ନୂଆଦିଲ୍ଲୀ, ୦୮/୧୨: ଆସନ୍ତା ବର୍ଷ ଆମେରିକାରେ ରାଷ୍ଟ୍ରପତି ନିର୍ବାଚନ ହେବ । ରାଷ୍ଟ୍ରପତି ନିର୍ବାଚନ ପୂର୍ବରୁ ଜୋ ବାଇଡେନଙ୍କ ଲାଗି ଅଡ଼ୁଆ ବଢ଼ୁଥିବା ଦେଖା ଯାଉଛି । ଗୁରୁବାର ବିଳମ୍ବିତ ରାତିରେ ଜୋ ବାଇଡେନଙ୍କ ପୁଅ ହଣ୍ଟର ବାଇଡେନ ଟିକସ ଚୋରି ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି । ହଣ୍ଟର ବାଇଡେନଙ୍କ ଉପରେ ୧.୪ ମିଲିୟନ୍ ଡଲାର ଟିକସ ଚୋରି ଅଭିଯୋଗ ରହିଛି ।
ରିପୋର୍ଟ ଅନୁସାରେ, କେନ୍ଦ୍ରୀୟ କାର୍ଲିଫର୍ଣ୍ଣିଆର ଆମେରିକୀ ଜିଲ୍ଲା କୋର୍ଟରେ ବାଇଡେନଙ୍କ ପୁଅ ହଣ୍ଟରଙ୍କ ଉପରେ ଗୁରୁତର ଅଭିଯୋଗ ଲଗାଯାଇଛି । ଜିଲ୍ଲା ଅଦାଲତରେ ୫୬ ପୃଷ୍ଠାର ଅଭିଯୋଗ ପତ୍ର ଦାଖଲ ହୋଇଛି । ଓକିଲ କହିଛନ୍ତି, ୨୦୧୬ରୁ ୨୦୧୯ ମଧ୍ୟରେ ହଣ୍ଟର ବାଇଡେନ୍ ୧.୪ ମିଲିୟନ୍ ଡଲାରର ଟିକସ ପୈଠ କରି ନାହାନ୍ତି । ଏପରିକି ଟିକସ ଫାଙ୍କିବା ପାଇଁ ହଣ୍ଟର ସ୍ୱତନ୍ତ୍ର ଯୋଜନା କରିଥିବା କହିଛନ୍ତି ଓକିଲ ।
ଅଭିଯୋଗ ଅନୁସାରେ, ହଣ୍ଟର ବାଇଡେନ୍ ଟିକସ ଦେବାରେ ଅନିୟମିତତା କରିଛନ୍ତି । ତାଙ୍କ ବିରୋଧରେ ଟିକସ ଚୋରି ଓ ଭୁଲ୍ ଟିକସ ଦାଖଲ ନେଇ ୯ଟି ଅଭିଯୋଗ ହୋଇଛି । ମାମଲାରେ ହଣ୍ଟର ବାଇଡେନଙ୍କୁ ୧୭ ବର୍ଷର ଲମ୍ବା ଜେଲ୍ ଦଣ୍ଡାଦେଶ ହୋଇପାରେ । ଆହୁରି ଅଧିକ ତଦନ୍ତ ଜାରି ରହିଥିବା ନ୍ୟାୟ ବିଭାଗ ପକ୍ଷରୁ କୁହାଯାଇଛି ।
୨୦୧୬ରୁ ୨୦୨୦ ମଧ୍ୟରେ ହଣ୍ଟର ବାଇଡେନ୍ ୭ ମିଲିୟନ ଡଲାରରୁ ଅଧିକ ଆୟ କରିଛନ୍ତି । ଆୟକୁ ସେ ରାଜକୀୟ ଚଳଣୀ ଉପରେ ଖର୍ଚ୍ଚ କରି ଟିକସ ଦେଇ ନଥିବା ଅଭିଯୋଗ ହୋଇଛି । ଅଭିଯୋଗରେ ଦର୍ଶା ଯାଇଛି, ହଣ୍ଟର ୨୦୧୬ରୁ ୨୦୨୦ ଅକ୍ଟୋବର ୧୫ ମଧ୍ୟରେ ରାଜକୀୟ ଜୀବନଶୈଳୀ ପାଇଁ ଅର୍ଥ ଖର୍ଚ୍ଚ କରିଥିବା ବେଳେ ଟିକସ ଦେଇ ନାହାନ୍ତି ।
ଏହା ପୂର୍ବରୁ ଜୋ ବାଇଡେନଙ୍କ ଉପରେ ହଣ୍ଟରଙ୍କୁ ଆର୍ଥିକ ଲାଭ ଦେଇଥିବାର ଅଭିଯୋଗ କରିଥିଲେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଆଗକୁ ରାଷ୍ଟ୍ରପତି ନିର୍ବାଚନ ଥିବାବେଳେ ବାଇଡେନ୍ ପୁଅ ସହ ଥିବା କହିଛନ୍ତି । ଏଭଳି ସ୍ଥିତିରେ ହଣ୍ଟରଙ୍କୁ ଜେଲ୍ ହେଲେ ବାଇଡେନଙ୍କ ପାଇଁ ଏହା ନିର୍ବାଚନରେ ଅଡ଼ୁଆ ବଢ଼ାଇ ପାରେ ।