ନୂଆଦିଲ୍ଲୀ: ଚଳିତ ମାସରେ ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନ ଏବଂ ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ ପରସ୍ପରକୁ ସାକ୍ଷାତ କରିପାରନ୍ତି । ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ବୈଠକ ଋଷରେ ଅନୁଷ୍ଠିତ ହେବ । ଏହି ବୈଠକରେ ଅସ୍ତ୍ରଶସ୍ତ୍ର ଚୁକ୍ତି ଉପରେ ଆଲୋଚନା କରାଯାଇପାରେ ବୋଲି ଆଶଙ୍କା କରାଯାଉଛି । ସୂତ୍ର ମୁତାବକ, ୟୁକ୍ରେନ ଯୁଦ୍ଧ ପାଇଁ ଉତ୍ତର କୋରିଆ ଋଷକୁ ଅସ୍ତ୍ର ଯୋଗାଇପାରେ । ତେବେ ଏହି ରିପୋର୍ଟ ଗୁଡିକ ଏଭଳି ସମୟରେ ଆସିଛି, ଯେତେବେଳେ କି ଗତ ସପ୍ତାହରେ ଆମେରିକା ଉତ୍ତର କୋରିଆ ସହିତ ଗୁପ୍ତ ଆଲୋଚନାକୁ ନେଇ ଋଷକୁ ଚେତାବନୀ ଦେଇଥିଲା । 

 ଆମେରିକାର ନ୍ୟାସନାଲ ସିକ୍ୟୁରିଟି କାଉନସିଲ ମୁଖପାତ୍ର ଏଡ୍ରିୟନ୍ ୱାଟସନ କହିଛନ୍ତି ଯେ, ଅସ୍ତ୍ରଶସ୍ତ୍ର ନେଇ ଋଷ ଏବଂ ଡିପିଆରକେ ମଧ୍ୟରେ ଆଲୋଚନା ଉପରେ ଆମେ ପୂର୍ବରୁ ସାର୍ବଜନୀନ ଭାବରେ ଚେତାବନୀ ଦେଇଛୁ । କୁହାଯାଉଛିକି, ଋଷ ଉତ୍ତର କୋରିଆରୁ ଦୀର୍ଘ ଦୂରଗାମୀ କ୍ଷେପଣାସ୍ତ୍ର କିଣିବାକୁ ପ୍ରସ୍ତୁତ ହେଉଛି । ଗଣମାଧ୍ୟମର ରିପୋର୍ଟ ଅନୁଯାୟୀ, ଉତ୍ତର କୋରିଆ ମଧ୍ୟ ଏହି ଚୁକ୍ତି ପାଇଁ ଆଗ୍ରହୀ । ଏହି କାରଣ ପାଇଁ ଉତ୍ତରକୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ୍ ଉନ୍ ଚଳିତ ମାସରେ ଋଷ ଗସ୍ତ କରୁଛନ୍ତି, ଯିଏକି ସାଧାରଣତଃ ଦେଶ ଛାଡନ୍ତି ନାହିଁ । 

ଏନେଇ ଆମେରିକାର ଅଧିକାରୀ ମାନେ କହିଛନ୍ତି ଯେ, ଉତ୍ତର କୋରିଆ ବିଗତ ବର୍ଷ ଗୁଡିକରେ ଋଷକୁ ରକେଟ୍ ଏବଂ କ୍ଷେପଣାସ୍ତ୍ର ଯୋଗାଇ ଦେଇଛି । ଯାହା ୱାଗନର୍ ଗ୍ରୁପ୍ ଦ୍ୱାରା ବ୍ୟବହୃତ ହୋଇଥିଲା । ଗତ ମାସରେ ଋଷର ପ୍ରତିରକ୍ଷା ମନ୍ତ୍ରୀ ସର୍ଗେଇ ସୋଏଗୁ ମଧ୍ୟ ଉତ୍ତର କୋରିଆ ଗସ୍ତ କରିଥିଲେ । ଗତ ସପ୍ତାହରେ ଆମେରିକା, ବ୍ରିଟେନ, ଦକ୍ଷିଣ କୋରିଆ ଏବଂ ଜାପାନ ମିଳିତ ଜାତିସଂଘରେ ମିଳିତ ବିବୃତ୍ତି ଜାରି କରି କହିଛନ୍ତି ଯେ ଋଷ ଏବଂ ଉତ୍ତର କୋରିଆ ମଧ୍ୟରେ ଦ୍ୱିପାକ୍ଷିକ ସହଯୋଗ ବୃଦ୍ଧି କରୁଥିବା କୌଣସି ଚୁକ୍ତି ସୁରକ୍ଷା ପରିଷଦର ନିଷ୍ପତ୍ତିର ଉଲ୍ଲଂଘନ ବୋଲି ଧରାଯିବ ।