ନୂଆଦିଲ୍ଲୀ,୦୨/୦୪: ଦୀର୍ଘ ୬ ମାସରୁ ଊଦ୍ଧ୍ୱର୍ ସମୟ ଧରି ଆହତ ଥିବାରୁ ଅଲିମ୍ପିକ୍ସ ରୌପ୍ୟ ବିଜେତା ମୀରାବାଈ ଚାନୁ ଭାରୋତ୍ତୋଳନରୁ ଦୂରେଇ ରହିଥିଲେ । କିନ୍ତୁ ପ୍ରତ୍ୟାବର୍ତ୍ତନରେ ଆକର୍ଷଣୀୟ ପ୍ରଦର୍ଶନ ସହ ସେ ପ୍ୟାରିସ ଅଲିମ୍ପିକ୍ସକୁ ଯୋଗ୍ୟତା ଲାଭ କରିବାରେ ସଫଳ ହୋଇଛନ୍ତି । ଥାଇଲାଣ୍ଡର ଫୁକେଟରେ ଆୟୋଜିତ ଅଲିମ୍ପିକ୍ସ ଯୋଗ୍ୟତା ପର୍ଯ୍ୟାୟ ଆଇଡବ୍ଲ୍ୟୁଏଫ୍ ବିଶ୍ୱକପ୍ରେ (ଗ୍ରୁପ୍ ବି’) ଚାନୁ ତୃତୀୟ ସ୍ଥାନ ହାସଲ କରିଛନ୍ତି । ୪୯ କିଲୋ ବର୍ଗରେ ସେ ମୋଟ୍ ୧୮୪ କିଲୋ ଉତ୍ତୋଳନ କରିଥିଲେ ।
ମଣିପୁରର ୨୯ ବର୍ଷୀୟା ଚାନୁ ପ୍ରତ୍ୟାବର୍ତ୍ତନ ପ୍ରତିଯୋଗିତାରେ ୩ଟି ଥର ସ୍ନାଚ ଉତ୍ତୋଳନରେ ସଫଳ ହୋଇଥିଲେ । କିନ୍ତୁ କ୍ଲିନ୍ ଓ ଜର୍କରେ ପ୍ରଥମ ୨ ଥର ସଫଳ ହେବା ପରେ ଅନ୍ତିମ ପ୍ରୟାସରେ ବିଫଳ ରହିଥିଲେ । ଚାନୁ ସ୍ନାଚରେ ୮୧ କିଲୋ ଏବଂ କ୍ଲିନ୍ ଓ ଜର୍କରେ ୧୦୩ କିଲୋ ଉଠାଇଥିଲେ । ୨୦୨୧ ଏସିଆନ୍ ଚାମ୍ପିଅନସିପ୍ରେ ମୋଟ୍ ୨୦୫ କିଲୋ ଉତ୍ତୋଳନ କରି ନିଜର ଶ୍ରେଷ୍ଠ ପ୍ରଦର୍ଶନ ଦେଇଥିଲେ । ନିଜ ପ୍ରଦର୍ଶନକୁ ନେଇ ଚାନୁ ବେଶ ଖୁସି ରହିଛନ୍ତି ।
ସେ କହିଛନ୍ତି, ‘ଆହତରୁ ପ୍ରତ୍ୟାବର୍ତ୍ତନ କରି ଯେଉଁ ପ୍ରଦର୍ଶନ ଦେଇଛି ସେନେଇ ବହୁତ ଖୁସି ରହିଛି । ଅଲିମ୍ପିକ୍ସ ଟିକେଟ୍ ହାସଲ କରିବା ମୋର ଲକ୍ଷ୍ୟ ଥିଲା । ତାହା ତ ପୂରଣ ହୋଇଛି । କିନ୍ତୁ ଏବେ ମୋର ପରବର୍ତ୍ତୀ ଲକ୍ଷ୍ୟ ହେଉଛି ପ୍ୟାରିସରେ ପୋଡିୟମ ଶେଷ କରିବା ।’ ପ୍ରତିଯୋଗିତାକୁ ନେଇ ଚାନୁ ଦୃଢ଼ମନା ଥିବା କହିଥିଲେ ।
ଗତ ବର୍ଷ ସେପ୍ଟେମ୍ବର ମାସରେ ଚାନୁ ଏସୀୟ କ୍ରୀଡ଼ାରୁ ଖାଲି ହାତରେ ଫେରିଥିଲେ । ଜଙ୍ଘରେ ଆଘାତ ଲାଗିବାରୁ ସେ ନିଜର ଶ୍ରେଷ୍ଠ ପ୍ରଦର୍ଶନ ଦେବାରେ ବିଫଳ ହୋଇଥିଲେ । ମୋଟ୍ ୧୯୧ କିଲୋ (୮୩+୧୦୮) ଉତ୍ତୋଳନ କରି ଚତୁର୍ଥ ସ୍ଥାନରେ ରହିଥିଲେ ।
ଚାନୁଙ୍କ ପ୍ରତ୍ୟାବର୍ତ୍ତନ ପରେ ଭାରୋତ୍ତୋଳନରେ ପ୍ୟାରିସରେ ଭାରତର ପଦକ ଆଶା ଉଜ୍ଜୀବିତ ହୋଇଛି । ଜାତୀୟ ଭାରୋତ୍ତୋଳନ କୋଚ୍ ବିଜୟ ଶର୍ମା କହିଛନ୍ତି, ‘ଚାନୁଙ୍କ ଉପରେ ଆମର ବିଶେଷ ଧ୍ୟାନ ରହିଥିଲା । ଆଜି ତାଙ୍କ ପ୍ରଦର୍ଶନ ବେଶ ଉଦ୍ଭୁତ ଥିଲା । ସେ ବି ଦୃଢ଼ ଆତ୍ମବିଶ୍ୱାସୀ ଥିଲେ । ତାଙ୍କ ସଫଳତାକୁ ନେଇ ଆମେ ଖୁସି ରହିଛୁ । ଏଥର ଅଲିମ୍ପିକ୍ସ ପ୍ରସ୍ତୁତି ଉପରେ ଆମେ ଫୋକସ କରିବୁ ।’
