ଭୁବନେଶ୍ୱର, ୩।୧୧: ବନ ଉନ୍ନୟନ ନିଗମ ପକ୍ଷରୁ ଜୟଦେବ ବାଟିକା ଭ୍ରମଣ ସମୟ ପରିବର୍ତ୍ତନ କରାଯାଇଛି । ଏଣିକି ସକାଳ ୮ଟାରୁ ରାତି ୮ଟା ଯାଏ ବାଟିକା ଖୋଲା ରହିବ । ମଝିରେ ଆଉ ବନ୍ଦ ହେବ ନାହିଁ । ସେହିପରି ବାଟିକା ଟିକଟ ଦର ମଧ୍ୟ ହ୍ରାସ ପାଇଛି । ପ୍ରକାଶ ଯେ, ପୂର୍ବରୁ ସକାଳେ ପାର୍କ ଖୋଲାଯାଇ ସନ୍ଧ୍ୟା ୫ଟାରୁ ୬ଟା ବନ୍ଦ ରହୁଥିଲା । ସନ୍ଧ୍ୟା ୬ଟାରୁ ଦ୍ୱିତୀୟ ପର୍ଯ୍ୟାୟରେ ପାର୍କ ଖୋଲା ହୋଇ ରାତି ୯ଟାରେ ବନ୍ଦ ହେଉଥିଲା । ଏହାକୁ ନେଇ ଲୋକେ ଅସନ୍ତୋଷ ପ୍ରକାଶ କରିଥିଲେ । କାରଣ ଯେଉଁମାନେ ଅପରାହ୍ଣ ୪ଟାରେ ପାର୍କ ବୁଲିବାକୁ ଆସୁଥିଲେ ସେମାନଙ୍କୁ ୫ଟାରେ ବାହାରିବାକୁ ପଡୁଥିଲା । ଏତେ ଟଙ୍କା ଦେଇ ଟିକଟ୍ କରିବା ପରେ ୧ ଘଣ୍ଟା ନରହି ପାର୍କରୁ ବାହାରିଯିବାକୁ ନେଇ ସେମାନେ ଅସନ୍ତୋଷ ପ୍ରକାଶ କରୁଥିଲେ । ଏଥିଯୋଗୁ ଧୀରେ ଧୀରେ ଲୋକଙ୍କ ସଂଖ୍ୟା କମିବାରେ ଲାଗିଥିଲା । ଫଳରେ ନିୟମରେ ପରିବର୍ତ୍ତନ କରାଯାଇଛି ।
ସେହିପରି ଟିକଟ ଦର ମଧ୍ୟ କମିଛି । ପୂର୍ବରୁ ଦିନବେଳା ପାର୍କ ବୁଲି ଆସୁଥିବା ୧୨ବର୍ଷରୁ ଅଧିକ ବୟସ୍କଙ୍କୁ ୩୦ଟଙ୍କା ଦେବାକୁ ପଡ଼ୁଥିଲା । କିନ୍ତୁ ରାତି ବେଳେ ୫୦ଟଙ୍କା ବଢ଼ାଇ ଦିଆଯାଇଥିଲା । ହେଲେ ଏବେ ସକାଳୁ ସନ୍ଧ୍ୟା ଯାଏ ୪୦ଟଙ୍କା ଟିକେଟ୍ ଦର ସ୍ଥିର ହୋଇଛି । ସେପଟେ ୧୨ରୁ କମ୍ ବୟସ ପିଲାଙ୍କ ଟିକଟ ଦର ୧୫ରୁ ୨୦ ଟଙ୍କାକୁ ବଢ଼ାଇ ଦିଆଯାଇଛି । ଦିନରେ ଦୁଇ ଚକିଆ ଯାନ ଲାଗି ପ୍ରବେଶ ଶୁକ୍ଳ ୩୦ଟଙ୍କା ଥିଲା, ରାତିବେଳା ୫୦ଟଙ୍କା କରାଯାଇଥିଲା । ଏବେ ୩୦ଟଙ୍କା ହୋଇଛି । ଦିନବେଳା ତିନିଚକିଆ ଲାଗି ଟିକେଟ୍ ଦର ୫୦ଟଙ୍କା ଥିବାବେଳେ ରାତି ପାଇଁ ୮୦ଟଙ୍କା ଥିଲା । ଏବେ ତିନି ଚକିଆକୁ ୫୦ଟଙ୍କା ଦେବାକୁ ପଡ଼ିବ । ୪ଚକିଆ ଯାନ ଲାଗି ଦିନର ଟିକେଟ୍ ଦର ୧୦୦ଟଙ୍କା ରଖାଯାଇଥିବା ବେଳେ ରାତିରେ ୧୫୦ଟଙ୍କା ନିଆଯାଉଥିଲା । ଏବେ ପୁଣି ୧୦୦ଟଙ୍କା ହୋଇଯାଇଛି । ତା’ସହିତ ୫୦୦ଟଙ୍କାରୁ ଅଧିକ ହେଲେ ଜିଏସ୍ଟି ୧୮ ପ୍ରତିଶତ ଲାଗିବ । ନଭେମ୍ବର ୧ରୁ ଏହି ନୂତନ ନିୟମ ଓ ଦର ଲାଗୁ ହୋଇଛି । ହକି ବିଶ୍ୱକପ୍ ବେଳେ ରାତି ୯ଟା ଯାଏ ପାର୍କ ଖୋଲିବା ପାଇଁ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ବନ ନିଗମକୁ ପ୍ରସ୍ତାବ ଦେଇଥିଲା । ଦିନ ଅପେକ୍ଷା ରାତିରେ ଟିକେଟ୍ ଦର ବୃଦ୍ଧି କରାଯାଇଥିଲା ।
