ଦାରିଙ୍ଗବାଡ଼ି,୧୦/୫ : ବର୍ତ୍ତମାନ ଗ୍ରୀଷ୍ମ ପ୍ରବାହ ଚାଲିଥିବାବେଳେ ଜଙ୍ଗଲରେ ଲାଗୁଛି ନିଆଁ । ବନ ବିଭାଗର ବାରମ୍ବାର ସଚେତନତା କରିବା ସତ୍ତ୍ୱେ କିଛି ଅସାମାଜିକ ବ୍ୟକ୍ତି ଜଙ୍ଗଲରେ ନିଆଁ ଲଗାଇ ଦେଉଛନ୍ତି । ଗୁରୁବାର ଅପରାହ୍ନ ସମୟରେ ଜଙ୍ଗଲରେ ନିଆଁ ଲଗାଇବାବେଳେ ବନ ବିଭାଗ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ବ୍ୟକ୍ତି ଜଣଙ୍କ ହେଲେ ପର୍ତମାହା ପଞ୍ଚାୟତ ଯୁଗାବାଡ଼ି ଗ୍ରାମର ରଞ୍ଜିତ ପ୍ରଧାନ ।
ସେ ପକାରି ସଂରକ୍ଷିତ ଜଙ୍ଗଲ ମଧ୍ୟରେ ଗୁରୁବାର ଅପରାହ୍ନ ସମୟରେ ନିଆଁ ଲଗାଇବାବେଳେ ବନ ବିଭାଗ ଜାଣି ପାରି ଏସିଏଫ୍ ତଥା ଦାରିଙ୍ଗବାଡି ବନାଞ୍ଚଳ ଅଧିକାରୀ ସତିଶ ଧାରୁଆଙ୍କ ନିର୍ଦ୍ଦେଶକ୍ରମେ ବନପାଳ ରବିମୋହନ ନାୟକ, ବନରକ୍ଷୀ ବିଜୟାନନ୍ଦ ସେଠୀ, ରୁପିଙ୍ଗା ମଲିକ, ଶଙ୍କର ମାଳବିଷୋୟୀ ଓ ସ୍କ୍ୱାର୍ଡ ଟିମ୍ ପ୍ରମୁଖ ଚଢଉ କରି ରଞ୍ଜିତ ପ୍ରଧାନଙ୍କୁ ଗିରଫ କରିବାରେ ସଫଳ ହୋଇଥିଲେ । ବନ ବିଭାଗ ଏ ନେଇ ଏକ ମାମଲା କେଶ ନଂ୧୬/୨୪ରେ ରୁଜୁ କରି ଘଟଣାର ଅଧିକ ତଦନ୍ତ କରୁଛି ।
