ନୂଆଦିଲ୍ଲୀ: ବହୁ ଚର୍ଚ୍ଚିତ ରେଣୁକାସ୍ବାମୀ ହତ୍ୟା ମାମଲାରେ ଚାର୍ଜସିଟ୍‌ ଦାଖଲ କରିଛି ବେଙ୍ଗାଲୁରୁ ପୋଲିସ । ଅଭିନେତା ଦର୍ଶନ ଥୁଗୁଦୀପା ପୋଷାକରୁ ଏବଂ ପବିତ୍ରା ଗୌଡାଙ୍କ ଜୋତାରୁ ରକ୍ତର ଦାଗ ମିଳିଥିବା ଚାର୍ଜସିଟରେ ଦର୍ଶାଇଛି ପୋଲିସ । ପ୍ରତ୍ୟେକ୍ଷଦର୍ଶୀ ସମେତ ୨୩୦ ପ୍ରମାଣକୁ ଆଧାର କରି ପ୍ରସ୍ତୁତ ହୋଇଥିବା ଏହି ଚାର୍ଜସିଟ୍‌କୁ ପୋଲିସ ବୁଧବାର ବେଙ୍ଗାଲୁରୁର ଏକ କୋର୍ଟରେ ଦାଖଲ କରିଛି । ୩୩ ବର୍ଷୀୟ ରେଣୁକାସ୍ବାମୀଙ୍କ ହତ୍ୟା ମାମଲାରେ ଗତ ଜୁନ୍‌ ୧୧ରେ ଦର୍ଶନ ଥୁଗୁଦୀପାଙ୍କୁ ଗିରଫ କରାଯାଇଥିଲା । ଦର୍ଶନଙ୍କ ପ୍ରଶଂସକ ରେଣୁକାସ୍ବାମୀ ଅଭିନେତାଙ୍କ ସହଅଭିନେତ୍ରୀ ଏବଂ ବନ୍ଧୁ ପବିତ୍ରା ଗୌଡାଙ୍କୁ ଅଶ୍ଳୀଳ ଭିଡିଓ ପଠାଉଥିଲେ । ତାଙ୍କୁ ମଧ୍ୟ ଏହି ମାମଲାରେ ପୋଲିସ ଗିରଫ କରିଥିଲା । 

 ଆଜି କୋର୍ଟରେ ଦାଖଲ ହୋଇଥିବା ଚାର୍ଜସିଟ୍‌ରେ ପୋଲିସ ଫରେନ୍ସିକ ରିପୋର୍ଟ, ଅଭିନେତା ଓ ଅଭିନେତ୍ରୀଙ୍କ ପୋଷାକ ଓ ଜୋତାରେ ଲାଗିଥିବା ରକ୍ତର ଦାଗ ସଂପର୍କରେ ଉଲ୍ଲେଖ କରିଛି । ଏଥିରେ ଘଟଣାସ୍ଥଳର ଏକ ଫଟୋ ମଧ୍ୟ ଦିଆଯାଇଛି । ସେପଟେ ରେଣୁକାସ୍ବାମୀଙ୍କ ପୋଷ୍ଟମର୍ଟମ ରିପୋର୍ଟରୁ ଜଣାପଡ଼ିଥିଲା ଯେ, ତାଙ୍କୁ ନୃଶଂସ ଭାବେ ପିଟି ପିଟି ହତ୍ୟା କରାଯାଇଥିଲା । ଏପରିକି ତାଙ୍କୁ ମାରିବା ଲାଗି ବିଜୁଳୀ ଝଟ୍‌କା ଦିଆଯାଇଥିଲା । 

ତାଙ୍କ ଶରୀରରେ ଗଭୀର କ୍ଷତ ଚିହ୍ନ ଥିବା ବେଳେ ତାଙ୍କ ଶରୀରରୁ ଗୋଟିଏ କାନ ଏବଂ ଟେଷ୍ଟିକିଲ୍‌ (ଅଣ୍ଡକୋଷ) ଗାଏବ ଥିଲା । ତେବେ ରେଣୁକାସ୍ବାମୀ ହତ୍ୟା ମାମଲାରେ ଦର୍ଶନ ଓ ପିବତ୍ରାଙ୍କ ବ୍ୟତୀତ ଅନ୍ୟ ୧୫ ଜଣଙ୍କୁ ପୋଲିସ ଗିରଫ କରିଥିଲା । ସେପଟେ ଅଭିନେତା ଦର୍ଶନଙ୍କୁ ସେପ୍ଟମ୍ବର ୯ ଯାଏଁ ବିଚାର ବିଭାଗୀୟ ହାଜତକୁ ପଠାଯାଇଥିବା ଜଣାପଡ଼ିଛି ।