କୋଲକାତା: ରାଜ୍ୟରେ ବନ୍ୟା ସ୍ଥିତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଦାମୋଦର ଘାଟି ନିଗମ (DVC) ସହ ବୁଝମଣା ରଦ୍ଦ କରିବା ଦାବିକୁ ଦୋହରାଇବା ସହ ମମତା କହିଛନ୍ତି, ଡିଭିସି ପ୍ରାୟ ୫ ଲକ୍ଷ କ୍ୟୁସେକ ଜଳ ଛାଡ଼ିବା ଦ୍ବାରା ଦକ୍ଷିଣ ବେଙ୍ଗଲରେ ପ୍ରଳୟଙ୍କରୀ ବନ୍ୟା ଆସିଛି । ପ୍ରଧାନମନ୍ତ୍ରୀ ମୋଦୀଙ୍କୁ ପତ୍ର ଲେଖି ଜଲଦି ଫଣ୍ଡ ଜାରି କରିବାକୁ ମମତା ବାନାର୍ଜୀ ଦାବି କରିଛନ୍ତି । ଫଳରେ ବନ୍ୟା ସ୍ଥିତି ସହ ମୁକାବିଲା କରିହେବ ବୋଲି ସେ ଲେଖିଛନ୍ତି ।

୨୦୦୯ ପରେ ରାଜ୍ୟ ପ୍ରଳୟଙ୍କରୀ ବନ୍ୟା ସ୍ଥିତିର ସାମ୍ନା କରୁଛି । ଏହି ସମସ୍ୟାକୁ ସମାଧାନ କରିବା ଲାଗି ମୁଁ ଅନେକ ଥର ଦାବି କରିଆସିଛି । ସମ୍ବନ୍ଧିତ ଅଧିକାରୀଙ୍କୁ ପଠାଇ ସମସ୍ୟାର ସମାଧାନ କରିବା ସହ ପ୍ରାଥମିକତା ଭିତ୍ତିରେ କେନ୍ଦ୍ରୀୟ ସହାୟତା ଦେବା ଲାଗି ମଧ୍ୟ ପ୍ରଧାନମନ୍ତ୍ରୀଙ୍କୁ ଲେଖିଛନ୍ତି ମମତା ବାନାର୍ଜୀ । 

ମମତା ବାନାର୍ଜୀ ଅଭିଯୋଗ କରିଛନ୍ତି ଯେ, ‘ଡିଭିସି ମାଲିକାନାରେ ଥିବା ମାଇଥନ ଏବଂ ପାଞ୍ଚେତ ଡ୍ୟାମରୁ ପ୍ରାୟ ୫ ଲକ୍ଷ କ୍ୟୁସେକ ଜଳ ଏକତରଫା ଭାବରେ ଛଡ଼ାଯିବାରୁ ବେଙ୍ଗଲରେ ବନ୍ୟା ଆସିଛି । ଗୁରୁବାର ଦିନ ମମତା ବାନାର୍ଜୀ ଝାଡ଼ଖଣ୍ଡ ସରକାରଙ୍କୁ ଟାର୍ଗେଟ କରିବା ସହ ଆଗାମୀ ୩ ଦିନ ଲାଗି ଅନ୍ତରାଜ୍ୟ ସୀବା ବନ୍ଦ ଲାଗି ନିର୍ଦ୍ଦେଶ ଦେଇଛନ୍ତି । ଏହାକୁ ନେଇ ଟିଏମସି ଏବଂ ବିଜେପି ମଧ୍ୟରେ ରାଜନୈତିକ ବୟାନବାଜି ଜୋର ଧରିଛି । ଦାମୋଦର ଘାଟି ନିଗମ ସହ ବୁଝାମଣା ରଦ୍ଦ କରିବା ଏବଂ ଝାଡ଼ଖଣ୍ଡ ସହ ସୀମା ସିଲ କରିବାକୁ ମମତା ବାନାର୍ଜୀଙ୍କ ନିର୍ଦ୍ଦେଶକୁ ନେଇ ପଶ୍ଚିମବଙ୍ଗରେ ରାଜନୀତି ସରଗରମ ହୋଇଛି । ବିଜେପି ବିଧାୟକ ସୁଭେନ୍ଦୁ ଅଧିକାରୀ ମମତା ବାନାର୍ଜୀଙ୍କୁ ଚେତାବନୀ ଦେଇ କହିଛନ୍ତି, ‘ଝାଡ଼ଖଣ୍ଡ ସହ ସୀମା ଜଲଦି ଖୋଲ । ନଚେତ କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ, ଗୃହମନ୍ତ୍ରୀ ଅମିତ ଶାହ ଏବଂ ରାଜ୍ୟପାଳଙ୍କ ନିକଟରେ ଅଭିଯୋଗ କରାଯିବ ।’