କୋଲକାତା: ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲା ପରେ ପଶ୍ଚିମବଙ୍ଗରେ ମହିଳା ସୁରକ୍ଷାକୁ ନେଇ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି । ଏହାରି ମଧ୍ୟରେ ଉତ୍ତର ବେଙ୍ଗଲ ପରିବହନ ନିଗମ (NBSTC) ମହିଳାମାନଙ୍କ ପାଇଁ ସ୍ବତନ୍ତ୍ର ବସ ଚଳାଚଳ କରିବାକୁ ନିଷ୍ପତ୍ତି ନେଇଛି । ସେପ୍ଟେମ୍ବର ୧୮ ପାଖରୁ ଏହି ବସ ଗଡ଼ିବ ବୋଲି ନିଗମର ଅଧ୍ୟକ୍ଷ ପାର୍ଥ ପ୍ରତିମ ରୟ କହିଛନ୍ତି । ସେ କହିଛନ୍ତି, ‘ସ୍ବତନ୍ତ୍ର ମହିଳା ବସ୍‌’ ୩ଟି ରୁଟ୍‌ରେ ଗଡ଼ିବ । ସିଲିଗୁଡ଼ିରୁ ଜଲପାଇଗୁଡ଼ି, କୁଚବିହାରରୁ ଅଲିପୁରଦୁଆର ଏବଂ କୁଚବିହାରରୁ ଦିନହାଟ ରାସ୍ତାରେ ମହିଳାଙ୍କ ପାଇଁ ଚାଲିବ ସ୍ବତନ୍ତ୍ର ବସ୍‌ । 

Also read:କୋଲକାତା ମାମଲାରେ ରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀଙ୍କ ହସ୍ତକ୍ଷେପ ଲୋଡ଼ିଲା ଡାକ୍ତର ସଂଘ 

ଏହି ସବୁ ବସରେ ଜଣେ ଲେଖାଏଁ ମହିଳା କଣ୍ଡକ୍ଟର ରହିବେ । ଏପରିକି ମହିଳା ଡ୍ରାଇଭର ନିଯୁକ୍ତି ଉପରେ ମଧ୍ୟ ବିଚାର କରୁଛି ନିଗମ । ଅନ୍ୟ ବସଗୁଡ଼ିକ ଭଳି ଏହି ବସ୍‌ରେ ଭଡ଼ା ସମାନ ରହିବ । ଏଗୁଡ଼ିକ ମୁଖତଃ କାର୍ଯ୍ୟାଳୟର ସମୟାନୁସାରେ ଚାଲିବ ।   ଉତ୍ତର ବେଙ୍ଗଲରୁ କୋଲକାତା, ଆସାମ ଏବଂ ନେପାଳ ଗଡ଼ୁଥିବା ବସଗୁଡ଼ିକରେ ସିସିଟିଭି ଲଗାଇବାକୁ ଯୋଜନା କରୁଛୁ ବୋଲି ମଧ୍ୟ ପାର୍ଥ ପ୍ରତିମ ରୟ କହିଛନ୍ତି । 

 ସେପଟେ ଉତ୍ତର ବେଙ୍ଗଲ ପରିବହନ ନିଗମର ଏହି ନିଷ୍ପତ୍ତିକୁ ମହିଳାମାନେ ସ୍ବାଗତ କରିଛନ୍ତି । ଏହାସହ ସାରା ରାଜ୍ୟରେ ଏଭଳି ସ୍ବତନ୍ତ୍ର ବସ୍‌ର ବ୍ୟବସ୍ଥା କରିବାକୁ ସେମାନେ ଦାବି କରିଛନ୍ତି । ମହିଳାମାନଙ୍କ ସୁରକ୍ଷା ଲାଗି ଆହୁରି କଠୋର ଆଇନ ଆସୁ ବୋଲି କହିଛନ୍ତି କର୍ମଜୀବୀ ମହିଳା ।

Also read: ଆଣ୍ଡାମାନ ଓ ନିକୋବର ଦ୍ବୀପପୁଞ୍ଜର ରାଜଧାନୀର ନାଁ ବଦଳାଇଲେ ସରକାର