ମୁମ୍ବାଇ, ୧୧।୫: ବହିକୁ ନେଇ ଫସିଲେ ବଲିଉଡ ଅଭିନେତ୍ରୀ କରୀନା କପୁର ଖାନ୍ । ଅଭିନେତ୍ରୀ ୨୦୨୧ ମସିହା ଜୁଲାଇ ମାସରେ ତାଙ୍କର ଏକ ବହି 'କରୀନା କପୁର ଖାନ୍ ପ୍ରେଗ୍ନେନସି ବାଇବେଲ'ର ଲଞ୍ଚ କରିଥିଲେ । ବର୍ତ୍ତମାନ ଏହି ବହିର ନାମକୁ ନେଇ ଫସିଛନ୍ତି ଅଭିନେତ୍ରୀ । ଜଣେ ଓକିଲ ବହିରେ 'ବାଇବେଲ' ଶବ୍ଦର ବ୍ୟବହାରକୁ ନେଇ ଆପତ୍ତି କରିବା ସହିତ ଅଭିନେତ୍ରୀଙ୍କ ବିରୋଧରେ ହାଇକୋର୍ଟରେ ମାମଲା ରୁଜୁ କରିଥିଲେ । ଏନେଇ କରୀନାଙ୍କୁ କୋର୍ଟକୁ ନୋଟିସ ପଠାଯାଇଛି ।
ସୂଚନା ମୁତାବକ, ହାଇକୋର୍ଟ କରୀନାଙ୍କୁ ନୋଟିସ ଜାରି କରିଛି । ତାଙ୍କ ବହିର ଟାଇଟଲକୁ ନେଇ ଅଭିଯୋଗ ହୋଇଛି ଯେ, ଅଭିନେତ୍ରୀ ବହିର ନାମରେ ବାଇବେଲ ଶବ୍ଦର ବ୍ୟବହାର କରିବା ଦ୍ୱାରା ଖ୍ରୀଷ୍ଟିଆନ ଧର୍ମର ଧାର୍ମିକ ଭାବନାକୁ ଅପମାନ ହୋଇଛି । ଜବଲପୁରର ସିବିଲ ଲାଇନର ନିବାସୀ କ୍ରିଷ୍ଟୋଫର ଏଥୋନି ହାଇକୋର୍ଟରେ କରୀନାଙ୍କ ବିରୋଧରେ ମାମଲା ରୁଜୁ କରି ତାଙ୍କ ଉପରେ ଅପରାଧିକ ମକଦ୍ଦମା କରିବାକୁ ଦାବି କରିଛନ୍ତି ।
କ୍ରିଷ୍ଟୋଫର ଏଥୋନି ଅଭିଯୋଗ କରିଛନ୍ତି ଯେ, କରୀନା ତାଙ୍କ ଶସ୍ତା ଲୋକପ୍ରିୟତା ପାଇବା ପାଇଁ ଏହି ବହି ଲେଖିଛନ୍ତି । ବହିର କଭରରେ ବାଇବେଲ ଶବ୍ଦର ବ୍ୟବହାର ଆପତ୍ତିଜନକ ଅଟେ । ଏଥୋନିଙ୍କ ଅଭିଯୋଗ ପରେ ଜଷ୍ଟିସ ଗୁରୁପାଲ ସିଂ କରୀନାଙ୍କୁ ନୋଟିସ ପଠାଇଛନ୍ତି । ସେପଟେ ଅଭିଯୋଗକାରୀ ଅଭିନେତ୍ରୀଙ୍କ ଏହି ବହିକୁ ବ୍ୟାନ୍ କରିବାକୁ ଦାବି କରିଛନ୍ତି ।