ଭୁବନେଶ୍ବର, ୧୩/୦୪ : ଆଗକୁ ଦେଶରେ ସାଧାରଣ ନିର୍ବାଚନ ଅନୁଷ୍ଠିତ ହେବାକୁ ଯାଉଥିବାବେଳେ ବିଭିନ୍ନ ରାଜନୈତିକ ଦଳ ପକ୍ଷରୁ ଜୋର୍ଦାର ପ୍ରଚାର ଚାଲିଛି । ସେପଟେ ଲୋକଙ୍କ ମଧ୍ୟରେ ଭୋଟ୍ଦାନ ସଂପର୍କରେ ସଚେତନତା ସୃଷ୍ଟି କରିବା ଲାଗି ଚେନ୍ନାଈର କିଛି ସ୍କୁବା ଡାଇଭର ଏକ ନିଆରା କାର୍ଯ୍ୟ କରିଛନ୍ତି । ୬ ଜଣ ସ୍କୁବା ଡାଇଭର ଚେନ୍ନାଈର ନୀଲଙ୍କରାଇ ଅଞ୍ଚଳରେ ସମୁଦ୍ରର ୬୦ ଫୁଟ ଗଭୀରତାରେ ମତଦାନ ପ୍ରକ୍ରିୟାର ପ୍ରଦର୍ଶନ କରିଛନ୍ତି । ସେମାନେ ନିଜ ସହିତ ଏକ ଡମି(ନକଲି) ଇଭିଏମ୍ ମେସିନ୍ ଓ ନିର୍ବାଚନ କମିଶନଙ୍କର ପ୍ଲାକାର୍ଡ ନେଇ ଯାଇଥିଲେ । ସେହି ପ୍ଲାକାର୍ଡରେ ‘ମୁଁ ମୋ’ ଭୋଟଦାନର ମହତ୍ତ୍ୱ ଜାଣିଛି’, ‘ମୋ’ ଦେଶ, ମୋ’ ଭୋଟ୍ ପରି’ ସ୍ଲୋଗାନ୍ ଲେଖାଥିଲା । ସ୍କୁବା ଡାଇଭରମାନଙ୍କର ଏହି ନିଆରା ପ୍ରୟାସର ଏକ ଭିଡିଓ ଭାଇରାଲ୍ ହେଉଛି ।
ସେଥିରେ ଜଣେ ଡାଇଭର ଭୋଟ ଦେବାର ଗୁରୁତ୍ୱ ଓ ସେମାନଙ୍କର ଏହି ନିଆରା ଅଭିଯାନ ଆୟୋଜନର ଉଦ୍ଦେଶ୍ୟ ସଂପର୍କରେ କହୁଥିବାର ଦେଖିବାକୁ ମିଳୁଛି । ସ୍କୁବା ଡାଇଭିଂ ପ୍ରଶିକ୍ଷକ ଓ ଟେମ୍ପଲ ଆଡ୍ଭେଞ୍ଚରର ନିର୍ଦ୍ଦେଶକ ଏସ୍ବି ଅରବିନ୍ଦଙ୍କ ଅଧ୍ୟକ୍ଷତାରେ ଏହି ସଚେତନତା ଅଭିଯାନ ପରିଚାଳିତ ହୋଇଥିଲା ।
