ଭୁବନେଶ୍ୱର, ୨୯/୦୯: ଭରତପୁର ଥାନାରେ ହଙ୍ଗାମା ମାମଲାରେ ନିଲମ୍ୱିତ ଆଇଆଇସି ଦୀନକୃଷ୍ଣ ମିଶ୍ରଙ୍କ ସମେତ ୫ ପୁଲିସ ଅଧିକାରୀଙ୍କର ହେବ ପଲିଗ୍ରାଫ ଟେଷ୍ଟ୍‌ । ୫ ପୁଲିସ ଅଧିକାରୀଙ୍କୁ ଧରି ରବିବାର କ୍ରାଇମବ୍ରାଞ୍ଚ ଟିମ୍‌ ଗୁଜୁରାଟ ଯିବ । ସୋମବାର ନିଲମ୍ବିତ ଥାନା ଅଧିକାରୀ ଦୀନକୃଷ୍ଣ ମିଶ୍ରଙ୍କର ପଲିଗ୍ରାଫ, ବ୍ରେନ୍‌ ମ୍ୟାପିଂ  ଓ ନାର୍କୋ ଟେଷ୍ଟ କରାଯିବ । ଏଥିସହ ଅନ୍ୟ ୪ଜଣ ପୁଲିସ ଅଧିକାରୀଙ୍କର ମଧ୍ୟ  ପଲିଗ୍ରାଫ ଟେଷ୍ଟ୍‌ କରାଯିବ । ଟେଷ୍ଟ ରିପୋର୍ଟ ଆସିବା ପରେ ପୁଲିସ କେତେ ସତ  କହୁଛି ତାହା ଉପରୁ ପରଦା ହଟିବ ବୋଲି କ୍ରାଇମ୍‌ବ୍ରାଞ୍ଚ ପକ୍ଷରୁ କୁହାଯାଇଛି । ପୂର୍ବରୁ  ନିଲମ୍ୱିତ ଆଇଆଇସି ଦୀନକୃଷ୍ଣ ମିଶ୍ରଙ୍କ  ପଲିଗ୍ରାଫ, ବ୍ରେନ୍‌ ମ୍ୟାପିଂ ଓ ନାର୍କୋ ଟେଷ୍ଟ  ନିମନ୍ତେ ଭୁବନେଶ୍ୱର ଏସ୍‌ଡିଜେଏମ୍‌ କୋର୍ଟ  ଅନୁମତି ପ୍ରଦାନ କରି ସାରିଛନ୍ତି । 

ଏହାପରେ ଅନ୍ୟ ୪ ଜଣ ପୁଲିସ ଅଧିକାରୀଙ୍କ  ପଲିଗ୍ରାଫ ଟେଷ୍ଟ ନିମନ୍ତେ ଶୁକ୍ରବାର କ୍ରାଇମବ୍ରାଞ୍ଚ ପକ୍ଷରୁ କୋର୍ଟରେ ଆବେଦନ  ହୋଇଥିଲା। କୋର୍ଟ କ୍ରାଇମ୍‌ବ୍ରାଞ୍ଚକୁ ଅନୁମତି ପ୍ରଦାନ କରିଛନ୍ତି ।  ଏହି ୪ ପୁଲିସ ଅଧିକାରୀଙ୍କ ମଧ୍ୟରେ ରହିଛନ୍ତି ନିଲମ୍ୱିତ ହୋଇଥିବା ଜଣେ ମହିଳା ସବ୍‌-ଇନ୍ସପେକ୍ଟର ଓ ୨ ମହିଳା ଆସିଷ୍ଟାଣ୍ଟ୍‌ ସବ୍‌ ଇନ୍ସପେକ୍ଟର । ଏମାନଙ୍କ ସହିତ ସେଦିନ  ଉପସ୍ଥିତ ଆଉ ଜଣେ ସବ୍‌ ଇନ୍ସପେକ୍ଟରଙ୍କର ମଧ୍ୟ ପଲିଗ୍ରାଫ ଟେଷ୍ଟ ହେବ । ଏହି ଘଟଣାର  କେହି ପ୍ରତ୍ୟକ୍ଷଦର୍ଶୀ ନ ଥିବାରୁ ଏହି ଏସ୍‌ଆଇଙ୍କୁ ଘଟଣାର ପ୍ରତ୍ୟକ୍ଷଦର୍ଶୀ ତଥା ସାକ୍ଷୀ ଭାବେ ଗ୍ରହଣ କରାଯାଇଛି । କିନ୍ତୁ ନିଲମ୍ୱିତ କନଷ୍ଟେବଳଙ୍କର କୌଣସି ଟେଷ୍ଟ କରାଯିବ ନାହିଁ ।  ପଲିଗ୍ରାଫ୍‌ ଟେଷ୍ଟ୍‌ ରିପୋର୍ଟ ଆସିବା ପରେ ପୁଲିସ ସତ କହୁଛି କି ମିଛ କାହାଣୀ ବନାଇଛି,  ତାହା ସ୍ପଷ୍ଟ ହେବ । ସେପଟେ କ୍ୟାପ୍‌ଟେନଙ୍କ ବାନ୍ଧବୀଙ୍କର ମଧ୍ୟ ଲାଇ ଡିଟେକ୍ସନ୍‌ ଟେଷ୍ଟ,  ପଲିଗ୍ରାଫ ଓ ନାର୍କୋ ଆନାଲିସିସ ପାଇଁ କୋର୍ଟରେ ଆବଦନ କରିପାରେ କ୍ରାଇମ୍‌ବ୍ରାଞ୍ଚ ।