ମାଲକାନଗିରି, ୭।୬: ମାଲକାନଗିରି ଜିଲ୍ଲା ସୀମାନ୍ତରେ ସୁରକ୍ଷାବଳଙ୍କ ଶିବିର ଉପରେ ମାଓବାଦୀମାନେ ଲଞ୍ଚର ମାଡ଼ କରିଛନ୍ତି । ସୁରକ୍ଷାକର୍ମୀ ମଧ୍ୟ ତାର ପାଲଟା ଜବାବ ଦେଇଛନ୍ତି । ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ ରାଜ୍ୟ ନାରାୟଣପୁର ଜିଲ୍ଲା କୋହକେମେଟାର ଇରାକବତୀ ସୁରକ୍ଷା ଶିବିର ଉପରକୁ ନକ୍ସଲମାନେ ବିଜିଏଲ ଲଞ୍ଚର ଓ ଗୁଳି ଚଳାଇ ଆକ୍ରମଣ କରିଥିଲେ । ତା’ର ପାଲଟା ଜବାବରେ ଯବାନମାନେ ମଧ୍ୟ ଗୁଳି ଚଲାଇଥିଲେ ।
ତେବେ ଏହି ଆକ୍ରମଣରେ କ୍ୟାମ୍ପ କିମ୍ବା କୌଣସି ଯବାନଙ୍କର କିଛି ବି କ୍ଷୟକ୍ଷତି ହୋଇନାହିଁ ବୋଲି ଜଣାପଡ଼ିଛି । ମିଳିଥିବା ସୂଚନାନୁସାରେ, ଛତିଶଗଡ଼ର ନାରାୟଣପୁର ଜିଲ୍ଲା କୋହକେମେଟା ପୋଲିସ ଷ୍ଟେସନ ଅଧୀନରେ ଥିବା ନୂତନ ପ୍ରତିଷ୍ଠିତ ଇରାକବତୀ ସୁରକ୍ଷା ବଳ ଶିବିରରେ ଗୁରୁବାର ନକ୍ସଲମାନେ ୪ ଟି ଦେଶୀ ବିଜିଏଲ୍ ଲଞ୍ଚର ଚଳାଇବା ସହ ଗୁଳି ଚଳାଇଥିଲେ । ସେଥିମଧ୍ୟରୁ କେବଳ ଗୋଟିଏ ବିଜିଏଲ ବିସ୍ଫୋରଣ ହୋଇଥିଲା । ଏହି ଆକ୍ରମଣ ପରେ ଶିବିରରେ ନିୟୋଜିତ ଯବାନମାନେ ତୁରନ୍ତ ପ୍ରତି ଆକ୍ରମଣ ପାଇଁ ପ୍ରସ୍ତୁତ ହୋଇଥିବା ବେଳେ ଏହା ଦେଖି ନକ୍ସଲମାନେ ଘଞ୍ଚ ଜଙ୍ଗଲରେ ଲୁଚି ପଳାଇଥିଲେ । ତେବେ ଏହାପରେ ଯବାନମାନେ ଆଖପାଖ ଅଞ୍ଚଳରେ ଜୋରସୋରରେ ଖୋଳତାଡ଼ ଚଳାଇଛନ୍ତି ।