ଗୌହାଟୀ,୦୩/୦୬: ଆସାମର କାଚାର ଜିଲ୍ଲା ପୁଲିସ ଦୁଇଟି ସ୍ଥାନରେ ଚଢ଼ଉ କରି ୧.୯୦ କିଲେର ହେରୋଇନ ଜବତ କରିଛନ୍ତି । ଆନ୍ତର୍ଜାତିକ ବଜାରରେ ଏହାର ମୂଲ୍ୟ ପ୍ରାୟ ୯.୫ କୋଟି ଟଙ୍କା ହେବ ।
ଏସ୍ପି ନୁମାଲ ମେହଟ୍ଟା, କହିଛନ୍ତି ଗୁଇନ୍ଦା ତଥ୍ୟ ଆଧାରରେ ଶନିବାର ଲଖିପୁରର ବନସକାଣ୍ଡି ଓ ଧୋଲାଇର ରାମପ୍ରସାଦ ପୁରରେ ସ୍ୱତନ୍ତ୍ର ଟିମ୍ ପକ୍ଷରୁ ଚଢ଼ଉ ହୋଇଥିଲା । ପୁଲିସ ଡ୍ରଗ୍ସ କାରବାରରେ ସମ୍ପୃକ୍ତ ୬ ଜଣଙ୍କୁ ଗିରଫ କରିଥିଲା । ସେମାନଙ୍କ ନିକଟରୁ ୧୫୦ଟି ସାବୁନ କେସ୍ ମିଳିଥିଲା । ଏହି ସାବୁନ କେସ୍ ଭିତରେ ହେରୋଇନ ରଖାଯାଇଥିଲା । ଡ୍ରଗ୍ସ କାରବାରରେ ବ୍ୟବହୃତ ଏକ କାର ଓ ସ୍କୁଟିକୁ ମଧ୍ୟ ଜବତ କରାଯାଇଛି । ମଣିପୁରର ଚୁରାଚାନ୍ଦପୁରରୁ ଏହି ଡ୍ରଗ୍ସ ଏଠାକୁ ଅଣାଯାଇଥିଲା । ଏଠାରେ ବିଭିନ୍ନ ସ୍ଥାନକୁ ପଠାଯିବାର ଯୋଜନା ଥିଲା । ଗତ ମେ ୨୪ରେ କାଚାର ପୁଲିସ ଦୁଇଟି ସ୍ଥାନରେ ଚଢ଼ଉ କରି ପ୍ରାୟ ୮.୫ କୋଟି ଟଙ୍କାର ହେରୋଇନ ଜବତ କରିବା ସହ ୪ ଜଣଙ୍କୁ ଗିରଫ କରିଥିଲା।
