ଭୁବନେଶ୍ୱର, ୩।୪: ନିର୍ବାଚନ ପୂର୍ବରୁ ରାଜ୍ୟର ୮ ଜଣ ବରିଷ୍ଠ ପ୍ରଶାସନିକ ଓ ପୁଲିସ ଅଧିକାରୀଙ୍କୁ ବଦଳି କରିବାକୁ ଭାରତୀୟ ନିର୍ବାଚନ ଆୟୋଗ ନିର୍ଦ୍ଦେଶ ଦେଇଛନ୍ତି । ୨ ଜିଲ୍ଲାପାଳ, ୫ ଏସ୍‌ପି ଓ କେନ୍ଦ୍ରୀୟ ରେଞ୍ଜ ଆଇଜିଙ୍କୁ ତୁରନ୍ତ ବଦଳି କରିବାକୁ ଆୟୋଗ ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦିଆଯାଇଛି । ଏ ସମ୍ପର୍କରେ ମଙ୍ଗଳବାର ସନ୍ଧ୍ୟା ୫ଟା ସୁଦ୍ଧା ରିପୋର୍ଟ ଦେବାକୁ ମୁଖ୍ୟ ସଚିବଙ୍କୁ କୁହାଯାଇଛି । କେବଳ ଏତିକି ନୁହେଁ, ଏହି ସବୁ ଅଧିକାରୀଙ୍କୁ ନିର୍ବାଚନ ପରିଚାଳନାରେ ନିଯୁକ୍ତ ନ କରିବାକୁ ନିର୍ଦ୍ଦେଶ ରହିଛି । ନିର୍ବାଚନ ଆୟୋଗ ଯେଉଁ ଜିଲ୍ଲାପାଳମାନଙ୍କୁ ବଦଳି କରିବାକୁ ନିର୍ଦ୍ଦେଶ ଦେଇଛନ୍ତି ସେମାନେ ହେଲେ କଟକ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ବିନୀତ ଭରଦ୍ୱାଜ ଓ ଜଗତସିଂହପୁର ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ପାରୁଲ୍‌ ପଟୱାରୀ । 

ସେହିପରି ଅନୁଗୋଳ ଏସ୍‌ପି ସୁଧାଂଶୁ ଶେଖର ମିଶ୍ର, ବ୍ରହ୍ମପୁର ଏସ୍‌ପି ଡା. ସର୍‌ବଣା ବିବେକ ଏମ୍‌, ଖୋର୍ଦ୍ଧା ଏସ୍‌ପି ଯୁଗଳ କିଶୋର ବାନୋଥ୍‌, ରାଉରକେଲା ଏସ୍‌ପି ମିତ୍ରଭାନୁ ମହାପାତ୍ର ଏବଂ କଟକ ଡିସିପି ଡାକ୍ତର କନୱର ବିଶାଲ ସିଂହ । କେନ୍ଦ୍ରାଞ୍ଚଳ ଆଇଜି ଆଶିଷ ସିଂଙ୍କୁ ମଧ୍ୟ ବଦଳି କରିବାକୁ ନିର୍ଦ୍ଦେଶ ଦିଆଯାଇଛି । ଉପରୋକ୍ତ ସମସ୍ତ ପଦ ପାଇଁ ଯୋଗ୍ୟ ବିବେଚିତ ୩ ଜଣିଆ ଅଧିକାରୀଙ୍କ ପ୍ୟାନେଲ୍‌ ଆୟୋଗଙ୍କୁ ପଠାଇବାକୁ ମୁଖ୍ୟ ଶାସନ ସଚିବଙ୍କୁ କୁହାଯାଇଛି ।