ରାଉରକେଲା,୦୫/୧୧: ରାଉରକେଲା ଗସ୍ତରେ ଆସି ଟ୍ରେନ୍ରୁ ଓହ୍ଲାଉଥିବା ବେଳେ ଜଣେ ବରିଷ୍ଠ ବିଜେପି ନେତା ଦଳୀୟ ମହିଳା କର୍ମୀଙ୍କୁ ମାଡ଼ ମାରିଥିବା ନେଇ ଅଭିଯୋଗ ଉଠିଛି । ଏନେଇ ଥାନାରେ କୌଣସି ଏତଲା ହୋଇନାହିଁ ।
ଏକ ଅସମର୍ଥିତ ସୂତ୍ରର ସୂଚନା ମୁତାବକ, ରାଉରକେଲା ଗସ୍ତରେ ଆସି ରେଳଷ୍ଟେସନରେ ଏହି ନେତା ଶୁକ୍ରବାର ଓହ୍ଲାଇଥିଲେ । ସେହି ସମୟରେ ରାଉରକେଲା ନିର୍ବାଚନମଣ୍ଡଳୀ ଅନ୍ତର୍ଗତ ଜଣେ ମହିଳା କର୍ମୀ କୌଣସି ପ୍ରସଙ୍ଗକୁ ନେଇ ନେତାଙ୍କ ସହ ଆଲୋଚନା କରିବାକୁ ଚାହିଁଥିଲେ । କୌଣସି କାରଣରୁ ନେତାଜଣକ ଉତ୍କ୍ଷିପ୍ତ ହୋଇ ମହିଳାଙ୍କ ଉପରେ ବିରକ୍ତ ହେବା ସହ କୁଆଡ଼େ ଚାପୁଡ଼ା ମାରିଥିଲେ! ଏହାକୁ ନେଇ ସମ୍ପୃକ୍ତ ମହିଳା ତୀବ୍ର ଅସନ୍ତୋଷ ପ୍ରକାଶ କରିଥିଲେ । ସମ୍ପୃକ୍ତ ମହିଳା କର୍ମୀଙ୍କୁ ଅନ୍ୟ ବରିଷ୍ଠ ନେତାମାନେ ବୁଝାସୁଝା କରିଥିଲେ । ପରେ ଏହି ଖବର ପ୍ରଚାର ହେବାରୁ ବିଜେପିର ଦୁଇଗୋଷ୍ଠୀ ମଧ୍ୟରେ ଛକାପଞ୍ଛା ଆରମ୍ଭ ହୋଇଛି । କେତେକ କର୍ମକର୍ତ୍ତା ଗଣମାଧ୍ୟମ ପ୍ରତିନିଧିଙ୍କୁ ଫୋନ୍ କରିବା ସହ ଏହି ଖବର ବାବଦରେ ଖୋଲାଖୋଲି ଆଲୋଚନା କରୁଛନ୍ତି ।
ଅପରପକ୍ଷେ ଏନେଇ ସମ୍ପୃକ୍ତ ନେତାଙ୍କ ମତାମତ ନେବାକୁ ଯୋଗାଯୋଗ ଉଦ୍ୟମ କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରିନାହିଁ । ତାଙ୍କର ଜଣେ ଦୃଢ଼ ସମର୍ଥକ କହିଛନ୍ତି, ଆମ ଦଳ ଗୋଟେ ପରିବାର ଭଳି ।ଦଳ ଭିତରେ ବିଭିନ୍ନ ସମୟରେ ଛୋଟବଡ଼ ଘଟଣା ଘଟୁଥାଏ । ପ୍ରଚାରର ମାତ୍ରା ତୁଳନାରେ ଏହି ଘଟଣାର ସେମିତି କିଛି ସତ୍ୟତା ବା ଗୁରୁତ୍ୱ ନାହିଁ । ରାଜନୈତିକ ଅଭିସନ୍ଧି ରଖି ଆମ ନେତାଙ୍କୁ ବଦନାମ କରିବାକୁ ତିଳକୁ ତାଳ କରି କିଏ ଯଦି କିଛି ପ୍ରଚାର କରୁଥାଏ, ଏହାର ବାସ୍ତବତା ଜନସାଧାରଣ ବିଚାର କରିବେ
