ନୂଆଦିଲ୍ଲୀ,୧୧/୦୯: ଲିଭର ରୋଗ ପାଇଁ ବ୍ୟବହାର ହେଉଥିବା ଔଷଧ ଡିଫିଟେଲିୟୋ ଏବଂ କ୍ୟାନ୍ସର ଚିକିତ୍ସାରେ ବ୍ୟବହୃତ ଇଞ୍ଜେକସନ ଆଡସେଟ୍ରିସ୍ର ନକଲି ସାମଗ୍ରି ଭାରତରେ ବିକ୍ରି ହେଉଛି । ଡିସିଜିଆଇ (ଡ୍ରଗ୍ସ କଣ୍ଟ୍ରୋଲର ଜେନେରାଲ ଅଫ୍ ଇଣ୍ଡିଆ) ଏଭଳି ସୂଚନା ଦେଇଛି । ଏଥିସହ ଏଭଳି ନକଲି ଔଷଧ ଉପରେ କଡା ନଜର ରଖିବାକୁ ସବୁ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶକୁ ପରାମର୍ଶ ଦେଇଛି ।
ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲୁଏଚ୍ଓ) ଏହି ନକଲି ଔଷଧକୁ ନେଇ କିଛିଦିନ ତଳେ ଆଲର୍ଟ ଜାରି କରିଥିଲା । ଯାହାକୁ ନେଇ ଡିସିଜିଆଇ ଗତ ୫ ତାରିଖରେ କହିଥିଲା କି ଭାରତ ସମେତ ୪ଟି ଦେଶରେ ଆଡ୍ସେଟ୍ରିସ୍ ଇଞ୍ଜେକସନର ୫୦ ମିଲିଗ୍ରାମର ଏକାଧିକ ନକଲି ଭର୍ସନ ବିକ୍ରି କରାଯାଉଛି । ଯାହାକୁ ଟେକେଡା ଫାର୍ମାସ୍ୟୁଟିକାଲ କମ୍ପାନି ଲିମିଟେଡ ପ୍ରସ୍ତୁତ କରୁଛି । ଏହି ଔଷଧ ରୋଗୀମାନଙ୍କୁ ଘରୋଇ ଭାବେ ପ୍ରଦାନ କରାଯାଉଛି । ବିଶେଷକରି ଅନ୍ଲାଇନ ମାଧ୍ୟମରେ ଏହାର ବହୁଳ ଯୋଗାଣ କରାଯାଉଛି ।
ଡିସିଜିଆଇ ଏ ସଂକ୍ରାନ୍ତରେ ରାଜ୍ୟର ଡ୍ରଗ୍ସ କଣ୍ଟ୍ରୋଲରଙ୍କ ନିକଟକୁ ଚିଠି ଲେଖିଛି । ଯେଉଁଥିରେ ଏହି ଔଷଧର ୮ଟି ଭିନ୍ନ ଭିନ୍ନ ଭର୍ସନ ବିକ୍ରି କରାଯାଉଥିବା ଉଲ୍ଲେଖ କରାଯାଇଛି । ସେହିଭଳି ସେପ୍ଟେମ୍ବର ୬ରେ ଡିସିଜିଆଇ ଆଉ ଏକ ଆଡଭାଇଜରୀ ଜାରି କରିଛି । ଯେଉଁଥିରେ ଡିଫିଟେଲିୟୋ (ଡିଫାଇବ୍ରୋଟାଇଡ୍) ୮୦ ମିଲିଗ୍ରାମ କନସେଣ୍ଟ୍ରେଟ୍ ପାଇଁ ଡବ୍ଲୁଏଚ୍ଓ ଗତ ୪ ତାରିଖରେ ସତର୍କ ସୂଚନା ଜାରି କରିଥିବା କଥା ଉଲ୍ଲେଖ ରହିଛି । ଏହି ଔଷଧର ନକଲି ଭର୍ସନ ଭାରତରେ ଗତ ଏପ୍ରିଲରେ ଠାବ କରାଯାଇଥିଲା । ତୁର୍କୀରେ ଗତ ଜୁଲାଇ ମାସରେ ଏଭଳି ନକଲି ଔଷଧ ମଧ୍ୟ ମିଳିଥିଲା ।
ଡବ୍ଲୁଏଚ୍ଓ କହିଛି କି ଡିଫିଟେଲିୟୋର ନକଲି ଭର୍ସନ ଔଷଧ ବ୍ୟବହାର ଫଳରେ ରୋଗୀଙ୍କର ରୋଗ ଭଲ ହେବା ବଦଳରେ ଗମ୍ଭୀର ସ୍ୱାସ୍ଥ୍ୟ ସମସ୍ୟା ସୃଷ୍ଟି ହୋଇଥାଏ । କେତେକ ସ୍ଥିତିରେ ଏଭଳି ନକଲି ଔଷଧ ବ୍ୟବହାର ଫଳରେ ରୋଗୀଙ୍କର ମୃତ୍ୟୁ ଘଟିବାର ସମ୍ଭାବନା ରହିଛି । ଏହି ନକଲି ଔଷଧ ସମ୍ପର୍କରେ ସୂଚନା ମିଳିବା ପରେ ଡିସିଜିଆଇ ଡାକ୍ତରମାନଙ୍କୁ ଔଷଧ ଲେଖିବା ବେଳେ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛି । ଏଥିସହ ଏଭଳି ନକଲି ଔଷଧ ସମ୍ପର୍କରେ ରୋଗୀମାନଙ୍କୁ ସଚେତନ କରାଇବାକୁ ମଧ୍ୟ କହିଛି ।
ଯାହାଫଳରେ ଏଭଳି ନକଲି ଔଷଧ ସେବନ କରୁଥିଲେ ପାଶ୍ୱର୍ପ୍ରତିକ୍ରିୟା ଦେଖାଦେବା ଫଳରେ ରୋଗୀମାନେ ତୁରନ୍ତ ହସ୍ପିଟାଲକୁ ଆସି ଚିକିତ୍ସା କରାଇବେ । ଏଭଳି ନକଲି ଔଷଧ ପ୍ରସ୍ତୁତି, ଗଚ୍ଛିତ ଓ ବ୍ରିକି ଉପରେ ନଜର ରଖିବା ସହ ବଜାରରେ ଉପଲବ୍ଧ ଔଷଧର ନମୁନା ସଂଗ୍ରହ କରି ତାକୁ ପରୀକ୍ଷା ନିମେନ୍ତ ପଠାଇବା ଲାଗି ଡିସିଜିଆଇ ସବୁ ରାଜ୍ୟ ଡ୍ରଗ୍ସ କଣ୍ଟ୍ରୋଲରମାନଙ୍କୁ ପରାମର୍ଶ ଦେଇଛି ।
