ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ଗଭର୍ଣ୍ଣର ଶକ୍ତିକାନ୍ତ ଦାସ ୨୦୨୪ର ପ୍ରଥମ ମୌଦ୍ରିକ ନୀତିର ଘୋଷଣା କରିବା ସହ ରେପୋ ରେଟ୍ରେ କୌଣସି ପରିବର୍ତ୍ତନ ହୋଇନଥିବା ଜଣାଇଛନ୍ତି । ଆରବିଆଇ ନିଜର ମୌଦ୍ରିକ ନୀତି ସମୀକ୍ଷାର ନିଷ୍ପତ୍ତି ଆଧାରରେ ରେପୋ ରେଟ କମ୍ କରିନାହାନ୍ତି । ତେଣୁ ରେପୋ ରେଟ୍ ୬.୫୦ ପ୍ରତିଶତରେ ହିଁ ଅପରିବର୍ତ୍ତିତ ରହିଛି । ସେପଟେ ମାର୍ଜିନାଲ୍ ଷ୍ଟାଣ୍ଡିଂ ଫ୍ୟାସିଲିଟି ବା ଏମଏସ୍ଏଫ ଏବଂ ବ୍ୟାଙ୍କ ରେଟ୍ ୬.୭୫ ପ୍ରତିଶତରେ ଅପରିବର୍ତ୍ତିତ ରଖାଯାଇଛି ।
ବ୍ୟାଙ୍କର କ୍ରେଡିଟ ପଲିସି ପରେ ଏନେଇ ଘୋଷଣା କରିଛନ୍ତି ଆରବିଆଇ ଗଭର୍ଣ୍ଣର । ଏହାର ଅର୍ଥ ଦେଶବାସୀଙ୍କୁ ଲୋନ୍ର ଇଏମଆଇରୁ ଆଶ୍ବସ୍ତି ମିଳିବ ନାହିଁ । ରେପୋ ରେଟ୍ କମିଥିଲେ ଗ୍ରାହକଙ୍କ ବ୍ୟାଙ୍କ ଋଣରୁ ଆଶ୍ବସ୍ତି ମିଳିଥାନ୍ତା । ମୌଦ୍ରିକ ନୀତି ସମିତିର ଏହି ବୈଠକ ଫେବୃଆରୀ ୬ରୁ ଆରମ୍ଭ ହୋଇଥିଲା ଏବଂ ଆଜି ଶେଷ ହୋଇଛି । ଆରବିଆଇ ଗଭର୍ଣ୍ଣର କହିଛନ୍ତି ଯେ, ଆରବିଆଇର ଏମପିସି ମୁଦ୍ରାସ୍ଫୀତି ହାର ୪ ପ୍ରତିଶତରେ ଅପରିବର୍ତ୍ତିତ ରଖିଛି । ଚଳିତବର୍ଷ ଏହାକୁ ଆହୁରିକମ୍ କରିବା ପାଇଁ ଚେଷ୍ଟା କରାଯାଉଛି ।
ଡିସେମ୍ବର ୨୦୨୩ ରେ ମୁଦ୍ରାସ୍ଫୀତି ୩.୮ ପ୍ରତିଶତକୁ ଖସିଆସିଥିଲା । ଯାହାକି ଗତ ୪ ବର୍ଷରେ ସବୁଠୁ କମ୍ ଥିଲା ବୋଲି ସେ କହିଛନ୍ତି । ଏହା ପୂର୍ବରୁ ୮ ଡିସେମ୍ବର ୨୦୨୩ରେ ଆରବିଆଇର ୩ ଦିନିଆ ଏମପିସି ବୈଠକ ହୋଇଥିଲା । ଏହା ପରେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ କହିଥିଲେ ଯେ, ସେଣ୍ଟ୍ରାଲ ବ୍ୟାଙ୍କ ‘ଷ୍ଟାଟସ୍ କୋ’ ଅପରିବର୍ତ୍ତିତ ରଖିଥିବା ବେଳେ ରେପୋରେଟ୍ ୬.୫ ରହିଛି । ରିଜର୍ଭ ବ୍ୟାଙ୍କ ଅଫ ଇଣ୍ଡିଆ ଗତବର୍ଷ ଫେବୃଆରୀ ୮ରେ ରେପୋ ରେଟ୍କୁ ୨୫ ବେସିସ ପଏଣ୍ଟ ବା ୦.୨୫ ପ୍ରତିଶତ ବଢ଼ାଇ ୬.୫ ପ୍ରତିଶତ କରିଥିଲେ । ଏହା ପରେ ଲାଗାତାର ୬ ଥର ରେପୋ ରେଟ୍ରେ କୌଣସି ପରିବର୍ତ୍ତନ ହୋଇନଥିଲା । ଆଉ ଏଥର ମଧ୍ୟରେ ସମାନ ନିଷ୍ପତ୍ତି ନେଇଛନ୍ତି ଆରବିଆଇ । ସେହିଭଳି ରିଭର୍ସ ରେପୋ ରେଟ୍ ୩.୩୫ ପ୍ରତିଶତରେ ଅପରିବର୍ତ୍ତିତ ରଖିଛନ୍ତି ।
