କୋଲକାତା,୧୧/୦୫: ଚଳିତ ଆଇପିଏଲର ୬୦ତମ ଲିଗ୍ ମୁକାବିଲାରେ ଶନିବାର ଘରୋଇ କୋଲକାତା ନାଇଟ୍ ରାଇଡର୍ସ ପଥ ଭ୍ରଷ୍ଟ ମୁମ୍ବାଇ ଇଣ୍ଡିଆନ୍ସକୁ ଭେଟିବ। ୫ଥର ଚାମ୍ପିଅନ୍ ମୁମ୍ବାଇ ଇଣ୍ଡିଆନ୍ସ ଏଥର ପ୍ଲେ-ଅଫ ଦୌଡ଼ରୁ ବାଦ ପଡ଼ି ସାରିଛି । ମାତ୍ର ନାଇଟ ରାଇଡର୍ସ ଚଳିତ ସିଜନରେ ଚମତ୍କାର ଖେଳ ପ୍ରଦର୍ଶନ କରି ପ୍ଲେ- ଅଫ୍ ଦ୍ୱାରରେ ଉପନୀତ ହୋଇଛି । ଶନିବାର ମୁମ୍ବାଇ ଇଣ୍ଡିଆନ୍ସକୁ ହରାଇଲେ ଦଳର ପ୍ଲେ-ଅଫ ସହ ପଏଣ୍ଟ ତାଲିକାର ପ୍ରଥମ ୨ଟି ସ୍ଥାନ ମଧ୍ୟରେ ରହିବା ମଧ୍ୟ ନିଶ୍ଚିତ ହୋଇଯିବ ।
ଉଭୟ ଦଳ ୩ ତାରିଖରେ ପରସ୍ପରକୁ ୱାଙ୍ଖଡ଼େ ଷ୍ଟାଡ଼ିୟମ୍ରେ ଭେଟିଥିଲେ । ନାଇଟ୍ ରାଇଡର୍ସ ଉକ୍ତ ମ୍ୟାଚ୍କୁ ୨୪ ରନ୍ରେ ଜିତିଥିଲା । ୧୨ବର୍ଷ ପରେ ୱାଙ୍ଖଡ଼େରେ ଜିତିବାରେ ସଫଳ ହୋଇଥିଲା ନାଇଟ ରାଇଡର୍ସ । ବର୍ତ୍ତମାନ ମୁମ୍ବାଇ ଇଣ୍ଡିଆନ୍ସର ପ୍ରତିଶୋଧ ନେବା ସମୟ
ପୂର୍ବ ରେକର୍ଡକୁ ଦେଖିଲେ ମୁମ୍ବାଇ ଇଣ୍ଡିଆନ୍ସର ପଲା ଭାରି । ଉଭୟ ଦଳ ପରସ୍ପରକୁ ୩୩ଥର ଭେଟିଛନ୍ତି । ଏଥିରୁ ମୁମ୍ବାଇ ଇଣ୍ଡିଆନ୍ସ ୨୩ଟି ମ୍ୟାଚ୍ ଜିତିଛି । ସେହିପରି କେବଳ ଇଡେନ ଗାର୍ଡେନରେ ଉଭୟ ଦଳ ୧୦ଥର ସାମ୍ନା ସାମ୍ନି ହୋଇଥିବାବେଳେ ମୁମ୍ବାଇ ଇଣ୍ଡିଆନ୍ସ ୭ଟି ମ୍ୟାଚ୍ରେ ବିଜୟୀ ହୋଇଛି । ଚଳିତ ସିଜନରେ ନାଇଟ ରାଇଡର୍ସର ପ୍ରଦର୍ଶନ ଚମତ୍କାର ରହିଛି । ଦଳ ୮ଟି ମ୍ୟାଚ୍ ଜିତି ସାରିଛି । ହାତରେ ଆଉ ୩ଟି ମ୍ୟାଚ୍ ରହିଛି । ତେଣୁ ପ୍ଲେ-ଅଫ୍ରେ ପ୍ରବେଶ କରିବା ନିଶ୍ଚିତ ହୋଇ ସାରିଛି କହିଲେ ଭୁଲ ହେବ ନାହିଁ । ଶନିବାର ରୋହିତ ଶର୍ମା ଓ ସୁନିଲ ନାରାଏନଙ୍କ ମଧ୍ୟରେ ଏକ ଜୋରଦାର ଲଢେଇ ହେବ । ନାରାଏନ୍ ଆଇପିଏଲ୍ରେ ରୋହିତଙ୍କୁ ୧୦ଥର ଆଉଟ୍ କରିସାରିଛନ୍ତି । ଅନ୍ୟ ପଟରେ ଦେଖିବାକୁ ଗଲେ ଇଡେନ ଗାର୍ଡେନ୍ସ ରୋହିତଙ୍କ ପ୍ରିୟ ଗ୍ରାଉଣ୍ଡ । ଏଠାରେ ସେ ଦିନିକିଆରେ ରେକର୍ଡ ୨୬୪ ରନ୍ର ପାଳି ଖେଳିଥିଲେ । ଟେଷ୍ଟ ପଦାର୍ପଣ କରି ଶତକ ଅର୍ଜନ କରିଥିଲେ ।
ଉଭୟ ଦଳ ଶନିବାର ଏକାଦଶ ଅପରିବର୍ତ୍ତିତ ରଖିବା ଆଶା କରାଯାଉଛି । ନିତିଶ ରାଣା ଫିଟ୍ ହୋଇ ସାରିଥିଲେ ହେଁ ଖେଳିବା ସମ୍ଭାବନା ନାହିଁ । ଅଙ୍ଗକ୍ରିଶ ରଘୁବଂଶୀଙ୍କ ସ୍ଥାନରେ ତାଙ୍କୁ ଖେଳାଇବାକୁ ଯୋଜନା କରାଯାଉଛି । ମାତ୍ର ଦଳରେ ୩ଜଣ ବାମ ହାତି ବ୍ୟାଟର ରହିଥିବାରୁ ନିତିଶଙ୍କ ପାଇଁ ସ୍ଥାନ ନାହିଁ । ମୁମ୍ବାଇ ଇଣ୍ଡିଆନ୍ସ ମଧ୍ୟ ଦଳ ଅପରିବର୍ତ୍ତିତ ରଖିବ। ଅଂଶୁଲ କାମ୍ବୋଜ ଶନିବାର ଖେଳିବା ନିଶ୍ଚିତ । ନେହାଲ ୱଧେରା ଓ ପିୟୂଷ ଚାୱଲା ଇମ୍ପାକ୍ଟ ପ୍ଲେୟାର ଭାବେ ସୁଯୋଗ ପାଇବେ।
ଇଡେନ ଗାର୍ଡେନ୍ସ ପିଚ୍ ବ୍ୟାଟିଂ ପାଇଁ ବେଶ ଅନୁକୂଳ । ପ୍ରଥମ ଭାଗ ତୁଳନାରେ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ମାତ୍ର ଶନିବାର ବର୍ଷା ମ୍ୟାଚ୍ରେ ବାଧକ ସାଜିବ । ତଥାପି ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଏକାଦଶ
ନାଇଟ୍ ରାଇଡର୍ସ: ଫିଲ ସଲ୍ଟ, ସୁନିଲ ନାରାଏନ, ଅଙ୍ଗକ୍ରିଶ ରଘୁବଂଶୀ/ନିତିଶ ରାଣା, ଶ୍ରେୟାସ ଆୟର(ଅଧିନାୟକ), ଭେଙ୍କଟେଶ ଆୟର, ଆନ୍ଦ୍ରେ ରସେଲ, ରମଣଦୀପ ସିଂହ, ରିଙ୍କୁ ସିଂହ, ମିଚେଲ ଷ୍ଟାର୍କ, ବରୁଣ ଚକ୍ରବର୍ତ୍ତୀ, ହର୍ଷିତ ରାଣା । (ଇମ୍ପାକ୍ଟ ପ୍ଲେୟାର-ବୈଭବ ଆରୋରା)।
ମୁମ୍ବାଇ ଇଣ୍ଡିଆନ୍ସ: ରୋହିତ ଶର୍ମା, ଇଶାନ କିଷନ, ସୂର୍ଯ୍ୟକୁମାର ଯାଦବ, ନମନ ଧିର, ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା(ଅଧିନାୟକ), ଟିମ ଡେଭିଡ୍, ନେହାଲ ୱଧେରା, ଅଂଶୁଲ କାମ୍ବୋଜ, ଯଶପ୍ରୀତ ବୁମରା, ନୂଆନ ତୁଷାରା । (ଇମ୍ପାକ୍ଟ ପ୍ଲେୟାର- ପିୟୂଷ ଚାୱଲା)।