ଭୁବନେଶ୍ୱର, ୨୬।୧: ମାଖାନା । ସାଧାରଣ ଭାଷାରେ ଏହାକୁ ପଦ୍ମମଞ୍ଜି ବୋଲି କୁହାଯାଏ । ଏହା କୌଣସି ସୁପରଫୁଟ୍ ଠାରୁ କମ୍ ନୁହେଁ । ଏଥିରେ ଫାଇବର, ପ୍ରୋଟିନ୍, କ୍ୟାଲସିୟମ୍, ମ୍ୟାଗ୍ନେସିୟମ୍, ପୋଟାସିୟମ୍ ଏବଂ ଫସଫରସ୍ ଭଳି ପୋଷକ ତତ୍ତ୍ୱ ଭରପୂର ରହିଛି । ଏହା ଶରୀର ପାଇଁ ରାମବାଣ ପରି ହୋଇଥାଏ । କିନ୍ତୁ, ଯଦି ଏହାକୁ ଠିକ୍ ଭାବରେ ନଖାଆନ୍ତି ତେବେ ଏହା ଶରୀରରେ ବଡ଼ କ୍ଷତି କରିପାରେ । ଏଥିରେ ଫାଇବର ରହିଥିବା ଯୋଗୁଁ ଏହା ପେଟ ପାଇଁ ଖୁବ୍ ଉପକାରୀ । 

ପଦ୍ମମଞ୍ଜି ଖାଇବା ଦ୍ବାରା ଶରୀରରେ ଏନର୍ଜି ଆସିଥାଏ ଏବଂ ଶରୀରର ଅନ୍ୟାନ୍ୟ ସମସ୍ୟା ମଧ୍ୟ ଦୂର ହୋଇଥାଏ । ଏବେ ପ୍ରଶ୍ନ ଉଠୁଛି ଗୋଟିଏ ଦିନରେ କେତେ ପଦ୍ମମଞ୍ଜି ଖାଇବା ଉଚିତ୍ । ବିଶେଷଜ୍ଞଙ୍କ ଅନୁଯାୟୀ, ଦିନକୁ କେବଳ ୧୦ରୁ ୧୨ଟି ମାଖାନା ଖାଇବା ଉଚିତ୍ । ଯଦି ଆପଣ ଏହାକୁ ଅଧିକ ଖାଆନ୍ତି ତେବେ ଅନେକ ସ୍ୱାସ୍ଥ୍ୟ ସମସ୍ୟା ଦେଖା ଦେଇପାରେ । ଫାଇବର ଯୋଗୁଁ ଏହାକୁ ଅଧିକ ଖାଇବା ଦ୍ବାରା କୋଷ୍ଠକାଠିନ୍ୟ ପରି ସମସ୍ୟା ଦେଖିବାକୁ ମିଳିଥାଏ । ତେଣୁ ପଦ୍ମମଞ୍ଜିକୁ ଆବଶ୍ୟକ ଅନୁଯାୟୀ ଖାଇବା ଦରକାର । 

ଯେଉଁମାନେ ମଖାନାକୁ ଫ୍ରାଏ କରି ଲଗାତର ଖାଇଥା’ନ୍ତି, ସେମାନେ ହଜମ ସମସ୍ୟାର ସମ୍ମୁଖୀନ ହୋଇପାରନ୍ତି । ବାସ୍ତବରେ ଏହାକୁ ହଜମ କରିବା ପାଇଁ ଶରୀରରେ ଜଳର ପରିମାଣ ସଠିକ୍ ହେବା ଉଚିତ୍ । ବିଶେଷଜ୍ଞଙ୍କ ଅନୁଯାୟୀ ଅଧିକ ମଖାନା ଖାଇବା ଦ୍ୱାରା ଷ୍ଟୋନ୍ ମଧ୍ୟ ହୋଇପାରେ । ଯେଉଁମାନଙ୍କର ପୂର୍ବରୁ ଷ୍ଟୋନ୍ ସମସ୍ୟା ରହିଛି ସେମାନେ କେବଳ ବିଶେଷଜ୍ଞ କିମ୍ବା ଡାକ୍ତରଙ୍କ ପରାମର୍ଶରେ ଏହାକୁ ଖାଇବା ଉଚିତ୍ । ଏହାବ୍ୟତୀତ ଯେଉଁମାନଙ୍କର ପୂର୍ବରୁ ଆଲର୍ଜି ରହିଛି, ସେମାନେ ଏହାକୁ ଖାଇବା ପୂର୍ବରୁ ଡାକ୍ତର କିମ୍ବା ବିଶେଷଜ୍ଞଙ୍କ ସହ କଥା ହେବା ଉଚିତ୍ ।