ଋତୁ ଅନୁଯାୟୀ ଫଳ ଖାଇବା ସ୍ୱାସ୍ଥ୍ୟ ପାଇଁ ହିତକର ହୋଇଥାଏ। କିନ୍ତୁ କିଛି ଫଳ ଏପରି ରହିଛି ଯାହାକୁ ସବୁ ଋତୁରେ ଖାଇବା ଉଚିତ। ସେଥିରୁ ଅମୃତଭଣ୍ଡା ଏପରି ଏକ ଫଳ ଯାହା ଆପଣଙ୍କୁ ବର୍ଷସାରା ବଜାରରେ ସହଜରେ ମିଳିଥାଏ। ଏହି ଫଳ ରୋଗକୁ ପ୍ରତିରୋଧ କରିବାରେ ସର୍ବୋତ୍ତମ । ଅମୃତଭଣ୍ଡା ସ୍ୱାଦିଷ୍ଟ ହେବା ସହ ପୋଷକତତ୍ତ୍ୱର ଭଣ୍ଡାର ଅଟେ। ଏହାର ସେବନ କରିବାଦ୍ୱାରା ପାଚନକ୍ରିୟା ଠାରୁ ଆରମ୍ଭ କରି କାର୍ଡିଓବେସ୍କୁଲର ସ୍ୱାସ୍ଥ୍ୟ ମଧ୍ୟ ସୁଧୁରିଯାଏ। ଆୟୁର୍ବେଦରେ ଏହି ଫଳକୁ ପେଟ ପାଇଁ ବରଦାନ ବୋଲି କୁହାଯାଇଛି। ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁଯାୟୀ ଏହା କୋଷ୍ଠକାଠିନ୍ୟରୁ ଆରାମ ଦେଇଥାଏ। 

ଏକ ଗଣମାଧ୍ୟମ ସାକ୍ଷାତକାରରେ ଉତ୍ତରପ୍ରଦେଶର ଅଲୀଗଡ ସ୍ଥିତ ଆୟୁର୍ବେଦିକ ମେଡିକାଲ କଲେଜର ଏସୋସିଏଟ ପ୍ରଫେସର ଡ.ସରୋଜ ଗୌତମ କହିଛନ୍ତି, ଅମୃତଭଣ୍ଡାକୁ ଆୟୁର୍ବେଦରେ ଔଷଧୀୟ ଗୁଣର ଭଣ୍ଡାର ବୋଲି କୁହାଯାଇଛି। ଉଭୟ କଞ୍ଚା ଏବଂ ପାଚିଲା ସ୍ୱାସ୍ଥ୍ୟ ପାଇଁ ହିତକର। ଏଥିରେ ପେଟ ସଫା କରିବା ପାଇଁ ପ୍ରାକୃତିକ ଉପାଦାନ ରହିଛି। ଯାହା ଆପଣଙ୍କୁ ଅତିପରୁଣା କୋଷ୍ଠକାଠିନ୍ୟରୁ ମୁକ୍ତି ଦେଇଥାଏ।  ଏପରି ପରିସ୍ଥିତିରେ ରୋଗୀକୁ ପ୍ରତ୍ୟେକ ଦିନ ଅମୃତଭଣ୍ଡା ଖାଇବା ଉଚିତ୍। ଏହା ଆପଣଙ୍କର ପାଚନ ସମ୍ୱନ୍ଧୀୟ ସମସ୍ୟାକୁ ଦୂର କରି,ତାକୁ ଉନ୍ନତ କରିଥାଏ । 

ଡାକ୍ତର ସରୋଜ ଗୌତମଙ୍କ ମତ ଅନୁଯାୟୀ ଅମୃତଭଣ୍ଡାରେ ଫାଇବର ମାତ୍ରା ଅଧିକ ରହିଥାଏ,ଯାହା ଆପଣଙ୍କ ପେଟକୁ ସଫାରଖିଥାଏ ଏବଂ ପାଚନକ୍ରିୟାକୁ ଉନ୍ନତ କରିଥାଏ। ଏଥିରେ ଏକ ବିଶେଷ ଏନଜାଇମ ପପେନ ମଧ୍ୟ ଥାଏ, ଯାହା ଶରୀରକୁ ଫୁଲିବାରୁ ରକ୍ଷାକରେ ଏବଂ ସୁସ୍ଥ ରଖିବାରେ ସହାୟକ ହୋଇଥାଏ। ଏହାର ସେବନ କରିବା ଦ୍ୱାରା ଛାତି ପୋଡିବା,ହଜମ ନ ହେବା ,ଏସିଡ୍ ଏବଂ ଅଲସର୍ ଇତ୍ୟାଦିରୁ ମୁକ୍ତି ମିଳିଥାଏ। ଏହା ଶରୀରର ଓଜନ ନିୟନ୍ତ୍ରଣ କରିବା ସହ ଡିଟକ୍ସ ମଧ୍ୟ କରିଥାଏ। ଏହା ହୃଦୟ ପାଇଁ ମଧ୍ୟ ହିତକର। ଏହା ଶୀରରେ ଜମିଥିବା ବ୍ୟାଡ୍ କୋଲେଷ୍ଟ୍ରୋଲରୁ ମୁକ୍ତି ଦେଇଥାଏ। ଏହା ଚର୍ମରୋଗ ବା ଏଗ୍ଜିମାରୁ ମଧ୍ୟ ଆରାମ ଦେଇଥାଏ। 

ଆୟୁର୍ବେଦ ଏକ୍ସପର୍ଟଙ୍କ ମତାନୁଯାୟୀ କଞ୍ଚା  ଅମୃତଭଣ୍ଡା ପାଚିଲା ଅମୃତଭଣ୍ଡା ଠାରୁ ଅଧିକ ଲାଭଦାୟକ। କଞ୍ଚା ଅମୃତଭଣ୍ଡା ଖାଇବା ଦ୍ୱାରା ଆପଣଙ୍କ ସ୍ୱାସ୍ଥ୍ୟ ଭଲ ରହିବ। ମଧୁମେହ ରୋଗୀଙ୍କୁ ଏହା ଏକ ସୀମିତ ପରିମାଣରେ ଖାଇବା ଉଚିତ୍। ଡାକ୍ତରଙ୍କ ମତାନୁଯାୟୀ ଗର୍ଭବର୍ତୀ ମହିଳାମାନେ ଅମୃତଭଣ୍ଡା ଖାଇବା ଅନୁଚିତ। ଏହା ଖାଇବା ଦ୍ୱାରା ଗର୍ଭପାତର ବିପଦ ବଢିଥାଏ। ଯଦି ଆପଣଙ୍କୁ ଏଲର୍ଜି ଅଛି, ତେବେ ଏହାକୁ ଖାଇବା ଠାରୁ ନିବୃତ୍ତ ରୁହନ୍ତୁ। ଯଦି ମନରେ କୌଣସି ଶଙ୍କା ରହିଛି, ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ।