ଚନ୍ଦ୍ରଶେଖରପୁର, ୨୧।୮: ରାଜଧାନୀରେ ପୁଣି ବଡ଼ ଧରଣର ସାଇବର ଠକେଇ ହୋଇଛି । ଡିଜିଟାଲ ଆରେଷ୍ଟ ନାଁରେ ଦିନକରେ ୨ଜଣଙ୍କ ଠାରୁ ୪୦ଲକ୍ଷ ଚଳୁ କରି ଦେଇଛନ୍ତି ସାଇବର ଠକ । ସୁପ୍ରିମ୍କୋର୍ଟଙ୍କ ନକଲି ଆରେଷ୍ଟ ୱାରେଣ୍ଟ ଆଦେଶ ଦେଖାଇ ଜଣଙ୍କଠୁ ୨୫ ଲକ୍ଷ ଠକି ନେଇଥିବା ବେଳେ ଅନ୍ୟ ଜଣଙ୍କୁ ମୁମ୍ବାଇ କ୍ରାଇମବ୍ରାଞ୍ଚ ଅଧିକାରୀ ପରିଚୟ ଦେଇ ୧୫ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଠକାମିର ଶିକାର ଚନ୍ଦ୍ରଶେଖରପୁର ଅଞ୍ଚଳର ଉଭୟ ଯୁବକ ସାଇବର ଥାନାରେ ଅଭିଯୋଗ କରିଛନ୍ତି । ସୂଚନା ଅନୁଯାୟୀ, ଜଣେ ଯୁବକଙ୍କୁ ୯୯୫୪୯୪୫୧୪୪ ନମ୍ବରରୁ ମୁମ୍ବାଇ କ୍ରାଇମ୍ବ୍ରାଞ୍ଚ ଅଧିକାରୀ ନାମରେ ଫୋନ୍ ଆସିଥିଲା । ଯେଉଁଥିରେ ତାଙ୍କ ନାଁରେ ଥିବା ପାର୍ଶଲ୍ରେ ଡ୍ରଗସ୍ ଥିବା କୁହାଯାଇଥିଲା ।
ପରେ ତାଙ୍କ ସହ ପାଖାପାଖି ୧ଘଣ୍ଟାର ଭିଡିଓ କଲ୍ କରି ୧୫ ଲକ୍ଷ ଟଙ୍କା ସଫା କରିଥିଲେ ସାଇବର ଠକ । ସେହିପରି ୬୩୬୬୬୯୮୯୬୦ ନମ୍ବର୍ରୁ ଆଉ ଜଣେ ବ୍ୟକ୍ତିଙ୍କୁ କଲ୍ ଆସିଥିଲା । ସେଥିରେ ଠକ ଜଣକ ନିଜକୁ ମୁମ୍ବାଇ ପୁଲିସ ଦର୍ଶାଇ ଭିଡିଓ କଲ୍ ଜରିଆରେ ଯୁବକଙ୍କୁ ତାଙ୍କ କ୍ରେଡିଟ କାର୍ଡରେ ମନି ଲଣ୍ଡରିଂ ହୋଇଥିବା କହିଥିଲେ । ଏକାଧିକ ଦଫା ଲାଗିଥିବା ସୁପ୍ରିମକୋର୍ଟଙ୍କ ନକଲି ଗିରଫନାମା ଦେଖାଇ ତାଙ୍କୁ ଧମକ ଦେବା ସହ ତାଙ୍କର ଆକାଉଣ୍ଟ ଚେକ୍ କରିଥିଲେ । ୪୦ ମିନିଟ ଭିଡିଓ କଲ୍ କରି ଆର୍ଟିଜିଏସ୍ ଦ୍ୱାରା ୨୫ଲକ୍ଷ ଟଙ୍କା ଠକି ନେଇଯାଇଥିଲେ ସାଇବର ଲୁଟେରା । ଏଭଳି ଠକେଇକୁ ନେଇ ସତର୍କ କରିଛନ୍ତି ପୁଲିସ କମିଶନର ସଞ୍ଜୀବ ପଣ୍ଡା । ଏପରି କଲ୍ଠୁ ଦୂରରେ ରହି ପ୍ରଥମେ ୧୯୩୦କୁ କଲ୍ କରିବାକୁ ପରାମର୍ଶ ଦେଇଛନ୍ତି ।
