କଟକ,୩୦/୦୩: ଏକ ସରକାରୀ ଡାକ୍ତରଖାନାରେ କାମ କରୁଥିବା ଜଣେ ନର୍ସଙ୍କ ଅଶ୍ଳୀଳ ଫଟୋ ଭାଇରାଲ୍ ହୋଇଛି । ଗଞ୍ଜାମ ଜିଲ୍ଲା ଭଞ୍ଜନଗର ଅଞ୍ଚଳର ଜଣେ ଯୁବକ ଏହି ଅଶ୍ଳୀଳ ଫଟୋ ଭାଇରାଲ୍ କରିଛି । ଏଭଳି ଅଭିଯୋଗ ବାଦାମବାଡ଼ି ଥାନା ପୁଲିସ ପାଖରେ ପହଞ୍ଚିବା ପରେ ସମ୍ପୃକ୍ତ ଯୁବକ ସୌମ୍ୟ ତ୍ରିପାଠୀ(୨୭) ଗିରଫ ହୋଇଛି । ତାକୁ ଶୁକ୍ରବାର କୋର୍ଟ ଚାଲାଣ କରାଯାଇଛି ।
ମିଳିଥିବା ସୂଚନା ଅନୁସାରେ, ଗଞ୍ଜାମ ଜିଲ୍ଲା ଭଞ୍ଜନଗର ଅଞ୍ଚଳର ଜଣେ ଯୁବତୀ କଟକ ବାଦାମବାଡ଼ି ଥାନା ଅଞ୍ଚଳରେ ଭଡ଼ା ଘରେ ରହି କଟକ ସହରର ଏକ ପ୍ରତିଷ୍ଠିତ ସରକାରୀ ଡାକ୍ତରଖାନାରେ ନର୍ସ ଭାବେ କାମ କରୁଥିଲେ । ୨୦୧୯ରୁ ସେ ଭଞ୍ଜନଗର ଅଞ୍ଚଳର ସୌମ୍ୟଙ୍କ ସଂସ୍ପର୍ଶରେ ଆସିଥିଲେ । ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା । ସୌମ୍ୟ ବାଦାମବାଡ଼ି ଅଞ୍ଚଳକୁ ଆସି ବିବାହର ପ୍ରତିଶ୍ରୁତି ଦେଇ ନର୍ସଙ୍କ ସହିତ ଶାରୀରିକ ସମ୍ପର୍କ ରଖୁଥିଲା । କିନ୍ତୁ ୨୦୨୩ରେ କୌଣସି କାରଣରୁ ଉଭୟଙ୍କ ମଧ୍ୟରେ ଫାଟ ସୃଷ୍ଟି ହୋଇଥିଲା । ପରେ ନର୍ସ ଜଣକ ମାଟ୍ରିମୋନି ୱେବସାଇଟ୍ ମାଧ୍ୟମରେ ଢେଙ୍କାନାଳର ଜଣେ ଯୁବକଙ୍କୁ ବିବାହ କରିଥିଲେ । କିନ୍ତୁ ସେ ବିବାହ କରିବା ବିଷୟ ସୌମ୍ୟ ଜାଣିନଥିଲା । ଜାଗର ପରଦିନ ନର୍ସଙ୍କ ହ୍ୱାଟସଆପ୍ ଷ୍ଟାଟସ୍ରେ ତାଙ୍କ ସ୍ୱାମୀଙ୍କ ସହିତ ଫଟୋ ସୌମ୍ୟ ଦେଖିଥିଲା । ଫଟୋ ଦେଖିବା ପରେ ସୌମ୍ୟ ରାଗିଯାଇ ନର୍ସଙ୍କ ସ୍ୱାମୀଙ୍କ ନିକଟକୁ କିଛି ଅଶ୍ଳୀଳ ଫଟୋ ପଠାଇ ଦେଇଥିଲା । ନର୍ସଙ୍କ ଏଭଳି ଅଶ୍ଳୀଳ ଫଟୋ ଦେଖି ସ୍ୱାମୀ-ସ୍ତ୍ରୀଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା । ଏହି ଘଟଣା ପରେ ନର୍ସ ବାଦାମବାଡ଼ି ଥାନାରେ ଏତଲା ଦେଇଥିଲେ ।
ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଅଭିଯୁକ୍ତ ସୌମ୍ୟ ନନ୍ଦନକାନନ ଅଞ୍ଚଳରେ ଏକ ଋଣ ପ୍ରଦାନକାରୀ ସଂସ୍ଥାରେ ସୁରକ୍ଷା କର୍ମୀ ଭାବେ କାମ କରୁଥିଲା । ଥାନାରେ ଏତଲା ଦେବା ବିଷୟ ଜାଣିବା ପରେ ସୌମ୍ୟ ଫୋନ୍ କରି ନର୍ସଙ୍କୁ ଧମକ ଦେଇଥିଲା । ପରେ ସେଠାରୁ ଫେରାର ହୋଇଯାଇଥିଲା । ସେ ଭଞ୍ଜନଗର ଅଞ୍ଚଳରେ ଲୁଚିଥିବା ଖବର ପାଇ ପୁଲିସ ଚଢ଼ଉ କରି ସୌମ୍ୟକୁ ଗିରଫ କରି କୋର୍ଟ ଚାଲାଣ କରାଯାଇଥିବା ବାଦାମବାଡ଼ି ଥାନା ଇନ୍ସପେକ୍ଟର ଅଜୟ କୁମାର ରାଉଳ ସୂଚନା ଦେଇଛନ୍ତି ।
