ଲକ୍ଷ୍ନୌ,୨୬/୦୧: ଜ୍ଞାନବାପି ମସ୍ଜିଦ୍ର ଏଏସ୍ଆଇ ସର୍ଭେ ରିପୋର୍ଟକୁ ହିନ୍ଦୁ ଓ ମୁସ୍ଲିମ୍ ପକ୍ଷକୁ ହସ୍ତାନ୍ତର କରାଯାଇଛି । ୮୩୯ ପୃଷ୍ଠା ବିଶିଷ୍ଟ ଏହି ରିପୋର୍ଟ ପାଇଁ ଉଭୟ ପକ୍ଷଙ୍କୁ ପୃଷ୍ଠା ପିଛା ୨ ଟଙ୍କା ଦେବାକୁ ପଡ଼ିଛି । ଏହାପରେ ହିନ୍ଦୁ ପକ୍ଷ ଓକିଲ ବିଷ୍ଣୁଶଙ୍କର ଜୈନ ସାମ୍ବାଦିକ ସମ୍ମିଳନୀ କରିଛନ୍ତି ।
ସେ କହିଛନ୍ତି, ଜ୍ଞାନବାପିରେ ମସ୍ଜିଦ୍ ପୂର୍ବରୁ ମନ୍ଦିର ଥିଲା । ଏ ନେଇ ୩୨ ପ୍ରମାଣ ମିଳିଛି । ମସ୍ଜିଦ୍ର ସମସ୍ତ ଖମ୍ବ ପ୍ରଥମେ ମନ୍ଦିରର ଥିଲା । ଏଗୁଡ଼ିକୁ ରୂପାନ୍ତରଣ କରାଯାଇ ମସ୍ଜିଦ୍ରେ ବ୍ୟବହାର କରାଯାଇଛି । ଉଲ୍ଲେଖଯୋଗ୍ୟ, କୋର୍ଟଙ୍କ ନିର୍ଦ୍ଦେଶ ପରେ ଜ୍ଞାନବାପି ମସ୍ଜିଦ୍ର ଏଏସ୍ଆଇ ସର୍ଭେ ହୋଇଥିଲା । ଡିସେମ୍ବର ୧୮ରେ ଏଏସ୍ଆଇ ଜିଲ୍ଲା ବିଚାରପତିଙ୍କ ଅଦାଲତରେ ନିଜ ରିପୋର୍ଟ ଦାଖଲ କରିଥିଲା । ଏହାପରେ ଉଭୟ ପକ୍ଷଙ୍କୁ ରିପୋର୍ଟର କପି ଦେବା ଲାଗି ହିନ୍ଦୁ ପକ୍ଷ ଦାବି କରିଥିଲା ।
ବୁଧବାର ଜିଲ୍ଲା କୋର୍ଟ ସବୁ ପକ୍ଷଙ୍କୁ ସର୍ଭେ ରିପୋର୍ଟ ଦେବା ଲାଗି ନିର୍ଦ୍ଦେଶ ଦେଇଥିଲେ । ବିଷ୍ଣୁଶଙ୍କର ଦାବି କରିଛନ୍ତି ଯେ ଜିପିଆର୍ ସର୍ଭେ ଉପରେ ଏଏସ୍ଆଇ କହିଛି ଯେ ଜ୍ଞାନବାପିରେ ଏକ ବଡ଼ ଭବ୍ୟ ହିନ୍ଦୁ ମନ୍ଦିର ଥିବା ନେଇ କୁହାଯାଇପାରେ । ବର୍ତ୍ତମାନର ଢାଞ୍ଚା ପୂର୍ବରୁ ଏକ ବଡ଼ ହିନ୍ଦୁ ମନ୍ଦିର ଥିଲା । ଏଏସ୍ଆଇ ମୁତାବକ ବର୍ତ୍ତମାନ ଯେଉଁ ଢାଞ୍ଚା ରହିଛି, ତାହାର ପଶ୍ଚିମ ପାଚେରି ପୂର୍ବର ବଡ଼ ହିନ୍ଦୁ ମନ୍ଦିରର ଅଂଶ । ଏଠାରେ ପୂର୍ବରୁ ଏକ ଢାଞ୍ଚା ରହିଥିଲା, ଯାହା ଉପରେ ମସ୍ଜିଦ୍ ବନାଯାଇଛି ।
