ଚନ୍ଦ୍ରଶେଖରପୁର,୦୯/୦୯: ସୈନିକ ସ୍କୁଲ ନିକଟ ଡମ୍ପିଂୟାର୍ଡ ହଟାଇବାକୁ ହଙ୍ଗାମା ଠିଆ କଲା ବିଜେପି । ରାଜ୍ୟର ସବୁ ବଡ଼ନେତା ସେଠାକୁ ଧାଇଁଲେ । ଜୋରଦାର ବିରୋଧ କରି କହିଲେ ତୁରନ୍ତ ଡମ୍ପିଂୟାର୍ଡ ଉଠାଅ । ନିର୍ବାଚନ ସମୟରେ ଲୋକଙ୍କୁ ପାଖକୁ ଧାଇଁ ପ୍ରତିଶ୍ରୁତି ମଧ୍ୟ ଦେଲେ । କହିଲେ ଆମକୁ ଭୋଟ୍ ଦିଅ ଆମେ ଶାସନକୁ ଆସିଲେ ଡମ୍ପିଂୟାର୍ଡ ଉଠାଇବୁ । ହେଲେ ନିର୍ବାଚନ ଜିତିଲା ପରେ ଏବେ ସବୁ ନିରବ । ଆଉ କେହି ଏ ପ୍ରସଙ୍ଗରେ ଆଲୋଚନା କରୁନାହାଁନ୍ତି ।
ରାଜଧାନୀରେ ବର୍ଷା ହେଲେ ଟିଟିଏସ୍କୁ ନେଇ ଚିନ୍ତାରେ ପଡ଼ନ୍ତି ସ୍ଥାନୀୟ ବାସିନ୍ଦା । ଲୋକେ ଅଭିଯୋଗ କରନ୍ତି ଦୀର୍ଘ ବର୍ଷ ଧରି ଏହି ସମସ୍ୟା ଲାଗି ରହିଥିଲେ ମଧ୍ୟ ସରକାର ଏହାର ସ୍ଥାୟୀ ସମାଧାନ କରୁନାହାନ୍ତି । ପୂର୍ବ ସରକାର ତ ଏଥିପ୍ରତି କର୍ଣ୍ଣପାତ କରୁନଥିଲେ । ବିଜେପି ଗତ ବର୍ଷ ନଭେମ୍ବରରେ ୧୫ ଦିନ ସୈନିକ ସ୍କୁଲ ନିକଟରେ ସତ୍ୟାଗ୍ରହ କରିଥିଲା । ବିଜେପିର ବଡ଼ ବଡ଼ ନେତା ସହ ଖୋଦ୍ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଡମ୍ପିଂୟାର୍ଡ ପରିଦର୍ଶନ କରି ବିଏମ୍ସି ଉପରେ ବର୍ଷିବା ସହ ସ୍ଥାନାନ୍ତର ପାଇଁ ଦାବି କରିଥିଲେ । ବିଜେପି ଶାସନକୁ ଆସିଲେ ସ୍ଥାନାନ୍ତର କରିବ ବୋଲି ସମସ୍ତେ କହିଥିଲେ । ହେଲେ ନିର୍ବାଚନ ଜିତି ସରକାରକୁ ଆସିବା ପରେ ଏବେ ପୁରା ନୀରବ ଥିବାରୁ ଡମ୍ପିଂୟାର୍ଡ ସମସ୍ୟା ସମାଧାନ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ନୂଆ ସରକାର ପ୍ରତିଶ୍ରୁତି ପାଳନ କରି ତୁରନ୍ତ ଡମ୍ପିଂୟାର୍ଡ ହଟାଇବାକୁ ପଦକ୍ଷେପ ନେଉ ବୋଲି ଲୋକେ ଦାବି କରିଛନ୍ତି ।
ଅନ୍ୟପଟେ ଗତ ୩ ତାରିଖରେ ଏହି ପ୍ରସଙ୍ଗରେ ବିଧାନସଭାରେ ବିଧାୟକ ତାରା ପ୍ରସାଦ ବାହିନୀପତିଙ୍କ ପ୍ରଶ୍ନରେ ଗୃହ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର କହିଥିଲେ ଯେ ୱିଣ୍ଡୋ ପଦ୍ଧତି ମାଧ୍ୟମରେ ଲାଇନ୍ ଟ୍ରୋମେଲ୍ ମେସିନ୍ ଓ ଅନ୍ୟ ଯାନ୍ତ୍ରିକ ଉପକରଣରେ ଦୈନିକ ବର୍ଜ୍ୟବସ୍ତୁକୁ ପ୍ରକ୍ରିୟାକରଣ କରାଯାଉଛି । ବର୍ଜ୍ୟବସ୍ତୁରୁ ବାହାରୁଥିବା ଗୁଡ୍ଆର୍ଥକୁ ମହାନଗର ନିଗମ ଅଞ୍ଚଳର ଲୋ ଲେନ୍ ଏରିଆରେ ପକାଯାଉଛି । ନନ୍ ରିସାଇକେବୁଲ ବର୍ଜ୍ୟ ବସ୍ତୁକୁ ରାଇରଙ୍ଗପୁର ସିମେଣ୍ଟ କାରଖାନାକୁ ପଠାଯାଉଛି । ହେଲେ ସ୍ଥାନାନ୍ତର ପ୍ରସଙ୍ଗରେ କୌଣସି ଉତ୍ତର ରଖିନଥିଲେ ।
ବିଏମ୍ସିର ୬୭ଟି ୱାର୍ଡରୁ ଦୈନିକ ପ୍ରାୟ ୮୦୦ ଟନ୍ ବର୍ଜ୍ୟ ବାହାରୁଛି । ଏଥିରୁ ୩୮୪ ଟନ୍ ଓଦା ବର୍ଜ୍ୟ ବାହାରୁଥିବାବେଳେ ୪୧୬ ଟନ୍ ଉଭୟ ଓଦା ଓ ଶୁଖୁଲା ମିଶ୍ରିତ ବର୍ଜ୍ୟ ବାହାରୁଛି । ଟିଟିଏସ୍ ଭିତରକୁ ଦୈନିକ ପ୍ରାୟ ୫୦୦ ଟନ୍ ବର୍ଜ୍ୟ ଯାଉଛି । ଟିଟିଏସ୍ରେ ଟେରେକ୍ସ ଓ ଟ୍ରମେଲ ମେସିନ୍ ବ୍ୟବହାର କରି ବର୍ଜ୍ୟ ପୃଥକୀକରଣ ସହିତ ପ୍ରକ୍ରିୟାକରଣ କରାଯାଉଛି । ଆଗରୁ ପାହାଡ଼ ଭଳି ଗଦା ହୋଇଥିବା ଡମ୍ପିଂୟାର୍ଡର ଉଚ୍ଚତା ଏବେ ପୂରା କମିଯାଇଛି । କିନ୍ତୁ ବର୍ଷା ଦିନେ ଟିଟିଏସ୍ରୁ ପ୍ରବଳ ଦୁର୍ଗନ୍ଧ ବାହାରୁଥିବାରୁ ଏହାକୁ ନେଇ ଲୋକେ ଚିନ୍ତାରେ ପଡ଼ିଛନ୍ତି । ଏହାର ସ୍ଥାୟୀ ସମାଧାନ କରିବାକୁ ଦାବି କରିଛନ୍ତି ।
ଏନେଇ ସ୍ଥାନୀୟ ବାସିନ୍ଦା ରମାକାନ୍ତ ସାମଲ କହିଛନ୍ତି, ପୂର୍ବରୁ ବର୍ଷାଦିନେ ଟିଟିଏସ୍ ଗନ୍ଧରେ ଘରେ ରହି ହୁଏନି । ବିଜେଡି ସରକାର ଥିବା ସମୟରେ ଡମ୍ପିଂୟାର୍ଡ ହଟାଇବାକୁ ବିଜେପି ଧାରଣାରେ ବସିଥିଲା । ଏବେ ରାଜ୍ୟରେ ବିଜେପି ସରକାର ଆସଥିବାରୁ ଏହା ହଟିବ ବୋଲି ଆଶା ରହିଛି । ସମାଜସେବୀ ପ୍ରିୟମ୍ବଦା କିସ୍କୁ କହିଛନ୍ତି, ସରକାର ଚାହିଁଲେ ଏହାକୁ ସହର ବାହାରକୁ ସ୍ଥାନାନ୍ତର କରିପାରିବେ । କିନ୍ତୁ ସରକାର ସୈନିକ ସ୍କୁଲ କଥା ଭୁଲିଗଲେଣି । ଆମକୁ କେବଳ ଭଗବାନ ଭରସା ।
