ମୁମ୍ବାଇ ୦୭/୦୨ : ବଲିଉଡ୍ର ଡ୍ରିମ୍ ଗର୍ଲଙ୍କ ଝିଅ ତଥା ଅଭିନେତ୍ରୀ ଈଶା ଦେଓଲ ଓ ତାଙ୍କ ସ୍ୱାମୀ ଭରତ ତଖତାନିଙ୍କର ବିବାହ ବିଚ୍ଛେଦ ହୋଇଛି । ଗଣମାଧ୍ୟମର ରିପୋର୍ଟ ଅନୁସାରେ, ଉଭୟ ମିଳିତ ଭାବେ ଏହି ସୂଚନା ଦେଇଛନ୍ତି । ଏଥିରେ ଉଲ୍ଲେଖ ହୋଇଛି ‘ଆମେ ଦୁହେଁ ଆପୋସ ସହମତିରେ ଅଲଗା ହେବାକୁ ନିଷ୍ପତ୍ତି ନେଇଛୁ । ଏବେ ଆମେ ସାଥୀ ହୋଇ ନାହୁଁ, କିନ୍ତୁ ଆମ ପାଇଁ ଆମର ଦୁଇ ସନ୍ତାନଙ୍କ ଭବିଷ୍ୟତ ସବୁଠୁ ଗୁରୁତ୍ୱପୂର୍ଣ୍ଣ ଏବଂ ସର୍ବଦା ରହିବ । ଆଶା କରୁଛୁ ଆପଣମାନେ ଆମ ଗୋପନୀୟତାକୁ ସମ୍ମାନ ଦେବେ ।’
ଈଶା-ଭରତଙ୍କ ବିବାହ ବିଚ୍ଛେଦ ଖବର ବେଶ କିଛି ଦିନରୁ ଚର୍ଚ୍ଚାରେ ରହିଥିଲା । ଗତ କିଛି ଦିନ ହେଲା ଈଶା ଅଧିକାଂଶ ପାର୍ଟି ଓ କାର୍ଯ୍ୟକ୍ରମରେ ମା’ ହେମାଙ୍କ ସହ ନଜର ଆସୁଥିଲେ । ହେମାଙ୍କ ଜନ୍ମଦିନ ଅବସରରେ ମଧ୍ୟ ଭରତଙ୍କୁ ଦେଖିବାକୁ ମିଳିନଥିଲା । ୨୦୧୨ ମସିହା, ଜୁନ୍ ୨୯ ତାରିଖରେ ଈଶା ଓ ଭରତ ମୁମ୍ବାଇର ଜୁହୁ ସ୍ଥିତ ଇସ୍କନ ମନ୍ଦିରରେ ବିବାହ କରିଥିଲେ । ଉଭୟ ପିଲାଦିନର ବନ୍ଧୁ ଥିଲେ । ଆରମ୍ଭରୁ ଭରତ ଈଶାଙ୍କୁ ପସନ୍ଦ କରୁଥିଲେ । ଧୀରେ ଧୀରେ ଉଭୟଙ୍କ ବନ୍ଧୁତା ପ୍ରେମରେ ରୂପାନ୍ତରିତ ହୋଇଥିଲା । ବିବାହର ୫ ବର୍ଷ ପରେ ଈଶା ୨୦୧୭ ମସିହାରେ ଝିଅ ରାଧ୍ୟା ଓ ୨୦୧୯ ମସିହାରେ ଆଉ ଏକ ଝିଅ ମିରାୟାକୁ ଜନ୍ମ ଦେଇଥିଲେ ।
Also Read :-
ଲିଭ୍-ଇନ୍ ପଞ୍ଜୀକରଣ ନ କଲେ ଜେଲ୍, ଉତ୍ତରାଖଣ୍ଡ ବିଧାନସଭରେ ୟୁସିସି ବିଲ୍ ଆଗତ
