ନୂଆଦିଲ୍ଲୀ,୨୪/୦୮: ୧୨ ବର୍ଷ ପୂର୍ବେ ଦିଲ୍ଲୀର ନିର୍ଭୟା ଘଟଣା ସାରା ଦେଶକୁ ଥରାଇ ଦେଇଥିଲା। ଏହି ଘଟଣା ପରେ ଦେଶରେ ଅନେକ ପରିବର୍ତ୍ତନ ହୋଇଛି। ସରକାର ବଦଳିଛି, ଆଇନ ବଦଳିଛି, ଟେକ୍ନୋଲୋଜି ବଦଳିଛି, ଦେଶ ପ୍ରତ୍ୟେକ ଦିଗରେ ଅଗ୍ରଗତି ବି କରିଛି, ଏହି ବିକାଶରେ ମହିଳାଙ୍କ ଅଂଶଗ୍ରହଣ ବୃଦ୍ଧି ବି ପାଇଛି। କିନ୍ତୁ ବର୍ଷ ବଦଳିଗଲା, ସ୍ଥାନ ବଦଳିଗଲା ହେଲେ ଯଦି କିଛି ପରିବର୍ତ୍ତନ ହୋଇନଥାଏ ତେବେ ଦେଶର ଝିଅ ଏବଂ ମହିଳାଙ୍କ ପ୍ରତି ହେଉଥିବା ଅତ୍ୟାଚାର। ଭାରତୀୟ ସମାଜରେ ପୁରୁଷ ପ୍ରାଧାନ୍ୟର ବିଚାର ଧାରା ଏନେକ ନୃଶଂସଙ୍କ ମନରେ ଭରି ରହିଛି।

ପୁଣି ଥରେ ସମଗ୍ର ଦେଶ ଚକିତ, କ୍ରୋଧିତ, ବିରୋଧ କରୁଛନ୍ତି - ଏକମାତ୍ର ପାର୍ଥକ୍ୟ ହେଉଛି ଏଥର ଦିଲ୍ଲୀ ବଦଳରେ କୋଲକାତା ଏବଂ ନିର୍ଭୟାଙ୍କ ସ୍ଥାନରେ ଅଭୟା। ନିର୍ଭୟାର ଦୋଷୀଙ୍କୁ ଆଠ ବର୍ଷ ପରେ ଫାଶିଦଣ୍ଡ ଦିଆଯାଇଥିଲା। ବିଶ୍ୱାସ କରାଯାଉଥିଲା ଯେ ଏହି ଦଣ୍ଡ ପରେ ଦେଶରେ ଏପରି ଘଟଣା ଆଉ ଦେଖିବାକୁ ମିଳିବନି। କିନ୍ତୁ ପ୍ରତିଦିନ ଏ ଘଟଣା ଘଟୁଛି, କେବଳ ପାର୍ଥକ୍ୟ ହେଉଛି କିଛି ଘଟଣା ଅଧିକ ନୃଶଂସ, ବର୍ଷ ବର୍ଷ ଧରି ଶୋଇଥିବା ଦେଶ ପୁଣି ଥରେ ଜାଗ୍ରତ ହୁଏ, କିଛି ଦିନ ଧରି ଗଣମାଧ୍ୟମ ତଥା ସମାଜର ଚେତନାରେ ଏହି ପ୍ରସଙ୍ଗ ଗରମ ରୁହେ,.... ଆଉ ତା' ପରେ ଯୋଉ ନିରବତାକୁ ସେଇଆ। 

ଚିନ୍ତାଧାରା ବଦଳିଲେ ସମାଜ ବଦଳିବ: 

କୋଲତାର ଆର ଜି କର ମେଡିକାଲ କଲେଜରେ ଜଣେ ଜୁନିଅର ମହିଳା ପ୍ରଶିକ୍ଷକ ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ପରେ ପ୍ରଶ୍ନ ଉଠିଛି ଯେ ନିର୍ଭୟା ମାମଲା ପରେ ଦୁଷ୍କର୍ମ ବିରୋଧରେ ଆଇନ କଡ଼ାକଡ଼ି କରାଯିବା ପରେ ମଧ୍ୟ ଏପରି ଅପରାଧ କରିବା ପୂର୍ବରୁ ଅପରାଧୀଙ୍କ ମନରେ ଭୟ କାହିଁକି ସୃଷ୍ଟି ହୁଏ ନାହିଁ? ନିର୍ଦ୍ଦୟତା କାହିଁକି ବନ୍ଦ ହେଉ ନାହିଁ? କାଉନସିଲ୍ ଇଣ୍ଡିଆର ସାଇକୋଲୋଜିଷ୍ଟ ତଥା ମାନସିକ ସ୍ବାସ୍ଥ୍ୟ ବିଶେଷଜ୍ଞ ନିଶି କହିଛନ୍ତି ଯେ ଆଇନ ପରିବର୍ତ୍ତନ କରିବାର ସ୍ଥାନ ଅଛି, କିନ୍ତୁ ଏହା ଆହୁରି ଗୁରୁତ୍ୱପୂର୍ଣ୍ଣ। ସମାଜର ଚିନ୍ତାଧାରାକୁ ପରିବର୍ତ୍ତନ କରିବା, ଯେଉଁଠାରେ ମହିଳାମାନେ ସର୍ବଦା ଅବହେଳିତ ହୋଇ ଆସୁଛନ୍ତି।

ତଥ୍ୟ କହୁଛି ଅନେକ ନିର୍ଭୟାଙ୍କ କାହାଣୀ:

ନ୍ୟାସନାଲ କ୍ରାଇମ ରେକର୍ଡସ ବ୍ୟୁରୋ (ଏନସିଆରବି) ତଥ୍ୟ ଦର୍ଶାଉଛି ଯେ ୨୦୧୨ ରେ ମହିଳାଙ୍କ ବିରୋଧରେ ୨,୪୪,୨୭୦ ଅପରାଧ ପଞ୍ଜିକୃତ ହୋଇଥିଲା, ସେଥିମଧ୍ୟରୁ ୨୪,୯୨୩ ଟି ଦୁଷ୍କର୍ମ ମାମଲା ଥିଲା। ଘଟଣାର ଏକ ଦଶନ୍ଧି ପରେ, ତମାମ ମାମଲା କମିବା ପରିବର୍ତ୍ତେ ଏପରି ଘଟଣା ଦ୍ରୁତ ଗତିରେ ବୃଦ୍ଧି ପାଇଛି। ଏନସିଆରବିର ସର୍ବଶେଷ ତଥ୍ୟ ଅନୁଯାୟୀ, ୨୦୨୨ ମସିହାରେ ମହିଳାଙ୍କ ବିରୋଧରେ ୪,୪୫,୨୫୬ ଅପରାଧ ପଞ୍ଜିକୃତ ହୋଇଥିଲା, ସେଥିମଧ୍ୟରୁ ୩୧,୫୧୬ ଟି ଦୁଷ୍କର୍ମ ମାମଲା ଘଟିଥିଲା।

ପ୍ରଭାବ ପକାଉଛି ସିନେମା: 

ସେ ଆହୁରି ମଧ୍ୟ କହିଛନ୍ତି, 'ଚଳଚ୍ଚିତ୍ର ମଧ୍ୟ ସମାଜ ଉପରେ ପ୍ରଭାବ ପକାଇଥାଏ। ସେ କହିଛନ୍ତି ଯେ ନିକଟରେ କବୀର ସିଂ ଏବଂ ଆନିମଲ ଭଳି ଚଳଚ୍ଚିତ୍ର ରିଲିଜ୍‌ ହୋଇଥିଲା, ଯେଉଁଥିରେ ମହିଳାଙ୍କ ପ୍ରତି କୌଣସି ସମ୍ମାନ ନଥିବା ଦେଖିବାକୁ ମିଳିଥିଲା। ସେମାନଙ୍କ ଉପରେ ହାତ ମଧ୍ୟ ଉଠାଯାଇଥିଲା। ଯେଉଁ ଦିଗରେ ମାନସିକ ବିକାଶ ଘଟୁଛି ସେହି ଦିଗରେ ବଲିଉଡ ମଧ୍ୟ ପୂରୁଷ କୈନ୍ଦ୍ରିକ ସିନେମା କରିବାରେ ଏକ ପ୍ରମୁଖ ଭୂମିକା ଗ୍ରହଣ କରୁଛି।