ଭୁବନେଶ୍ୱର, ୩/୯: ଉତ୍କଳ ବିଶ୍ୱବିଦ୍ୟାଳୟର ବିକାଶରେ ପୁରାତନ ଛାତ୍ରଛାତ୍ରୀମାନେ ସାମିଲ ହେବା ସହିତ ନିଜର ସକ୍ଷମତା ଅନୁସାରେ ସହଯୋଗ କରିବାକୁ କୁଳପତି ପ୍ରଫେସର ସବିତା ଆଚାର୍ଯ୍ୟ ଆହ୍ବାନ କରିଛନ୍ତି।

        ଉତ୍କଳ ବିଶ୍ୱବିଦ୍ୟାଳୟ ପୁରାତନ ଛାତ୍ରସଂଘର ତୃତୀୟ ବାର୍ଷିକ ଉତ୍ସବ ଆଜି ବିଶ୍ବବିଦ୍ୟାଳୟ ପରିସରରେ ତିନୋଟି ପର୍ଯ୍ୟାୟରେ ଅନୁଷ୍ଠିତ ହୋଇଯାଇଛି। ପ୍ରଥମ ପର୍ଯ୍ୟାୟରେ ପୂର୍ବାହ୍ନରେ ବାଣୀବିହାର ପରିସରରେ ପୁରାତନ ଓ ଏବେ ଅଧ୍ୟୟନରତ ଛାତ୍ରଛାତ୍ରୀମାନଙ୍କୁ ନେଇ ଏକ ପରିମଳ ପଦଯାତ୍ରା " ସ୍ବଚ୍ଛ ଓ ପ୍ଲାଷ୍ଟିକ ମୁକ୍ତ କ୍ୟାମ୍ପସ" ଅନୁଷ୍ଠିତ ହୋଇଥିଲା। ଏଥିରେ ପାଞ୍ଚଶହରୁ ଊର୍ଦ୍ଧ୍ବ ଛାତ୍ରଛାତ୍ରୀ ଓ ପୁରାତନ ଛାତ୍ରଛାତ୍ରୀ ଅଂଶ ଗ୍ରହଣ କରିଥିଲେ।

     ଅପରାହ୍ଣ ଚାରିଟାରେ ପୁରାତନ ଛାତ୍ରସଂଘ ଯୁଗ୍ମ ସମ୍ପାଦକ ରଘୁନାଥ ପୃଷ୍ଟିଙ୍କ ସଞ୍ଚାଳନରେ ମହାରାଜା କୃଷ୍ଣଚନ୍ଦ୍ର ଗଜପତି ପ୍ରେକ୍ଷାଳୟରେ ଅନୁଷ୍ଠିତ ଦ୍ବିତୀୟ ପର୍ଯ୍ୟାୟ କାର୍ଯ୍ୟକ୍ରମରେ ଛାତ୍ରସଂଘ ଓ ବିଶ୍ବବିଦ୍ୟାଳୟର ବିକାଶ ସମ୍ପର୍କରେ ପୁରାତନ ଛାତ୍ରଛାତ୍ରୀମାନେ ନିଜର ମତ ଉପସ୍ଥାପନ କରିଥିଲେ। ପରେପରେ ଅନୁଷ୍ଠିତ ତୃତୀୟ ତଥା ମୁଖ୍ୟ ଉତ୍ସବରେ କୁଳପତି ପ୍ରଫେସର ସବିତା ଆଚାର୍ଯ୍ୟ ମୁଖ୍ୟ ଅତିଥି ଭାବେ ଯୋଗଦେଇ ବିଶ୍ୱବିଦ୍ୟାଳୟ ପକ୍ଷରୁ ଗ୍ରହଣ କରାଯାଇଥିବା ବିଭିନ୍ନ ପଦକ୍ଷେପ ସମ୍ପର୍କରେ ସୂଚନା ଦେଇଥିଲେ। ବିଶ୍ୱବିଦ୍ୟାଳୟର ବିକାଶରେ ପୁରାତନ ଛାତ୍ରଛାତ୍ରୀମାନେ ସାମିଲ ହେବା ସହିତ ନିଜର ସକ୍ଷମତା ଅନୁସାରେ ସହଯୋଗ କରିବାକୁ ଏହି ଅବସରରେ ସେ ଅନୁରୋଧ କରିଥିଲେ। ବିଶ୍ୱବିଦ୍ୟାଳୟ ସ୍ନାତକୋତ୍ତର ପରିଷଦ ଅଧ୍ୟକ୍ଷା ପ୍ରଫେସର ନବନୀତା ରଥ କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ଯୋଗଦେଇ ପୁରାତନ ଛାତ୍ରସଂଘର କାର୍ଯ୍ୟଧାରାକୁ ପ୍ରଶଂସା କରିଥିଲେ। ଛାତ୍ରସଂଘ ପକ୍ଷରୁ ଚାଲିଥିବା " ମିଟ୍ ଦ ଆଲୁମ୍ନି" କାର୍ଯ୍ୟକ୍ରମକୁ ଏଣିକି ସ୍ନାତକୋତ୍ତର ପରିଷଦ ପକ୍ଷରୁ ପ୍ରତି ମାସରେ କରାଯିବ ବୋଲି ସେ ଘୋଷଣା କରିଥିଲେ।

      ଏହି ଅବସରରେ ବିଶ୍ୱବିଦ୍ୟାଳୟର ପାଞ୍ଚଜଣ ପୁରାତନ ଛାତ୍ରଛାତ୍ରୀ, ବିଶିଷ୍ଟ ଗାୟକ ଦେବାଶିଷ ମହାପାତ୍ର, ସୁଗାୟିକା ପ୍ରଫେସର ମିତାଲି ଚିନାରା ଓ ଅନିନ୍ଦିତା ଦାସ, ବିଶିଷ୍ଟ ଲେଖିକା ଡକ୍ଟର ହିରଣ୍ମୟୀ ମିଶ୍ର ଏବଂ ବୈଜ୍ଞାନିକା ଡକ୍ଟର ମନୀଷା ଆଚାର୍ଯ୍ୟଙ୍କୁ ସେମାନଙ୍କର ଉଲ୍ଲେଖଯୋଗ୍ୟ କାର୍ଯ୍ୟ ପାଇଁ ସମ୍ବର୍ଦ୍ଧିତ କରାଯାଇଥିଲା। ବାଣୀବିହାରର ଅଧ୍ୟୟନରତ ଛାତ୍ରଛାତ୍ରୀମାନଙ୍କୁ ନେଇ ପୂର୍ବରୁ ଅନୁଷ୍ଠିତ ବିଭିନ୍ନ ପ୍ରତିଯୋଗିତାର କୃତି ଛାତ୍ରଛାତ୍ରୀଙ୍କୁ ପୁରସ୍କାର ପ୍ରଦାନ କରାଯିବା ସହିତ ଅନ୍ୟ କୃତି ଛାତ୍ରଛାତ୍ରୀଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା।

    ପୁରାତନ ଛାତ୍ରସଂଘ ସଭାପତି ଅବସରପ୍ରାପ୍ତ ଆଇଏଏସ୍ ଅଫିସର ଶ୍ରୀଯୁକ୍ତ ଦେବେନ୍ଦ୍ର ପ୍ରସାଦ ଦାସଙ୍କ ସଭାପତିତ୍ବରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମ୍ପାଦକ ପ୍ରଫେସର ଅଶୋକ ଦାସ ମଧ୍ୟ ଉଦବୋଧନ ଦେଇଥିଲେ। ପୁରାତନ ଛାତ୍ରସଂଘ କାର୍ଯ୍ୟନିର୍ବାହୀ କମିଟି ସଦସ୍ୟ ଡକ୍ଟର ପ୍ରଦୀପ ରଥଙ୍କ ସଞ୍ଚାଳନରେ ଅନୁଷ୍ଠିତ ଏହି ଉତ୍ସବ ଶେଷରେ ଯୁଗ୍ମ ସମ୍ପାଦକ ରଘୁନାଥ ପୃଷ୍ଟି ଧନ୍ୟବାଦ ଅର୍ପଣ କରିଥିଲେ। କାର୍ଯ୍ୟକ୍ରମରେ ବହୁ ପୁରାତନ ଛାତ୍ରଛାତ୍ରୀ ଯୋଗ ଦେଇଥିଲେ।