ନୂଆଦିଲ୍ଲୀ : ଗୌତମ ଅଦାନୀଙ୍କ ମାଲିକାନାର ଅଦାନୀ ଗ୍ରୁପ ଚୀନ୍‌ରେ ମଧ୍ୟ ପହଞ୍ଚି ଯାଇଛି। ଏହି ପଡୋଶୀ ଦେଶରେ ନିଜର ବ୍ୟବସାୟ ବିସ୍ତାର କରିବା ପାଇଁ ଅଦାନୀ ଗ୍ରୁପ ଏକ ସବ୍ସିଡିଆରୀ କମ୍ପାନୀର ରେଜିଷ୍ଟ୍ରେସନ ସେଠାରେ କରାଇଛି। ଏହାସହ ଏବେ ଚୀନ୍‌ରେ ମଧ୍ୟ ଅଦାନୀ ଗ୍ରୁପ୍‌ ନିଜର ମୂଳକୁ ବିସ୍ତାର କରିବା ଆରମ୍ଭ କରିବ। ଅଦାନୀ ଇଣ୍ଟରପ୍ରାଇଜେସ୍‌ର ସବ୍ସିଡିଆରୀ ଅଦାନୀ ଗ୍ଲୋବାଲ ପିଟିଇ , ସିଙ୍ଗାପୁର ମାଧ୍ୟମରେ ଏହି କାମ କରାଯାଇଛି। 

ଏକ ରେଗୁଲେଟରୀ ଫାଇଲିଂ ଅନୁସାରେ , ଅଦାନୀ ଗ୍ରୁପ୍‌ ଚୀନ୍‌ରେ ସପ୍ଲାଇ ଚେନ୍‌ ସଲ୍ୟୁସନ୍ସ ଓ ପ୍ରୋଜେକ୍ଟ ମ୍ୟାନେଜମେଣ୍ଟ ମାଧ୍ୟମରେ ନିଜର କାମ ଆରମ୍ଭ କରିବାର ପ୍ଲାନ କରିଛି। ଅଦାନୀ ଏଣ୍ଟରପ୍ରାଇଜେସ୍‌  ଫାଇଲିଂରେ କହିଛି କି, ସିଙ୍ଗାପୁର ସ୍ଥିତ ଏକ ଷ୍ଟେପ୍‌-ଡାଉନ୍‌  ସହାୟକ କମ୍ପାନୀ ଅଦାନୀ ଗ୍ଲୋବାଲ ପିଟିଇ ୨ ସେପ୍ଟେମ୍ୱର, ୨୦୨୪ ରେ ଅଦାନୀ ଏନର୍ଜି ରିସୋର୍ସେଜ୍‌ ସାଂଘାଇର ସ୍ଥାପନା କରିଛି। ସାଂଘାଇ ସ୍ଥିତ କମ୍ପାନୀର ପୂର୍ଣ୍ଣ ମାଲିକାନାର ଅଦାନୀ ଗ୍ଲୋବାଲ ପିଟିଇ ପାଖରେ ରହିବ। ଅଦାନୀ ଗ୍ରୁପ୍‌ ବର୍ତ୍ତମାନ ଏହି ବିବରଣୀ ଦେଇ ନାହିଁ କି ଏହି କମ୍ପାନୀ ବାସ୍ତବରେ କାହିଁକି ଖୋଲା ଯାଇଛି। 

ଉଲ୍ଲେଖନୀୟ ଯେ, ଅଦାନୀ ଏଣ୍ଟରପ୍ରାଇଜେସ୍‌ ଅନ୍ତର୍ଗତ ଅଦାନୀ ଗ୍ରୁପ୍‌ର ମାଇନିଂ , ରୋଡ୍‌, ଏୟାରପୋର୍ଟ, ଡାଟା ସେଣ୍ଟର ଓ ୱାଟର ଇନଫ୍ରାଷ୍ଟ୍ରକଚର ବିଜନେସ୍‌ ଆସିଥାଏ। ଫାଇଲିଂରେ କୁହାଯାଇଛି କି ଅଦାନୀ ଏନର୍ଜି ରିସୋର୍ସେସ ସାଂଘାଇକୁ ୨ ସେପ୍ଟେମ୍ୱର, ୨୦୨୪ରେ ପିପୁଲ୍ସ ରିପବ୍ଲିକ୍‌ ଅଫ୍‌ ଚାଇନାର କମ୍ପାନୀ ଲ’ ଅନୁସାରେ ରେଜିଷ୍ଟର କରାଯାଇଛି। ଏହି କମ୍ପାନୀ ଏବେସୁଦ୍ଧା ସେଠାରେ ନିଜର ବ୍ୟବସାୟ ଆରମ୍ଭ କରି ନାହିଁ। ହେଲେ ଏମିତି କୁହାଯାଉଛି କି, ଅଦାନୀ ଏଣ୍ଟରପ୍ରାଇଜେସ୍‌ ଖୁବ୍‌ ଶୀଘ୍ର ହିଁ ସେଠାରେ ବଡ଼ କଣ୍ଟାକ୍ଟ ହାସଲ କରିବା ପାଇଁ ପ୍ରୟାସ ଆରମ୍ଭ କରିଦେଇଛି।