ନୂଆଦିଲ୍ଲୀ ୦୮/୦୯: ଜାପାନ ପ୍ରଧାନମନ୍ତ୍ରୀ ଫୁମିଓ କିଶିଦା ଜି-୨୦ ସମ୍ମିଳନୀରେ ସାମିଲ ହେବେ । ତାଙ୍କୁ ଶୁକ୍ରବାର ଅପରାହ୍ନ ପ୍ରାୟ ୨ଟା ୧୫ରେ ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ଏବଂ ପରିବେଶ, ଜଙ୍ଗଲ ଓ ଜଳବାୟୁ ରାଷ୍ଟ୍ରମନ୍ତ୍ରୀ ଅଶ୍ୱିନୀ କୁମାର ଚୌବେ ସ୍ୱାଗତ କରିବେ ।
ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନି ଆଲ୍ବାନିଜ୍ଙ୍କୁ ଦକ୍ଷତା ବିକାଶ, ଉଦ୍ୟମିତା, ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ରାଷ୍ଟ୍ରମନ୍ତ୍ରୀ ରାଜୀବ ଚନ୍ଦ୍ରଶେଖର ସ୍ୱାଗତ ଜଣାଇବେ । ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ୟୁଏଇ ରାଷ୍ଟ୍ରପତି ଶେଖ ମହମ୍ମଦ ବିନ୍ ଜାୟେଦ ଅଲ୍ ନାହ୍ୟାନ ଓ ବ୍ରାଜିଲ ରାଷ୍ଟ୍ରପତି ଲୁଇଜ ଇନାସିଓ ଲୁଲା ଦା ସିଲ୍ଭାଙ୍କୁ ଯଥାକ୍ରମେ ଶୁକ୍ରବାର ରାତି ୮ଟା ଓ ୮ଟା ୪୫ରେ ସ୍ୱାଗତ କରିବେ । ବାଂଲାଦେଶ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ ବୟନ ଶିଳ୍ପ ଓ ରେଳ ରାଷ୍ଟ୍ରମନ୍ତ୍ରୀ ଦର୍ଶନା ବିକ୍ରମ ଜରଦୋଶ ସ୍ୱାଗତ କରିବାକୁ ଥିବା ବେଳେ ମନ୍ତ୍ରୀ ଅଶ୍ୱିନୀ କୁମାର ଚୌବେ ସନ୍ଧ୍ୟା ୭ଟା ୪୫ରେ ଚୀନ୍ ପ୍ରଧାନମନ୍ତ୍ରୀ ଲି କିଆଙ୍ଗ୍ଙ୍କୁ ସ୍ୱାଗତ କରିବେ । ପୁନଶ୍ଚ ମନ୍ତ୍ରୀ ଭି କେ ସିଂହ ନେଦରଲାଣ୍ଡସର ପ୍ରଧାନମନ୍ତ୍ରୀ ମାର୍କ ରୁଟ୍ଙ୍କୁ ରାତି ୮ଟା ୧୫ରେ ସ୍ୱାଗତ ଜଣାଇବେ ।
ମନ୍ତ୍ରୀ ରାଜୀବ ଚନ୍ଦ୍ରଶେଖର ସନ୍ଧ୍ୟା ୫ଟା ୧୦ରେ ଦକ୍ଷିଣ କୋରିଆ ରାଷ୍ଟ୍ରପତି ସୁକ୍ ୟିଓଲ୍ ୟୁନ୍ଙ୍କୁ, ୫ଟା ୪୫ରେ ଇଜିପ୍ଟ ରାଷ୍ଟ୍ରପତି ଆବ୍ଦେଲ ଫତାହ ଏଲ୍-ସିସିଙ୍କୁ ଏବଂ ସନ୍ଧ୍ୟା ୭ଟାରେ କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋଙ୍କୁ ସ୍ୱାଗତ ଜଣାଇବାର କାର୍ଯ୍ୟକ୍ରମ ରହିଛି । ଆର୍ଜେଣ୍ଟିନା ରାଷ୍ଟ୍ରପତି ଆଲ୍ବର୍ଟୋ ଫର୍ନାଣ୍ଡିଜ୍ଙ୍କୁ ସନ୍ଧ୍ୟା ୬ଟା ୨୦ରେ ଇସ୍ପାତ ଓ ଗ୍ରାମୀଣ ବିକାଶ ରାଷ୍ଟ୍ରମନ୍ତ୍ରୀ ଫଗନସିଂହ କୁଲସ୍ତେ ସ୍ୱାଗତ କରିବାକୁ ଥିବା ବେଳେ କୃଷି ରାଷ୍ଟ୍ରମନ୍ତ୍ରୀ ଶୋଭା କରନ୍ଦାଲ୍ଜେ ଶୁକ୍ରବାର ସକାଳ ୮ଟା ୫୦ରେ ଇଟାଲୀ ପ୍ରଧାନମନ୍ତ୍ରୀ ଜିଓର୍ଜିଓ ମେଲୋନିଙ୍କୁ ସ୍ୱାଗତ ଜଣାଇବେ । ଜର୍ମାନ୍ ଚାନ୍ସେଲର୍ ଓଲାଫ୍ ସ୍କଲ୍ଜଙ୍କୁ ଶନିବାର ସକାଳ ୮ଟାରେ ଏମ୍ଏସ୍ଏମ୍ଇ ରାଷ୍ଟ୍ରମନ୍ତ୍ରୀ ଭାନୁପ୍ରତାପ ସିଂହବର୍ମା ସ୍ୱାଗତ କରିବା କାର୍ଯ୍ୟକ୍ରମ ରହିଛି । ବନ୍ଦର, ଜାହାଜ ଚଳାଚଳ ଓ ଜଳମାର୍ଗ ରାଷ୍ଟ୍ରମନ୍ତ୍ରୀ ଶାନ୍ତନୁ ଠାକୁର ଶୁକ୍ରବାର ରାତି ୯ଟା ୧୫ରେ ଇଣ୍ଡୋନେସିଆ ରାଷ୍ଟ୍ରପତି ଜୋକୋ ୱିଡୋଡୋଙ୍କୁ ସ୍ୱାଗତ ଜଣାଇବେ ।
ଏଥିସହ ତୁର୍କୀ ରାଷ୍ଟ୍ରପତି ରିସେପ୍ ତାୟିପ୍ ଏର୍ଡୋଗାନ୍ଙ୍କୁ ରାତି ୧୦ଟା ୧୫ରେ ଏବଂ ରାତି ୧୦ଟା ୪୫ରେ ସ୍ପେନ୍ ରାଷ୍ଟ୍ରପତି ପେଡ୍ରୋ ସାଞ୍ଚେଜ୍ ପେରେଜ କାଷ୍ଟେଜନ୍ଙ୍କୁ ମଧ୍ୟ ମନ୍ତ୍ରୀ ଶାନ୍ତନୁ ଠାକୁର ସ୍ୱାଗତ ଜଣାଇବେ । ଫ୍ରାନ୍ସ ରାଷ୍ଟ୍ରପତି ଏମାନୁଏଲ୍ ମାକ୍ରନ୍ଙ୍କୁ ଶନିବାର ଅପରାହ୍ନ ୧୨ଟା ୩୫ରେ ବାଣିଜ୍ୟ ଓ ଶିଳ୍ପ ରାଷ୍ଟ୍ରମନ୍ତ୍ରୀ ଅନୁପ୍ରିୟା ପଟେଲ୍ ସ୍ୱାଗତ ଜଣାଇବେ । ରେଳ, କୋଇଲା ଓ ଖଣି ରାଷ୍ଟ୍ରମନ୍ତ୍ରୀ ରାଓସାହେବ ଦାନ୍ବେ ୟୁନିଅନ୍ ଅଫ୍ କୋମୋରୋସ ରାଷ୍ଟ୍ରପତି ଆଜାଲି ଆସୌମନିଙ୍କୁ ପୂର୍ବାହ୍ନ ୧୦ଟା ୨୫ ଓ ଦକ୍ଷିଣ ଆଫ୍ରିକା ରାଷ୍ଟ୍ରପତି ସାଇରିଲ୍ ରାମାଫୋସାଙ୍କୁ ପୂର୍ବାହ୍ନ ୧୧ଟା ୪୫ରେ ସ୍ୱାଗତ ଜଣାଇବେ ।
