଛନ୍ତି ।