ମାଲକାନଗିରି : ମାଓପ୍ରବଣ ଅଞ୍ଚଳରେ ମାଓବାଦୀଙ୍କ ବର୍ବରକାଣ୍ଡ। ବନ୍ଦ ଥିବା ସ୍କୁଲକୁ ଖୋଲିବା ଓ ପୁଲିସ ସୂଚନାଦାତା ସନ୍ଦେହରେ ଜଣେ ପଞ୍ଚାୟତ ଶିକ୍ଷା ଅଧିକାରୀଙ୍କୁ ନୃଶଂସ ଭାବେ ହତ୍ୟା କଲେ ମାଓବାଦୀ। ତାଙ୍କୁ ପ୍ରଜାକୋର୍ଟରେ ପିଟି ପିଟି ମାରି ଦେଇଥିବା ଖବର ଆସିଛି। ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ ରାଜ୍ୟ ସୁକୁମା ଜିଲ୍ଲାରେ ଏହି ଘଟଣା ଘଟିଛି। 

ସୂଚନା ମୁତାବିକ, ମୃତ ଶିକ୍ଷା ଅଧିକାରୀଙ୍କ ନାଁ ଦୁଧି ଅର୍ଜୁନ। ତାଙ୍କ ଘର ଜାଗରକୋଣ୍ଡା ଥାନା ଅନ୍ତର୍ଗତ ଗୋନ୍ଦାପାଲି ଗାଁରେ। ଶନିବାର ଦିନ ଶିକ୍ଷା ଅଧିକାରୀଙ୍କୁ ମାଓବାଦୀମାନେ ଅପହରଣ କରି ନେଇଥିଲେ, ତାଙ୍କୁ ପ୍ରଜାକୋର୍ଟରେ ହାଜର କରି ମାଓବାଦୀ ମାନେ ପିଟି ପିଟି ହତ୍ୟା କରିଛନ୍ତି। 

ଆଜି ସକାଳେ ନିକଟସ୍ଥ ଜଙ୍ଗଲରେ ତାଙ୍କ ମୃତଦେହ ପଡ଼ି ଥିବାର ଦେଖିବାକୁ ମିଳି ଥିଲା। ଖବର ପାଇ ପରିବାର ଲୋକେ ସେଠାରେ ପହଁଚି ଥିଲେ। ମୃତଦେହକୁ ଚିହ୍ନଟ କରି ପୁଲିସକୁ ଖବର ଦିଆଯାଇ ଥିଲା। ଏହାପରେ ଘଟଣା ସ୍ଥଳରେ ପୁଲିସ ପହଁଚି ଶବ ଜବତ କରିବା ସହ ତଦନ୍ତ ଆରମ୍ଭ କରିଛି ।

କହି ରଖୁଛୁ କି, ସୁକୁମା ଜିଲ୍ଲାରେ ମାଓବାଦୀଙ୍କ ଭୟରେ ଦୀର୍ଘବର୍ଷ ଧରି ବନ୍ଦ ରହିଥିବା ବିଦ୍ୟାଳୟ ଗୁଡିକ ପୁଣି ଥରେ ଖୋଲି ଥିଲେ ଶିକ୍ଷା ଅଧିକାରୀ ଦୁଧି ଅର୍ଜୁନ। ଯେଉଁଥି ପାଇଁ ପୁର୍ବରୁ ମାଓବାଦୀମାନେ ତାଙ୍କୁ ଧମକ ମଧ୍ୟ ଦେଇ ଥିଲେ। ଘଟଣା ସମ୍ପର୍କରେ ସୂଚନା ଦେଇଛନ୍ତି ସୁକୁମା ଏସପି କିରଣ ଚୌହାନ।