କଟକ, ୨୫।୯: ନାଲ୍‌କୋ ରେଲ୍‌ୱେ ସାଇଡିଂ ପାଇଁ କରାଯାଉଥିବା ଜମି ଅଧିଗ୍ରହଣକୁ ବିରୋଧ କରି ରୁଜୁ ମାମଲାରେ ହାଇକୋର୍ଟ ରାଜ୍ୟ ସରକାର ଏବଂ ନାଲ୍‌କୋକୁ ଜବାବ ଦାଖଲ ଲାଗି ନୋଟିସ୍‌ ଜାରି କରିଛନ୍ତି । ନରେନ୍ଦ୍ର କୁମାର ବିଶ୍ୱାଳ ଏବଂ ଅନ୍ୟମାନଙ୍କ ପକ୍ଷରୁ ରୁଜୁ ମାମଲାର ଶୁଣାଣି କରି ହାଇକୋର୍ଟର ବିଚାରପତି ଜଷ୍ଟିସ୍‌ ସଙ୍ଗମ କୁମାର ସାହୁ ଏବଂ ଜଷ୍ଟିସ୍‌ ଚିତ୍ତରଞ୍ଜନ ଦାଶଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି । ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୨୮କୁ ଧାର୍ଯ୍ୟ ହୋଇଛି । 

ମାମଲାରୁ ଜଣାଯାଇଛି ଯେ, ୨୦୦୬ ମସିହାରେ ରାଜ୍ୟ ସରକାର ଅନୁଗୁଳ ଜିଲ୍ଲା ଗୋଳାବନ୍ଧ ଅଞ୍ଚଳରେ କଳିଙ୍ଗ କୋଲସ୍‌ ମାଇନିଂ ପ୍ରାଇଭେଟ୍‌ ଲିମିଟେଡ୍‌ ପାଇଁ ୧୯ ଏକର ଜମି ଅଧିଗ୍ରହଣ କରିଥିଲେ । କିନ୍ତୁ ୨୦୨୩ ପର୍ଯ୍ୟନ୍ତ ଏହି ଜମି କାମରେ ନଲାଗି ପଡ଼ି ରହିଥିଲା । ଚଳିତବର୍ଷ ରାଜ୍ୟ ସରକାର ଏହି ଜମିକୁ ନାଲ୍‌କୋକୁ ଦେବାଲାଗି ନିଷ୍ପତ୍ତି ନେଇଥିଲେ । ଏହାକୁ ବିରୋଧ କରି ଆବେଦନକାରୀମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । ଆବେଦନକାରୀଙ୍କ କହିବା କଥା ୨୦୧୩ ମସିହା ସଂଶୋଧିତ ଆଇନ ଅନୁସାରେ ଆବେଦନକାରୀମାନେ କ୍ଷତିପୂରଣ ପାଇନାହାନ୍ତି । ଆବେଦନକାରୀଙ୍କ ପକ୍ଷରୁ ଆଇନଜୀବୀ ତ୍ରିଲୋଚନ ବାରିକ ମାମଲା ପରିଚାଳନା କରୁଛନ୍ତି ।