ନୂଆଦିଲ୍ଲୀ,୨୧/୦୯: ଋଷର ଉତ୍ତର ନ୍ୟୁକ୍ଳିୟର ଟେଷ୍ଟ ସାଇଟରେ ସୁଡ଼ଙ୍ଗ ତିଆରି କରାଯାଉଛି। ଏକ ଜାପାନୀ ଥିଙ୍କ୍ ଟ୍ୟାଙ୍କ ନିକଟରେ ସାଟେଲାଇଟରୁ ନେଇଥିବା ଫଟୋକୁ ଆଧାର କରି ଏହି ଦାବି କରିଛି। ସାଟେଲାଇଟ ଫଟୋକୁ ଆଧାର କରି ୧୮ ସେପ୍ଟେମ୍ବର ୨୦୨୪ରେ ଟୋକିଓ ବିଶ୍ବବିଦ୍ୟାଳୟର ଆଡ୍ଭାନ୍ସ ସାଇନ୍ସ ଆଣ୍ଡ୍ ଟେକ୍ନୋଲୋଜୀର ଓପନ୍ ଲାବୋରେଟୋରୀ ଇମେଜେସ୍ ଷ୍ଟ୍ରାଟେଜିସ୍ ଏହାର ରିପୋର୍ଟରେ ଋଷର ଉତ୍ତର ନୋବାୟା ଜେମଲ୍ୟା ପରମାଣୁ ପରୀକ୍ଷଣ ସ୍ଥଳର ଗୁରୁତ୍ବପୂର୍ଣ୍ଣ ଗତିବିଧି ବିଷୟରେ ଉଲ୍ଲେଖ କରିଥିଲେ। ଏହି ଚିତ୍ରଗୁଡ଼ିକରୁ ସମ୍ଭାବ୍ୟ ଆଣବିକ ପରୀକ୍ଷଣ ଏବଂ ଉନ୍ନତ ଅସ୍ତ୍ର ପ୍ରଣାଳୀର ବିକାଶ, ବିଶେଷକରି ବ୍ୟୁରଓ୍ବେଷ୍ଟନିକ ନ୍ୟୁକ୍ଳିୟର ପାଓ୍ବାର କ୍ରୁଜ୍ କ୍ଷେପଣାସ୍ତ୍ର ତିଆରି କରାଯିବା ବିଷୟରେ କଳ୍ପନା ଜଳ୍ପନା ଆରମ୍ଭ ହୋଇଛି।
ୟୁରାସିଆନ୍ ଟାଇମ୍ସର ରିପୋର୍ଟ ଅନୁସାରେ, ରୋଲ୍ସ ପ୍ରଥମେ ପାଇଥିଲେ ଯେ, ଅଧିକ ତାପମାତ୍ରାରେ ପରମାଣୁ ପରୀକ୍ଷଣ ସୁଡ଼ଙ୍ଗରୁ ମାଟି କଢ଼ାଯାଉଥିଲା। ଗ୍ରୀଷ୍ମ ଋତୁ ପରେ ଏଠାରେ ଅନେକ ପ୍ରକାର ଅତିରିକ୍ତ କାର୍ଯ୍ୟକଳାପ ଦେଖିବାକୁ ମିଳିଥିଲା। ଏହି କାର୍ଯ୍ୟକଳାପ ହେତୁ ପରମାଣୁ ପରୀକ୍ଷଣ ଏବଂ ଅସ୍ତ୍ରଶସ୍ତ୍ର ବିକାଶ ସମ୍ବନ୍ଧରେ ଋଷର ଉଦ୍ଦେଶ୍ୟ ବିଷୟରେ କଳ୍ପନା ଜଳ୍ପନା ବଢ଼ିବାରେ ଲାଗିଛି। ଏହି କଳ୍ପନାଜଳ୍ପନା ବୃଦ୍ଧି ପାଇଛି କାରଣ ଋଷର ବିଶିଷ୍ଟ ବୈଜ୍ଞାନିକ ମିଖାଇଲ୍ କୋଭାଲଚୁକ୍ କିଛି ସମୟ ପୂର୍ବରୁ ନୋଭାୟା ଜେମଲିଆରେ ପରମାଣୁ ପରୀକ୍ଷଣର ପୁନଃ ଆରମ୍ଭ କରିବାକୁ ସମର୍ଥନ କରିଥିଲେ।
ସେପ୍ଟେମ୍ବରରୁ ସାଟେଲାଇଟ୍ ଚିତ୍ରଗୁଡ଼ିକରୁ ସାଇଟର କେତେକ ସ୍ଥାନରୁ ମାଟି ଖୋଳାଯାଉଥିବାର ଦେଖାଇଛି, ଏହାର ଅର୍ଥ ହେଉଛି ସୁଡ଼ଙ୍ଗଗୁଡିକର କାମ ଚାଲିଛି। କେବଳ ଏତିକି ନୁହେଁ, ସାଟେଲାଇଟ ଫଟୋରେ କିଛି ବଡ଼ ଆକାରର ପରିବହନ ଜାହାଜ ଏବଂ ରୋଜାଟମ୍ ବିମାନର ଆଗମନ, ଏବଂ ନୋଭାୟା ଜେମଲିଆରେ ବୃହତ ଆକାରର ନିର୍ମାଣ ଦେଖିବାକୁ ମିଳିଛି। ଏହି କାର୍ଯ୍ୟକଳାପ ଋଷର ଚାଲିଥିବା ଆଣବିକ ପରୀକ୍ଷଣ ସହିତ ଜଡିତ କି ନାହିଁ ତାହା ସ୍ପଷ୍ଟ ହୋଇନାହିଁ ବୋଲି ରୋଲ୍ସ ଥିଙ୍କ ଟ୍ୟାଙ୍କ କହିଛି, କିନ୍ତୁ ଏହା କିଛି ଗୁରୁତ୍ୱପୂର୍ଣ୍ଣ ପ୍ରସ୍ତୁତିକୁ ସୂଚିତ କରିଛି।
