ପୁରୀ, ୧୪/୧୧ : ୭୦ତମ ନିଖିଳ ଭାରତ ସମବାୟ ସପ୍ତାହ ପାଳନ ଅବସରରେ ସମବାୟ ବିଭାଗ ପୁରୀ ବିଭାଜନ ପକ୍ଷରୁ ମଙ୍ଗଳବାର ପୂର୍ବାହ୍ନରେ ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଦୁଇଟି ସମବାୟ ରଥର ଶୁଭାରମ୍ଭ କରାଯାଇଛି। ଏହାକୁ ଅତିରିକ୍ତ ଜିଲ୍ଲାପାଳ ପ୍ରଦୀପ କୁମାର ସାହୁ ପତାକା ଦେଖାଇ ଶୁଭାରମ୍ଭ କରିବା ସହ ସମବାୟ ଆନ୍ଦୋଳନକୁ ଆହୁରି କ୍ରିୟାଶୀଳ କରିବାରେ ସହାୟକ ହେବ ବୋଲି କହିଥିଲେ।

ଆମ ରାଜ୍ୟ ଓ ଦେଶର ଅର୍ଥନୀତିକୁ ସୁଦୃଢ କରିବାରେ ସମବାୟର ବଡ଼ ଯୋଗ ଦାନ ରହିଛି। ଏହା ଆହୁରି ଅଧିକ ସମ୍ପ୍ରସାରିତ କରିବା ଉଦ୍ଦେଶ୍ୟରେ ଏହି ରଥ ଜିଲ୍ଲାର ସମସ୍ତ ୧୧ଟି ବ୍ଲକ ପରିକ୍ରମଣ କରି ଲୋକଙ୍କୁ ସଚେତନ କରିବ ବୋଲି ଶ୍ରୀ ସାହୁ ସୂଚନା ଦେଇଥିଲେ। ଅନ୍ୟମାନଙ୍କ ମଧ୍ୟରେ ପୁରୀ ନିମାପଡ଼ା କେନ୍ଦ୍ର ସମବାୟ ବ୍ୟାଙ୍କ ସଭାପତି କିଶୋର କୁମାର ଛୋଟରାୟ, ଯୁଗ୍ମ ନିବନ୍ଧକ ତଥା ଭାରପ୍ରାପ୍ତ ଉପ ନିବନ୍ଧକ ରୁଦ୍ର ପ୍ରସାଦ ଦାସ, ସମ୍ପାଦକ ସାରଥୀ ଶତପଥୀ ଓ ଏଆରସିଏସ ସ୍ୱରୂପ କୁମାର କର ପ୍ରମୁଖ ଏହି କାର୍ଯ୍ୟକ୍ରମରେ ଉପସ୍ଥିତ ରହି ସହଯୋଗ କରିଥିଲେ।