ନୂଆଦିଲ୍ଲୀ,୧୫/୦୯: ଭାରତୀୟ ପ୍ରତିଭୂତି ବିନିମୟ ବୋର୍ଡ(ସେବି)  ଅଧ୍ୟକ୍ଷା ମାଧବୀ ପୁରୀ ବୁଚ୍‌ଙ୍କ ବିରୋଧରେ ନୂଆ ଅଭିଯୋଗ ଆଣିଛି କଂଗ୍ରେସ ।  ଏକ ସାମ୍ବାଦିକ ସମ୍ମିଳନୀରେ କଂଗ୍ରେସ ମୁଖପାତ୍ର ପୱନ ଖେଡ଼ା କହିଛନ୍ତି ଯେ,  ବୁଚ୍‌ ସେବି ନିୟମର ଉଲ୍ଲଂଘନ କରି ନିଜ କାର୍ଯ୍ୟକାଳରେ ପୁଞ୍ଜି ବଜାରରେ  ତାଲିକାଭୁକ୍ତ ସିକ୍ୟୁରିଟିଜ୍‌ଗୁଡ଼ିକରେ ୩୬.୯ କୋଟି ଟଙ୍କା ଲଗାଇଛନ୍ତି । ୨୦୧୭ରୁ  ୨୦୨୩ ମଧ୍ୟରେ ଏହି ଟ୍ରେଡିଂ ହୋଇଛି ।  ବିଦେଶୀ ପାଣ୍ଠିରେ ବୁଚ୍‌ ନିବେଶ କରିଥିବା  ଅଭିଯୋଗ ଆଣିଛି କଂଗ୍ରେସ । ଏଥିରେ  ଚାଇନିଜ୍‌ ନିବେଶ ବି ରହିଛି । ବୁଚ୍‌ ଗ୍ଲୋବାଲ  ଏକ୍ସ ଏମ୍‌ଏସ୍‌ସିଆଇ ଚାଇନା କଞ୍ଜ୍ୟୁମର ଏବଂ  ଇନ୍‌ଭେଷ୍ଟକୋ ଚାଇନା ଟେକ୍ନୋଲୋଜି ଇଟିଏଫ୍‌ ସହିତ ୪ଟି ଇଣ୍ଟର୍‌ନ୍ୟାସ୍‌ନାଲ  ଫଣ୍ଡ୍‌ରେ ନିବେଶ କରିଛନ୍ତି । ଏହି ବିଦେଶୀ ଆସେଟ୍‌ଗୁଡ଼ିକୁ ନେଇ ବୁଚ୍‌ କେବେ  ଘୋଷଣା କଲେ ବୋଲି ଖେଡ଼ା ପ୍ରଶ୍ନ କରିଛନ୍ତି । ଏହା ଉପରେ ସ୍ପଷ୍ଟ କରିବା  ପାଇଁ କଂଗ୍ରେସ ପକ୍ଷରୁ ପ୍ରଧାନମନ୍ତ୍ରୀଙ୍କୁ ଅନୁରୋଧ କରାଯାଇଛି ।