ମୁମ୍ବାଇ: ଲୋକସଭା ନିର୍ବାଚନ ଲାଗି ଭାରତୀୟ ଜନତା ପାର୍ଟି (ବିଜେପି) ସପ୍ତମ ପ୍ରାର୍ଥୀ ତାଲିକା ଜାରି କରିଛି । ଏଥିରେ ମହାରାଷ୍ଟ୍ରର ଅମରାବତୀ ଆସନରୁ ନବନୀତ ରାଣାଙ୍କୁ ଟିକେଟ୍ ଦେଇଛି ବିଜେପି । ସେହିଭଳି ଦକ୍ଷିଣ ଭାରତ ରାଜ୍ୟ କର୍ଣ୍ଣାଟକର ଚିତ୍ରଦୁର୍ଗ ଆସନରେ ଗୋବିନ୍ଦ କରଜୋଲଙ୍କୁ ପ୍ରାର୍ଥୀ କରିଛି ଦଳ । ତେବେ ନବନୀତ ରାଣାଙ୍କୁ ଟିକେଟ ଦିଆଯିବା ପରେ ମହାରାଷ୍ଟ୍ର ଏନଡିଏ ମେଣ୍ଟରେ ଅସନ୍ତୋଷ ପ୍ରକାଶ ପାଇଛି ।
ଏକନାଥ ସିନ୍ଦେ ଗୋଷ୍ଠୀର ଆନନ୍ଦରାଓ ଏବେ ଅମରାବତୀ ସିଟ୍ରୁ ନିର୍ବାଚନ ଲଢ଼ିବେ ବୋଲି ଜିଦ ଧରିଛନ୍ତି । ନବନୀତ ରାଣା ଅମାରାବତୀର ସାଂସଦ ଅଛନ୍ତି । ସେ ୨୦୧୯ରେ ନିର୍ଦ୍ଦଳୀୟ ପ୍ରାର୍ଥୀ ଭାବେ ଲଢ଼ି ଏଠାରୁ ବିଜୟ ହାସଲ କରିଥିଲେ । ସେ ଶିବସେନାର ଆନନ୍ଦରାଓ ଅଡସୁଲଙ୍କୁ ପରାସ୍ତ କରିଥିଲେ । ସେପଟେ ନବନୀତ ରାଣା ବିଜେପିରେ ଖୁବଶୀଘ୍ର ସାମିଲ ହେବେ । ଆଜି ରାତି ୧୦ଟାରେ ମୁଖ୍ୟମନ୍ତ୍ରୀ ସିନ୍ଦେଙ୍କ ବାସଭବନରେ ବୈଠକ ହେବାର ଅଛି । ଶିବସେନା ନେତା ଏବଂ ଯେଉଁମାନଙ୍କ ଟିକେଟ୍ କଟିବାର ଅଛି ସେମାନଙ୍କ ସହ ବୈଠକ ହେବ ବୋଲି ଜଣାପଡ଼ିଛି ।
ଏହା ବ୍ୟତୀତ ମୁଖ୍ୟମନ୍ତ୍ରୀ ସିନ୍ଦେ, ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଏବଂ ଅଜିତ ପାଓ୍ବାର ମଧ୍ୟ ଉପସ୍ଥିତ ରହିବେ । ବୈଠକରେ ପ୍ରାର୍ଥୀଙ୍କ ନାମ ଚୂଡ଼ାନ୍ତ ହେବାକୁ ଥିବା ବେଳେ ଅସନ୍ତୋଷ ନେତାଙ୍କୁ ବୁଝାସୁଝା କରାଯାଇପାରେ ବୋଲି ଚର୍ଚ୍ଚା ହେଉଛି । ମହାରାଷ୍ଟ୍ରରେ ବିଜେପି ଅଜିତ ପାଓ୍ବାରଙ୍କ ଏନସିପି ଏବଂ ଏକନାଥ ସିନ୍ଦେଙ୍କ ଶିବସେନା ସହ ମିଶି ନିର୍ବାଚନ ଲଢ଼ିବାକୁ ଯାଉଛି । ହେଲେ ଏହାରି ଭିତରେ ସିନ୍ଦେ ଗୋଷ୍ଠୀର ନେତା ଆନନ୍ଦରାଓ ଅଡସୁଲ, ନବନୀତ ରାଣାଙ୍କୁ ବିଜେପି ଟିକେଟ ଦେବାକୁ ନେଇ ବିରୋଧ କରିଛନ୍ତି ।