ପ୍ରମୂଖ ଖବର
  • କେନ୍ଦୁଝର : ଚୋରା କାଠ ଚାଲାଣ ବେଳେ ମାଡ଼ି ବସିଲା ବନ ବିଭାଗ, ୭ ଟ୍ରିପରୁ ଉର୍ଦ୍ଧ୍ଵ କାଠ ଜବତ
  • ||
  • ଯାଜପୁର : ଶୌଚ ହେବାକୁ ଯାଇ କେନାଲରେ ଭାସିଗଲେ ନାବାଳକ
  • ||
  • ଭୁବନେଶ୍ଵର : ୨୭ରେ ବସିବ ନୀତି ଆୟୋଗ ବୈଠକ, ଯୋଗଦେବେ ମୁଖ୍ୟମନ୍ତ୍ରୀ
  • ||

୯ କୋଟି ଟଙ୍କାରେ ବିକ୍ରି ହେଲା ରାଜକୁମାରୀ ଡାଏନାଙ୍କ ସ୍ୱେଟର, ନିଲାମରେ ଭାଙ୍ଗିଲା ସବୁ ରେକର୍ଡ

ନୂଆଦିଲ୍ଲୀ ୧୭/୦୯: ବ୍ରିଟେନର ଦିବଂଗତ ରାଜକୁମାରୀ ଡାଏନା ପିନ୍ଧିଥିବା ଏକ ଲାଲ୍‌ ରଙ୍ଗର ସ୍ୱେଟର ହାରାହାରି ୯ କୋଟି ଟଙ୍କାରେ ନିଲାମ ହୋଇଛି । ବିଶ୍ୱର ବହୁ ପରିଚିତ ନିଲାମ ସଂସ୍ଥା ସୋଥ୍‌ବାଏଜ୍‌ ଦ୍ୱାରା ଆୟୋଜିତ ଏହି ନିଲାମ ଅନ୍‌ଲାଇନ୍‌ ଅନୁଷ୍ଠିତ ହୋଇଥିଲା । ଡାଏନାଙ୍କ ସ୍ୱେଟରରେ ଥିବା ଧଳା ମେଣ୍ଢାମାନଙ୍କର ଧାଡ଼ିରେ ଏକମାତ୍ର କଳା ମେଣ୍ଢାର ଡିଜାଇନ୍‌ ହୋଇଛି । ସ୍ୱେଟର୍‌ର ନିଲାମ ଲାଗି ଗତ ୨ ସପ୍ତାହ ଧରି ଲୋକେ ବୋଲି ଲଗାଉଥିଲେ । ଏହାର ମୂଲ୍ୟ ୪୧ ଲକ୍ଷରୁ ୬୬ ଲକ୍ଷ ଟଙ୍କା ହେବ ବୋଲି କମ୍ପାନି ଅନୁମାନ କରୁଥିଲା । ବୋଲି ବନ୍ଦ ହେବା ପୂର୍ବରୁ ସ୍ୱେଟର୍‌ ୧ କୋଟି ଟଙ୍କାରୁ ଅଧିକ ମୂଲ୍ୟରେ ନିଲାମ ହୋଇଥାନ୍ତା । କିନ୍ତୁ ଜଣେ ଅପରିଚିତ ବିଡର୍‌ ୯ କୋଟି ଟଙ୍କାର ବୋଲି ଲଗାଇ ସ୍ୱେଟର୍‌କୁ କିଣିଲେ, ଯାହା ଆଶା କରାଯାଉଥିବା ମୂଲ୍ୟଠାରୁ ୧୦ ଗୁଣ ଅଧିକ । 

୧୯୮୧ ମସିହାରେ ପ୍ରିନ୍ସ ଚାର୍ଲସଙ୍କ ସହ ନିବର୍ନ୍ଧର କିଛି ଦିନ ପରେ ଡାଏନା ଏକ ପୋଲୋ ମ୍ୟାଚ୍‌ରେ ଯୋଗ ଦେଇଥିଲେ । ସେତେବେଳେ ସେ ୧୯ ବର୍ଷ ବୟସର ଥିଲେ । ଏହି ସମୟରେ ସେ ଏହି ସ୍ୱେଟର୍‌ ପିନ୍ଧିଥିଲେ । ସେତେବେଳେ ଲୋକେ ଅନୁମାନ କରୁଥିଲେ, ଡାଏନା ଏହି ସ୍ୱେଟର୍‌ ଜରିଆରେ ସଙ୍କେତ ଦେଉଛନ୍ତି ଯେ ରାଜ ପରିବାରରେ ସେ କଳା ମେଣ୍ଢା ଭଳି ।

୧୯୯୬ ମସିହାରେ ସେ ଚାର୍ଲସଙ୍କୁ ଛାଡ଼ପତ୍ର ଦେଇଥିଲେ । ୩୬ ବର୍ଷ ବୟସରେ ପ୍ୟାରିସ୍‌ରେ ଏକ କାର୍‌ ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଥିଲା । ଡାଏନାଙ୍କର ଏହି ସ୍ୱେଟର୍‌କୁ ୱାର୍ମ ଆଣ୍ଡ ୱଣ୍ଡର୍‌ଫୁଲ କମ୍ପାନିର କମ୍‌ ଜଣାଶୁଣା ଡିଜାଇନର୍‌ ସାଲି ମୁଇର ଓ ଜୋଆନା ଓସ୍‌ବର୍ନ ପ୍ରସ୍ତୁତ କରିଥିଲେ । ଡାଏନାଙ୍କର ଏହି ସ୍ୱେଟର୍‌ ଚୟନ ଯୋଗୁ କମ୍ପାନି ଓ ସ୍ୱେଟର୍‌ ନିର୍ମାତା ବିପୁଳ ଖ୍ୟାତି ଅର୍ଜନ କରିଥିଲେ । ସବୁଠୁ ମହଙ୍ଗା ସ୍ୱେଟର୍‌ର ରେକର୍ଡ ଏବେ ଡାଏନାଙ୍କ ସ୍ୱେଟର୍‌ ଭାଙ୍ଗିଛି । ଏହା ପୂର୍ବରୁ ଆମେରିକୀୟ ଗାୟକ-ସଙ୍ଗୀତଜ୍ଞ କର୍ଟ କୋବେନଙ୍କ ସ୍ୱେଟର୍‌ ୨ କୋଟି ଟଙ୍କାରେ ବିକ୍ରି ହୋଇଥିଲା । ତେବେ ଡାଏନାଙ୍କର ଏହା ପ୍ରଥମ ସାମଗ୍ରୀ ନୁହେଁ, ଯାହା ଏତେ ଦାମ୍‌ରେ ବିକ୍ରି ହୋଇଛି । ଏହା ପୂର୍ବରୁ ତାଙ୍କର ଏକ ବଲ୍‌ଗାଉନ୍‌ ୫ କୋଟି ଟଙ୍କାରେ ବିକ୍ରି ହୋଇଥିଲା ।

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.