ନୂଆଦିଲ୍ଲୀ ୧୮/୦୫: ଖରାଦିନେ ସତେଜ୍ ଏବଂ ଉର୍ଜାରେ ଭରପୁର ରହିବାକୁ ନିଜର ଭୋଜନରେ ଭିଟାମିନ୍ -ସି ଯୁକ୍ତ ଫଳ ଗ୍ରହଣ କରନ୍ତୁ। ଖରାଦିନେ ଡାଇରିଆ ଓ ସ୍କିନ୍ ଆଲର୍ଜି ଭଳି ଅନେକ ରୋଗ ହୋଇଥାଏ। ଏସବୁରୁ ନିଜକୁ ରକ୍ଷାକରିବା ପାଇଁ ବ୍ରୋକୋଲି ଏବଂ ଲେମ୍ବୁ ଇତ୍ୟାଦି ଖାଇବା ଉଚିତ୍। ଏହା ଶରୀରକୁ ହାଇଡ୍ରେଟେଡ୍ ରଖିବା ସହ ମୁହଁର ଉଜ୍ୱଳତା ବଢାଇବାରେ ମଧ୍ୟ ସହାୟକ ହୋଇଥାଏ। ଭିଟାମିନ୍ ସି ଶରୀରର ଇମ୍ୟୁନିଟି ବା ରୋଗପ୍ରତିରୋଧକ ଶକ୍ତି ବଢାଇଥାଏ। ଯାହାଦ୍ୱାରା ଶରୀରରେ ରୋଗ ସଂକ୍ରମଣ କମିଥାଏ। କମଳା, ଷ୍ଟ୍ରବେରୀ ଏବଂ କିୱି ଭଳି ଭିଟାମିନ୍- ସି ଭରପୁର ଫଳ ଖାଇବା ଅତ୍ୟନ୍ତ ଲାଭଦାୟକ।

ତ୍ୱଚାର ଯତ୍ନ ଏବଂ ଖରାରୁ ସୁରକ୍ଷା

ଖରାଦିନେ ଟାଣ ସୂର୍ଯ୍ୟାଲୋକ କାରଣରୁ ସନ୍ ବର୍ଣ୍, ଡିହାଇଡ୍ରେସନ୍ ହୋଇଥାଏ। ଭିଟାମିନ୍ ସି ତ୍ୱଚାକୁ ସୁସ୍ଥ ରଖିବା ସହ, କୋଲେଜନ୍ ବଢାଇବାରେ ଏକ ମହତ୍ତ୍ୱପୂର୍ଣ୍ଣ  ଭୂମିକା ଗ୍ରହଣ କରିଥାଏ। କମଳା, ପାଚିଲା ଅମୃତଭଣ୍ଡା ଏବଂ ପିଜୁଳି ଖାଇବା ଦ୍ୱାରା ତ୍ୱଚାରେ ଚମକ ଆସିଥାଏ ଏବଂ ପ୍ରଚଣ୍ଡ ଖରାର ଅଅତି ବାଇଗଣୀ ରଶ୍ମି ଠାରୁ ଆମକୁ ରକ୍ଷା କରିଥାଏ।

ପାଚନ କ୍ରିୟାରେ ଉନ୍ନତି

ଖରାଦିନେ ଅନେକ ଲୋକ ପିକ୍ ନିକ୍ ଓ  ଆଉଟଡୋର୍ର ମଜା ଉଠାଇଥାନ୍ତି। ଏହା ପାଚନ ସମ୍ୱନ୍ଧିୟ ସମସ୍ୟାର କାରଣ ହୋଇଥାଏ। ଭିଟାମିନ୍- ସି ଯୁକ୍ତ ଖାଦ୍ୟରେ ଏନ୍ ଜାଇମ୍ ଓ ଫାଇବର୍ ପ୍ରଚୁର ମାତ୍ରାରେ ଥିବାରୁ ଏହା ପାଚନକ୍ରିୟାରେ ସହାୟକ ହୋଇଥଏ। ଆମ୍ୱ, ଜାମୁକୋଳିର ନିୟମିତ ସେବନ ଦ୍ୱାରା ଆପଣ ନିଶ୍ଚିନ୍ତ ଭାବରେ ମନପସନ୍ଦ ଭୋଜନର ଆନନ୍ଦ ଉଠାଇ ପାରିବେ।

ଉର୍ଜା ବଢାଏ

ଖରାଦିନେ ସବୁବେଳେ ଥକାପଣ ଲାଗିଥାଏ। ଭିଟାମିନ୍ ସି ଖାଇବା ଦ୍ବାରା ମେଟାବଲିଜିମ୍ ବଢ଼େ। ଫଳରେ ଆମ ଭୋଜନକୁ ଉର୍ଜାରେ ପରିଣତ କରିଥାଏ। ଭୋଜନରେ ଭିଟାମିନ୍ ସି ଯୁକ୍ତ ଫଳ ଗ୍ରହଣ କରିବାଦ୍ୱାରା ଉର୍ଜାବାନ୍ ଏବଂ ସକ୍ରିୟ ରହିପାରିବା। 

କେତେ ପରିମାଣରେ ନେବେ ଭିଟାମିନ୍ ସି

ଦୈନିକ ରୂପରେ ପୁରୁଷଙ୍କ ପାଇଁ ୯୦ ମିଲିଗ୍ରାମ୍ ଏବଂ ମହିଳାଙ୍କ ପାଇଁ ୭୫ ମିଲିଗ୍ରାମ୍ ଭିଟାମିନ୍- ସି ର ଆବଶ୍ୟକତା ରହିଛି। ତେଣୁ ପ୍ରତିଦିନ ୧୦୦ ରୁ ୨୦୦ ଗ୍ରାମ୍‌ର ଖଟା ଫଳର ସେବନ କରିବା ଉଚିତ୍। ବିଭିନ୍ନ ଫଳରେ ଭିଟାମିନ୍ ସିର ପରିମାଣ ଭିନ୍ନ ଭିନ୍ନ ରହିଥାଏ। ସେଥିପାଇଁ ଉପରୋକ୍ତ ଫଳ ଗୁଡିକୁ ଏକ ସନ୍ତୁଳିତ ମାତ୍ରାରେ ଗ୍ରହଣ କରିବା ଉଚିତ୍।