ଚନ୍ଦନେଶ୍ୱର/ପାରାଦୀପ,୧୧/୧୧: କୋଲକାତା ବାବୁଘାଟରୁ ପାରାଦୀପ ଅଭିମୁଖେ ଆସୁଥିବା ଏକ ଯାତ୍ରୀବାହୀ ବସ୍ରେ ଅଗ୍ନିକାଣ୍ଡ ଘଟିଛି । ବସ୍ଟି କୋଲକାତାରୁ ପ୍ରାୟ ୧୫୦ କିଲୋମିଟର ଆସିବା ପରେ ଖଡ଼ଗପୁର ନିକଟ ଡେବରାରେ ହଠାତ୍ ଏଥିରେ ନିଆଁ ଲାଗି ଯାଇଥିଲା । ରାସ୍ତା ଉପରେ ହୁ ହୁ ହୋଇ ଜଳିଥିଲା ବସ୍ । ସଟ୍ସର୍କିଟ୍ରୁ ଏହି ଅଘଟଣ ଘଟିଥିବା କୁହାଯାଉଥିବା ବେଳେ ବସ୍ରେ ଥିବା ବାଣରେ ଅଗ୍ନି ସଂଯୋଗ ହେବାରୁ ବିସ୍ଫୋରଣ ଘଟି ଭୟାବହ ରୂପ ନେଇଥିବା ପ୍ରାଥମିକ ସୂତ୍ରରୁ ଜଣାପଡ଼ିଛି । ଏଥିରେ ଜଣେ ମହିଳାଙ୍କ ମୃତ୍ୟୁଘଟଥିବା ବେଳେ ପ୍ରାୟ ୩୯ ଜଣ ଯାତ୍ରୀ ଆହତ ହୋଇଥିବା ଜଣାପଡ଼ିଛି । ସେମାନଙ୍କୁ ପଶ୍ଚିମବଙ୍ଗର ମେଦିନୀପୁର ଡାକ୍ତରଖାନାରେ ଭର୍ତ୍ତି କରାଯାଇଛି । ଦୁର୍ଘଟଣା ପରେ ବସ୍ର ଡ୍ରାଇଭର୍ ଓ ହେଲ୍ପର୍ ଫେରାର ହୋଇଯାଇଛନ୍ତି ।
ସୂତନା ଅନୁସାରେ, ‘ଶିବମ୍ ଟ୍ରାଭେଲ୍ସ’ ନାମକ ଏହି ଘରୋଇ ବସ୍ ଶୁକ୍ରବାର ସନ୍ଧ୍ୟା ପ୍ରାୟ ୫ଟାରେ କୋଲକାତାର ବାବୁଘାଟରୁ ବାହାରିଥିଲା । ରାତି ପ୍ରାୟ ୯ଟା ବେଳେ ଏହା ଖଡ଼ଗପୁର ନିକଟରେ ପହଞ୍ଚିଥିଲା । ଏହି ସମୟରେ ହଠାତ୍ ଏଥିରେ ନିଆଁ ଲାଗିଥିଲା । ଯାତ୍ରୀମାନେ କିଛି ବୁଝିବା ପୂର୍ବରୁ ଅଗ୍ନି ଭୟାବହ ରୂପ ଧାରଣ କରିଥିଲା । କେତେକ ଯାତ୍ରୀ କାଚ ଭାଙ୍ଗି ବାହାରକୁ ବାହାରିଥିଲେ । କିନ୍ତୁ ଅନେକ ଏଥିରେ ଆହତ ହୋଇଥିଲେ । ସ୍ଥାନୀୟ ଲୋକେ ଓ ଅଗ୍ନିଶମ ବାହିନୀ ପହଞ୍ଚି ଯାତ୍ରୀଙ୍କୁ ଉଦ୍ଧାର କରିଥିଲେ ।
