ନୂଆଦିଲ୍ଲୀ,୨୨।୮:କୋଲକାତା ଆରଜି କର ମେଡିକାଲ କଲେଜରେ ଟ୍ରେନି ଡାକ୍ତରଙ୍କ ସହ ହୋଇଥିବା ଦୁଷ୍କର୍ମ ଓ ହତ୍ୟା ମାମଲାରେ ଜାରି ରହିଛି ସିବିଆଇ ତଦନ୍ତ । ଏବେ ଏହି ମାମଲାର ଅଭିଯୁକ୍ତ ସଞ୍ଜୟ ରୟର ସିବିଆଇ ସାଇକୋଆାନାଲିସିସ୍ କରିଛି, ଯେଉଁଥିରେ ଆଶ୍ଚର୍ଯ୍ୟକର କଥାର ଖୁଲାସା ହୋଇଛି। ସାମନାକୁ ଆସିଥିବା ତଥ୍ୟ ଅନୁସାରେ, ଅଭିଯୁକ୍ତ ସଞ୍ଜୟ ଯୌନ ବିକୃତ ମାନସିକତା ଥିବା ବ୍ୟକ୍ତି। ତା’ର ‘ପଶୁ ପରି ପ୍ରବୃତ୍ତି’ ଅଛି। ପରୀକ୍ଷା ସମୟରେ ସାଇକୋଆନାଲିଷ୍ଟ ଦଳ ଜାଣିବାକୁ ପାଇଥିଲେ ଯେ, ସଞ୍ଜୟଠାରେ କୌଣସି ପଶ୍ଚାତାପ ନାହିଁ। ଅନେକ ଥର ସେ ଉତ୍ତର ଦେବାବେଳେ ହସୁଥିଲା। ସେ ସାଇକୋଆନାଲିଷ୍ଟ ଦଳକୁ ସବୁକିଛି କହିଛି।ସିବିଆଇ ଏକ୍ସପର୍ଟ କହିଛନ୍ତି, ସଞ୍ଜୟର ବୟାନକୁ ମଧ୍ୟ ସ୍କାନ କରାଯାଇଛି। ତାକୁ ପୋଷ୍ଟମର୍ଟମ ଓ ଫରେନସିକ୍ ଯାଞ୍ଚ ସହ ଯୋଡିବାକୁ ଚେଷ୍ଟା ହେଉଛି।
‘ଟାଇମ୍ସ ଅଫ୍ ଇଣ୍ଡିଆ’ର ରିପୋର୍ଟ ଅନୁସାରେ ସିବିଆଇ ଅଧିକାରୀ କହିଛନ୍ତି, ଅପରାଧ ହୋଇଥିବା ସ୍ଥାନରେ ସଞ୍ଜୟ ରୟର ଉପସ୍ଥିତିର ଟେକ୍ନିକାଲ ଓ ସାଇଣ୍ଟିଫିକ୍ ପ୍ରମାଣ ମିଳିଛି। ସିବିଆଇ ଯେତେବେଳେ ମାମଲାକୁ ନିଜ ହାତରେ ନେଇଥିଲା, ତା ପୂର୍ବରୁ କୋଲାକାତା ପୋଲିସ କହିଥିଲା ଦୁଷ୍କର୍ମ ପୀଡିତାଙ୍କ ନଖରୁ ନିଆଯାଇଥିବା ରକ୍ତ ଓ ସ୍କିନ୍ରେ ଥିବା ଚିହ୍ନ ସଞ୍ଜୟ ରୟର ହାତରେ ଥିବା ଖଣ୍ଡିଆ ସହ ମ୍ୟାଚ୍ ହେଉଛି। ଏହି ମାମଲାରେ ଏପର୍ଯ୍ୟନ୍ତ ହୋଇଥିବା ଯାଞ୍ଚର ଷ୍ଟାଟସ୍ ରିପୋର୍ଟ ସିବିଆଇ ସୁପ୍ରିମକୋର୍ଟରେ ଆଜି ପ୍ରଦାନ କରିଛି।
ସିବିଆଇର ସୁତ୍ରର କହିବା ଅନୁସାରେ, ଆରଜି କର ହସ୍ପିଟାଲରୁ ଜବତ ସିସିଟିଭି ଫୁଟେଜରେ ଦେଖିବାକୁ ମିଳୁଛି ସଞ୍ଜୟ ରୟ ୮ ଅଗଷ୍ଟ ସକାଳ ୧୧ଟା ବେଳେ ଚେଷ୍ଟ ଡିପାର୍ଟମେଣ୍ଟରେ ଥିଲା। ଏହି ସମୟରେ ପୀଡିତା ଅନ୍ୟ ୪ ଜଣ ଜୁନିଅର ଡାକ୍ତରଙ୍କ ସହ ଓ୍ବାର୍ଡରେ ଥିଲେ। ସେତେବେଳେ ସଞ୍ଜୟ ସେଠାରୁ ଯିବା ପୂର୍ବରୁ ପୀଡିତାଙ୍କୁ ଦେଖୁଥିବାର ମିଳିଛି। ପୁଚରା ଉଚରା ବେଳେ ସଞ୍ଜୟ କହିଛି ସେ ସନ୍ଧ୍ୟା ପୂର୍ବରୁ ଓ୍ବାର୍ଡକୁ ଆସିଯାଇଥିଲା। ୯ ଅଗଷ୍ଟରେ ପୀଡିତା ଅନ୍ୟ ଡାକ୍ତରଙ୍କ ସହ ଡିନର କରିଥିଲେ। ଏହାପରେ ରାତି ୧ଟାରେ ସେମିନାଲ ହଲ୍କୁ ଫେରିଥିଲେ। ପାୟ ଅଢେଇଟା ବେଳେ ଜଣେ ଜୁନିଅର ଡାକ୍ତର ହଲ୍ ଭିତରକୁ ପ୍ରବେଶ କରିଥିଲେ ଓ ପୀଡିତା ଶୋଇବା ପୂର୍ବରୁ ତାଙ୍କ ସହ କଥା ହୋଇତିଲେ। ଏହାପରେ ଭୋର ୪ଟା ବେଳେ ସଞ୍ଜୟ ସିସିଟିଭିରେ କଏଦ ହୋଇଛି ଓ ତଦନ୍ତକାରୀ ଅଧିକାରୀଙ୍କ କହିବା ଅନୁସାରେ, ଏହାପରେ ସିଧା ସେ ସେମିନାର ହଲ୍କୁ ଯାଇଥିଲା, ଯେଉଁଠି ପୀଡିତା ଶୋଇଥିଲେ।
