ଭୁବନେଶ୍ୱର, ୨୮/୪ : ଓଡ଼ିଆ ଜାତିକୁ ଦୃଢ଼ ଭାବେ ଛିଡ଼ା କରିବା ପାଇଁ ଆଜୀବନ ଉଦ୍ୟମ କରି ମଧୁବାବୁ ନିଃଶେଷ ହୋଇଗଲେ । ଆଜି ପର୍ଯ୍ୟନ୍ତ କୌଣସି ଓଡ଼ିଆ ତାଙ୍କ ଭଳି ତ୍ୟାଗ କରିନାହାନ୍ତି ବୋଲି ବିଶିଷ୍ଟ ସାହିତ୍ୟିକ ତଥା ମଧୁ ବିଶାରଦ ଦାଶ ବେନହୁର ପ୍ରକାଶ କରିଛନ୍ତି । ଉତ୍କଳ ଗୈାରବଙ୍କ ଜୟନ୍ତୀ ଅବସରରେ ଆଜି ଉତ୍କଳ ବିଶ୍ୱବିଦ୍ୟାଳୟର ମଧୂସୁଦନ ଛାତ୍ରାବାସ ପକ୍ଷରୁ ଆୟୋଜିତ ସ୍ବତନ୍ତ୍ର ବକ୍ତୃତା ଓ ଆଲୋଚନାଚକ୍ରରେ ମୁଖ୍ୟ ବକ୍ତା ଭାବେ ଯୋଗଦେଇ ସେ ଏହା କହିଛନ୍ତି । ସେ କହିଥିଲେ ଯେ, ମଧୁବାବୁ ଅବିଶ୍ବସନୀୟ ଜୀବନ ଯାପନ କରିଛନ୍ତି । ଆଜି ଆମେ ଏକାଠି ହୋଇ ମଧୁବାବୁଙ୍କ ପ୍ରତି ଆମ କୃତଜ୍ଞତାର ଦିବସ ପାଳନ କରୁଛୁ । ମଧୁବାବୁଙ୍କ ପ୍ରତି ଏ ଜାତି ଯେତେ କୃତଜ୍ଞତା ଜଣାଇଲେ ମଧ୍ୟ ତାହା କମ୍ ହେବ ବୋଲି ସେ ମତବ୍ୟକ୍ତ କରିଥିଲେ ।

ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଉତ୍କଳ ବିଶ୍ୱବିଦ୍ୟାଳୟ ପୁରାତନ ଛାତ୍ରସଂଘର ସଭାପତି ଅବସରପ୍ରାପ୍ତ ଆଇପିଏସ୍ ଅଧିକାରୀ ଡକ୍ଟର ସତ୍ୟଜିତ ମହାନ୍ତି କହିଥିଲେ ଯେ ସମ୍ଭବତଃ ଉତ୍କଳ ଗୌରବ ପ୍ରଥମ ଭାରତୀୟ ଯିଏ ଜନ ସ୍ବାର୍ଥ ମାମଲା ଦାୟର କରିଥିଲେ, ଯାହା ସେ ୧୯୨୦ମସିହାରେ ପ୍ରିଭି କାଉନସିଲରେ ଦାୟର କରିଥିଲେ। ମଧୁବାବୁ ପ୍ରକୃତରେ ଭାରତ ଗୌରବ, କିନ୍ତୁ ସର୍ବଭାରତୀୟ ସ୍ତରରେ ସେ ଯେତିକି ସ୍ବୀକୃତି ପାଇବା କଥା ପାଇନଥିଲେ ବୋଲି ଡକ୍ଟର ମହାନ୍ତି କହିଥିଲେ। ଅନ୍ୟତମ ଅତିଥି ପୁରାତନ ଛାତ୍ରସଂଘର ସମ୍ପାଦକ ଦେବେନ୍ଦ୍ର ପ୍ରସାଦ ଦାସ ଉତ୍କଳ ଗୈାରବଙ୍କ ଜୀବନୀ ସମ୍ପର୍କରେ ସଂକ୍ଷିପ୍ତ ଆଲୋଚନା କରି ଛାତ୍ରଛାତ୍ରୀମାନେ ତାଙ୍କ ଆଦର୍ଶରେ ଅନୁପ୍ରାଣିତ ହେବାକୁ ପରାମର୍ଶ ଦେଇଥିଲେ।

ବିଶ୍ୱବିଦ୍ୟାଳୟ ଛାତ୍ରାବାସ ସମୂହର ଓ୍ବାର୍ଡେନ ପ୍ରଫେସର ପ୍ରବୋଧ ହୋତାଙ୍କ ସଭାପତିତ୍ବରେ ଅନୁଷ୍ଠିତ ଏହି କାର୍ଯ୍ୟକ୍ରମର ପ୍ରାରମ୍ଭରେ ମଧୁସୂଦନ ଛାତ୍ରାବାସର ଅଧୀକ୍ଷକ ଡକ୍ଟର ରମେଶ ଚନ୍ଦ୍ର ମଲ୍ଲିକ ସ୍ବାଗତ ଅଭିଭାଷଣ ଏବଂ ପୁରାତନ ଛାତ୍ରସଂଘ ଉପସଭାପତି ରଘୁନାଥ ପୃଷ୍ଟି ଅତିଥି ପରିଚୟ ପ୍ରଦାନ କରିଥିଲେ। କାର୍ଯ୍ୟକ୍ରମରେ ପୁରାତନ ଛାତ୍ରସଂଘର ଯୁଗ୍ମ କୋଷାଧ୍ୟକ୍ଷ ସନ୍ତୋଷ କୁମାର ମହାପାତ୍ର, କାର୍ଯ୍ୟକାରୀ କମିଟି ସଦସ୍ୟ ଦିଲୀପ ମିଶ୍ର ଓ ଲକ୍ଷ୍ମୀଧର ଚାନ୍ଦ ଏବଂ ସଦସ୍ୟବୃନ୍ଦ ତଥା ମଧୂସୁଦନ ଛାତ୍ରାବାସ ଅନ୍ତେବାସୀ ଏବଂ ବିଶ୍ୱବିଦ୍ୟାଳୟର ଓଡ଼ିଆ ବିଭାଗର ଛାତ୍ରଛାତ୍ରୀମାନେ ଯୋଗ ଦେଇଥିଲେ। ପୂର୍ବାହ୍ନରେ ପୁରାତନ ଛାତ୍ରସଂଘ କର୍ମକର୍ତ୍ତାମାନେ ମଧୁବାବୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।