ଟିକାବାଲି, ୨୦/୧୧ : କନ୍ଧମାଳର କୁନି କରାଟେ ପ୍ରତିଯୋଗୀ ସାନଭୀ ସାଧନା ଜାତୀୟ ସ୍ତରରେ ସଫଳତା ହାସଲ କରି ଜିତିଛନ୍ତି କାଂସ୍ୟ ପଦକ। ଦିଲ୍ଲୀରେ ଚାଲିଥିବା  ଜାତୀୟ ସବ ଜୁନିୟର କରାଟେ ଚାମ୍ପିୟନସିପରେ ତାଙ୍କୁ ମିଳିଛି ଏହି ସଫଳତା। ଏହି ପ୍ରତିଯୋଗୀତାରେ ଓଡ଼ିଶା ଟିମକୁ ୭ଟି ସ୍ଵର୍ଣ୍ଣ, ୬ଟି ରୌପ୍ୟ ଏବଂ ୧୨ଟି କାଂସ୍ୟ ପଦକ ସହ ସମୁଦାୟ ୨୫ଟି ପଦକ ମିଳିଛି। 

ବିଜୟୀମାନଙ୍କ ଭିତରେ ଅଛନ୍ତି କନ୍ଧମାଳ ଜିଲ୍ଲା ଟିକାବାଲି ଅଞ୍ଚଳର ସାନଭୀ ସାଧନା। ସେ ୭ ବର୍ଷ ବୟସରେ ୨୦ କି.ଗ୍ରା ବର୍ଗରେ କାଂସ୍ୟ ପଦକ ହାତେଇଛନ୍ତି। ଉତ୍କଳ କରାଟେ ସ୍କୁଲର ପ୍ରଶିକ୍ଷାର୍ଥୀ ସାନଭୀ ଶଙ୍କରାଖୋଲ ବାସିନ୍ଦା ଏବଂ ବର୍ତ୍ତମାନ ବସ୍ତିଙ୍ଗିଆ ଠାରେ ରହୁଛନ୍ତି। ଆଶୀଷ କୁମାର ଏବଂ ସୁପ୍ରଭାଙ୍କ ଝିଅ ସାନଭି ୫ ଵର୍ଷ ବୟସରୁ ଟିକାବାଲି ଉତ୍କଳ କରାଟେ ସ୍କୁଲରେ ପ୍ରଶିକ୍ଷଣ ନେଉଛନ୍ତି। 

ପ୍ରଥମ ଥର ପାଇଁ କନ୍ଧମାଳ ଜିଲ୍ଲାରୁ ଜାତୀୟ ସ୍ତରରେ ସଫଳତା ଆଣିଥିବାରୁ କରାଟେ ସ୍କୁଲର ପ୍ରତିଷ୍ଠାତା ଜୁନେସ ଦିଗାଲ ଏବଂ ପ୍ରଶିକ୍ଷକ ଗୋପାଳ ଚନ୍ଦ୍ର କହଁର ତାଙ୍କୁ ଅଭିନନ୍ଦନ ଜଣାଇଛନ୍ତି।