ଭୁବନେଶ୍ୱର ୧୪/୦୯: ବଲିଉଡ୍ ଅଭିନେତା ଗୋବିନ୍ଦାଙ୍କ ପାଇ ଅଡୁଆ ବଢ଼ିପାରେ । ଏକ ଅନଲାଇନ୍ ପଞ୍ଜି ଦୁର୍ନୀତି ମାମଲାରେ ଖୁବ୍ ଶୀଘ୍ର ଜେରାର ସମ୍ମୁଖୀନ ହେବେ ଗୋବିନ୍ଦା । ଓଡ଼ିଶା କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲୁ ) ଗୋବିନ୍ଦାଙ୍କୁ ଜେରା କରିବାକୁ ଯାଉଛି । ଲକ୍ଷାଧିକ ଲୋକେ ଅନଲାଇନରେ ସୋଲାର ଟେକ୍ନୋ ଆଲାୟନ୍ସ(ଏସଟିଏ-ଟୋକେନ୍)ରେ ପ୍ରାୟ ୧୦୦୦ କୋଟି ଟଙ୍କା ବିନିଯୋଗ କରି ଠକାମୀର ଶିକାର ହୋଇଛନ୍ତି । କୋଟି କୋଟି ଟଙ୍କାର ଏହି କ୍ରିପ୍ଟୋ-ପଞ୍ଜି ଠକେଇ ମାମଲାରେ ଖୁବଶୀଘ୍ର ଓଡ଼ିଶା ଇଓଡବ୍ଲୁ ଗୋବିନ୍ଦାଙ୍କୁ ଜେରା କରିବ ବୋଲି ଜଣାପଡ଼ିଛି ।
ଗଣେଶ ମହୋତ୍ସବ ପାଇଁ ସମସ୍ତେ ଏକାଠି; ୬ ଦିନ ଝଲସିବ ବଡ଼ଗଡ଼, ଗଣେଶଙ୍କ ପଦଶ୍ରୀ ମଣ୍ଡନ କରିବ
ଇଓଡବ୍ଲୁ ଇନ୍ସପେକ୍ଟର ଜେନେରାଲ ଜେଏନ୍ ପଙ୍କଜ କହିଛନ୍ତି, ଜୁଲାଇରେ ଗୋଆଠାରେ ଆୟୋଜିତ ହୋଇଥିବା ସୋଲାର ଟେକ୍ନୋ ଆଲାୟନ୍ସ(ଏସଟିଏ-ଟୋକେନ୍)ର ଉଦ୍ଘାଟନୀ କାର୍ଯ୍ୟକ୍ରମରେ ଗୋବିନ୍ଦା ଯୋଗ ଦେଇଥିଲେ। ଏଥିସହ ଏହି ଠକ ସଂସ୍ଥାରେ ବିନିଯୋଗ ପାଇଁ ପ୍ରଚାର କରି ଗୋବିନ୍ଦା ଲୋକଙ୍କୁ ଉତ୍ସାହିତ କରିଥିଲେ।
ତେବେ ଏହି ଠକେଇର ମୁଖ୍ୟ ଅଭିଯୁକ୍ତକୁ ଇଓଡବ୍ଲୁ ଗିରଫ କରିଛି । ଅଧିକାରୀଙ୍କ କହିବା ଅନୁସାରେ, ସୋଲାର ଟେକ୍ନୋ ଆଲାୟନ୍ସ ଏପର୍ଯ୍ୟନ୍ତ ଅନେକ ଦେଶରେ କ୍ରିପ୍ଟୋ ବିନିଯୋଗ ବାହାନାରେ ଏକ ଅନଲାଇନ୍ ପଞ୍ଜି ସ୍କିମ୍ ଚଳାଉଥିଲା । ଅଦ୍ୟାବଧି ୨ ଲକ୍ଷରୁ ଅଧିକ ଲୋକ ପ୍ରାୟ ୧୦୦୦ କୋଟି ଟଙ୍କା ଠକେଇର ଶିକାର ହୋଇଥିବା ଜଣାପଡ଼ିଛି। ତେବେ ବଲିଉଡ ଅଭିନେତା ଗୋବିନ୍ଦାଙ୍କୁ ଏ ସମ୍ପର୍କରେ ପଚରାଉଚରା କରାଯିବ।
