ଶ୍ରୀନଗର: ଦୀର୍ଘ ଦୁଇ ମାସ ଶୁଖିଲା ପଡ଼ିବା ପରେ ଏବେ କାଶ୍ମୀରରେ ବରଫପାତ ହୋଇଥିବା ଜଣାପଡ଼ିଛି । ବରଫ ଚାଦରରେ ଘୋଡ଼ାଇ ହୋଇଛି ଜାମ୍ମୁକାଶ୍ମୀର । ଆଉ ତାସହ ପର୍ଯ୍ୟଟକଙ୍କ ମୁହଁରେ ଖୁସି ଫେରିଆସିଛି । ଦୀର୍ଘ ଦିନ ଧରି ବରଫ ଉଭାନ ହୋଇଯିବା ଫଳରେ କାଶ୍ମୀର ପ୍ରତି ପର୍ଯ୍ୟଟକମାନେ ବିମୁଖ ହୋଇପଡ଼ିଥିଲେ । ହେଲେ ଏବେ କାଶ୍ମୀରର ପ୍ରମୁଖ ପର୍ଯ୍ୟଟନ ସ୍ଥଳଗୁଡ଼ିକ ବରଫରେ ଢ଼ାଙ୍କି ହୋଇଯାଇଛି । 

ଏହା ସହ ସ୍ଥାନୀୟ ପାଣିପାଗ ବିଭାଗ ମଧ୍ୟ ଭଲ ଖବର ଦେଇଛି । ଜାନୁଆରୀ ୩୧ ଏବଂ ଫେବୃଆରୀ ୧ରେ ପ୍ରବଳ ତୁଷାରପାତ ହେବାକୁ ଥିବା ବେଳେ ସ୍ଥାନେ ସ୍ଥାନେ ବର୍ଷା ମଧ୍ୟ ହୋଇପାରେ । ଦୀର୍ଘଦିନର ଶୁଖିଲା ସ୍ଥିତି ଯୋଗୁଁ ଚାଷୀମାନେ ମଧ୍ୟ ଚିନ୍ତାରେ ପଡ଼ିଯାଇଥିଲେ । ଏବେ ପୁଣି ଥରେ ବରଫପାତ ଆରମ୍ଭ ହୋଇଥିବା ବେଳେ ରବି ଫସଲ ପାଇଁ ଉପଯୋଗୀ ସାବ୍ୟସ୍ତ ହେବ ବୋଲି କୁହାଯାଉଛି ।

ବରଫ ଉଭାନ ହୋଇଯିବା ଫଳରେ ବିଶେଷ କରି ପର୍ଯ୍ୟଟନ ଶିଳ୍ପକୁ ପ୍ରଭାବିତ ହୋଇଥିଲା । ହେଲେ ଏବେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇଥିବା ଜଣାପଡ଼ିଛି । ଜାମ୍ମୁ, କାଶ୍ମୀର, ହିମାଚଳପ୍ରଦେଶ ଏବଂ ହିମାଳୟରେ ବରଫପାତ ହେବା ନେଇ ଖବର ଆସିବା ପରେ ଅଧିକରୁ ଅଧିକ ପର୍ଯ୍ୟଟକ ଏସବୁ ସ୍ଥାନକୁ ବୁଲିବାକୁ ଆସିବେ । 

ସେପଟେ ମନାଲି, ଡାଲହାଉସି, ସାଙ୍ଗଲା, ନର୍କନ୍ଦା ଏବଂ କୁଫ୍ରିରେ ମଧ୍ୟମ ଧରଣର ତୁଷାରପାତ ସାଙ୍ଗକୁ ବର୍ଷା ହୋଇଛି । ଏଥର ଶୀତଋୁତୁରେ ତୁଷାରପାତ ହୋଇନଥିବାରୁ ସ୍ଥାନୀୟ ପରିସଂସ୍ଥାନ ପ୍ରତି ବିପଦ ସୃଷ୍ଟି ହୋଇଥିଲା । ଜୀବନ ଜୀବିକା ବାଧାପ୍ରାପ୍ତ ହୋଇଥିଲା । ହେଲେ ଏବେ ସଦ୍ୟତମ ତୁଷାରପାତ ପୁଣି ଥରେ ସେଠାକର ଲୋକମାନଙ୍କ ଓଠରେ ହସ ଆଣିଦେଇଛି ।