ଉମରକୋଟ,୩୦/୧୧: ଜାତୀୟସ୍ତରୀୟ ଟିଭି ସୋ’ କୌନ୍ ବନେଗା କରୋଡ଼ପତିରେ ଭାଗନେଇ ୧୩ ଲକ୍ଷ ୪୦ ହଜାର ଟଙ୍କା ପୁରସ୍କାର ରାଶି ଜିତିଛନ୍ତି ଜଣେ ଛାତ୍ର । ସେ ହେଉଛନ୍ତି ନବରଙ୍ଗପୁର ଜିଲ୍ଲା ଉମରକୋଟ ଓଡ଼ିଶା ଆଦର୍ଶ ବିଦ୍ୟାଳୟର ଅଷ୍ଟମ ଶ୍ରେଣୀର ମେଧାବୀ ଛାତ୍ର ଶାଶ୍ୱତ ପଟ୍ଟନାୟକ । ବଲିଉଡ୍ ଜଗତର ମହାନାୟକ ଅମିତାଭ ବଚ୍ଚନଙ୍କ ସହ କୌନ୍ ବନେଗା କରୋଡ଼ପତିରେ ଶାଶ୍ୱତ ଭାଗନେଇ ଖେଳିବା ଜିଲ୍ଲା ପାଇଁ ଗର୍ବ ଓ ଗୌରବ ବିଷୟ । ଏହି ଖବର ପ୍ରଚାରିତ ହେବା ପରେ ଶାଶ୍ୱତ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି । ଗତମାସ ୨୭ ତାରିଖରୁ ଆରମ୍ଭ ହୋଇଥିବା କୌନ ବନେଗା କରୋଡ଼ପତି(କେବିସି) ଜୁନିଅର କାର୍ଯ୍ୟକ୍ରମରେ ଶାଶ୍ୱତ ଭାଗ ନେଇଥିଲେ । ୨୯ ତାରିଖରେ ସେ ହଟ୍ସିଟ୍ରେ ବସିଥିଲେ । ଶାଶ୍ୱତଙ୍କ ଖେଳ ଦେଖି ବିଗ୍-ବି ଅତ୍ୟନ୍ତ ମୁଗ୍ଧ ହୋଇଥିଲା ।
ଶ୍ୱାଶ୍ୱତ କହିଛନ୍ତି, ସିନେ ଜଗତର ମହାନାୟକ ଅମିତାଭ ବଚ୍ଚନଙ୍କୁ ଭେଟିବା ଏବଂ ତାଙ୍କ ସହ ଖେଳିବା ଜୀବନର ଏକ ନିଆରା ଅନୁଭୂତି । ପ୍ରତିଟି କ୍ଷେତ୍ରରେ ସର୍ବଦା ଚେଷ୍ଟା କଲେ ପ୍ରତ୍ୟେକ ଛାତ୍ରଛାତ୍ରୀ ସଫଳ ହୋଇପାରିବେ । ଶାଶ୍ୱତ ହେଉଛନ୍ତି ଉମରକାଟ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ବକୋଦାର ଭାରପ୍ରାପ୍ତ ପ୍ରଧାନଶିକ୍ଷକ ନରେଶ ଚନ୍ଦ୍ର ପଟ୍ଟନାୟକ ଓ ଝରିଗାଁ ମହାବିଦ୍ୟାଳୟ ଅର୍ଥନୀତି ବିଭାଗ ଅଧ୍ୟାପିକା ତୁଷାରୀ ପଟ୍ଟନାୟକଙ୍କ ପୁଅ ।
