କାଶୀପୁର, ୦୭/୦୯ : ଗରିବ ଶିଶୁର ଚିକିତ୍ସାରେ ସହାୟତାର ହାତ ବଢାଇ ମାନବିକତାର ପରିଚୟ ଦେଲେ କାଶୀପୁର ବ୍ଲକ ସଦର ବାସିନ୍ଦା ମିଥୁନ। କାଶୀପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଠାରୁ କୋରାପୁଟ ଡାକ୍ତରଖାନାକୁ ସ୍ଥାନାନ୍ତର କରାଯାଉଥିବା ଜଣେ ପୀଡିତ ଶିଶୁଙ୍କ ପାଇଁ ସେ ଆମ୍ବୁଲାନ୍ସ ଭଡ଼ା ଦେଇ ସହାୟତା କରିଛନ୍ତି । 

କାଶୀପୁର ବ୍ଲକ ଅନ୍ତର୍ଗତ ମାଣ୍ଡିବିଶି ପଞ୍ଚାୟତ ସଦର ବାସିନ୍ଦା (ମୃତ)ଡାବୁ ମାଝୀଙ୍କ ଝିଅ ପଶ୍ମିତା ମାଝି(୧୩)ଙ୍କ ସ୍ୱାସ୍ଥ୍ୟାବସ୍ଥା ଖରାପ ଥିଲା। ବିଧବା ମାଆ କାଶୀପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ। କିନ୍ତୁ ଶିଶୁଟିର ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ଡାକ୍ତର ତାଙ୍କୁ କୋରାପୁଟ ଡାକ୍ତରଖାନାକୁ ସ୍ଥାନାନ୍ତର ପାଇଁ ପରାମର୍ଶ ଦେଇଥିଲେ । ସିଏଚସି ସରକାରୀ ଆମ୍ବୁଲାନ୍ସ  ନଥିବାରୁ ପ୍ରାଇଭେଟ ଆମ୍ବୁଲାନ୍ସ କୁ ଭଡ଼ାକରି ପିଡିତାକୁ କୋରାପୁଟ ନେବାରେ ପରିବାର ଲୋକେ ଅଡୁଆରେ ପଡ଼ିଥିଲେ। ଗରିବ ଶିଶୁଟିକୁ କୋରାପୁଟ ନେବାରେ ଆର୍ଥିକ ପ୍ରତିବନ୍ଧକ ସାଜିଥିବା ଖବର ପାଇ ସ୍ୱେଚ୍ଛାସେବୀ ଯୁବକ ମିଥୁନ ନାଏକ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚି ଆମ୍ବୁଲାନ୍ସ ର ସୁବିଧା କରି ଥିଲେ। ମିଥୁନଙ୍କ ବଦନ୍ୟତାକୁ ସାଧାରଣରେ ପ୍ରଶଂସା କରାଯାଉଛି । ପୂର୍ବରୁ ସେ ବହୁବାର ଲୋକଙ୍କୁ ସାହାଯ୍ୟ କରିଛନ୍ତି ।