ଭୁବନେଶ୍ୱର,୨୪/୦୫: ଚତୁର୍ଥ ପର୍ଯ୍ୟାୟ ନିର୍ବାଚନରେ ୪୨ଟି ବିଧାନସଭା ଆସନ ପାଇଁ ୩୯୪ଜଣ ପ୍ରାର୍ଥୀ ମଇଦାନକୁ ଓହ୍ଲାଇଛନ୍ତି। ସେଥିରୁ ୯୬ଜଣ ଦାଗୀ ନେତା । ୮୮ଜଣଙ୍କ ନାଁରେ ବିଭିନ୍ନ ସଙ୍ଗୀନ ଦଫା ଲାଗିଛ । ୨ଜଣ ଦୁଷ୍କର୍ମ ଅଭିଯୋଗରେ ଫସିଛନ୍ତି । ୧୭ଜଣଙ୍କ ବିରୋଧରେ ହତ୍ୟା ଉଦ୍ୟମ ଓ ୨୦ଜଣଙ୍କ ନାଁରେ ମହିଳାଙ୍କୁ ଅସଦାଚରଣ ଭଳି ସଙ୍ଗୀନ ଦଫା ରହିଛି । ସୋମବାର ଏଡିଆର୍ (ଆସୋସିଏସନ ଫର୍ ଡେମୋକ୍ରାଟିକ ରିଫର୍ମସ) ରିପୋର୍ଟରୁ ଏଭଳି ତଥ୍ୟ ସାମ୍ନାକୁ ଆସିଛି ।
ରିପୋର୍ଟରେ ଦର୍ଶାଯାଇଛି, ସର୍ବାଧିକ ୨୮ଜଣ ଦାଗୀ ନେତାଙ୍କୁ ବିଜେପି ଟିକେଟ୍ ଦେଇଛି । ଅର୍ଥାତ୍, ୬୭ ପ୍ରତିଶତ ବିଜେପି ପ୍ରାର୍ଥୀଙ୍କ ନାଁରେ ଅପରାଧିକ ମାମଲା ରହିଛି । ବିଜେଡିରୁ ୧୩ଜଣ, କଂଗ୍ରେସରୁ ୧୧ଜଣ, ସିପିଆଇରୁ ୨ଜଣ ଓ ସିପିଆଇ(ଏମ୍)ରୁ ଜଣେ ନେତା ଦାଗୀ ତାଲିକାର ଅନ୍ତର୍ଭୁକ୍ତ। ସ୍ୱାଧୀନ ଭାବେ ୨୯ଜଣ ଦାଗୀ ନେତା ନିର୍ବାଚନ ମଇଦାନକୁ ଓହ୍ଲାଇଛନ୍ତି । ୧୪ଟି ନିର୍ବାଚନ ମଣ୍ଡଳୀ ରେଡ୍ ଆଲର୍ଟରେ ଅଛି । ଅର୍ଥାତ ସେଠାରେ ୩ କିମ୍ବା ଅଧିକ ଦାଗୀନେତା ନିର୍ବାଚନ ଲଢ଼ୁଛନ୍ତି ।
ତାଲିକାରେ ସର୍ବାଗ୍ରେ ଅଛନ୍ତି, କଂଗ୍ରେସର ପାଟକୁରା ପ୍ରାର୍ଥୀ ରତିକାନ୍ତ କାନୁନ୍ଗୋ । ତାଙ୍କ ବିରୋଧରେ ଥିବା ମୋଟ ୨୮ଟି ମାମଲାରୁ ୯ଟି ଠକେଇ ଓ ୪ଟି ଜାଲିଆତି ଜନିତ । ଡ. କୃଷ୍ଣଚନ୍ଦ୍ର ମହାପାତ୍ରଙ୍କ ନାଁରେ ୧୮ଟି ମାମଲା ଅଛି । କୃଷ୍ଣ ବିଜେପି ଟିକଟ୍ରେ ମୟୁରଭଞ୍ଜ ମୋରଡ଼ାରୁ ଲଢ଼ୁଛନ୍ତି । ଜାଲିଆତି, ଠକେଇ, ସରକାରୀ ଅଧିକାରୀଙ୍କୁ ଆଘାତ ଭଳି ମାମଲାରେ ଛନ୍ଦି ହୋଇଛନ୍ତି ସେ ।
ଜୟ ମହାଭାରତ ଦଳରୁ ଲଢ଼ୁଥିବା ନିମାପଡ଼ାର ଗୋପାଳକୃଷ୍ଣ ବେହେରାଙ୍କ ନାଁରେ ଦୁଷ୍କର୍ମ ଓ ଗର୍ଭନଷ୍ଟ ଭଳି ଅଭିଯୋଗ ଅଛି । ୨୦୨୦ରେ ବାଲିପାଟଣା ଥାନାରେ ଏନେଇ ରୁଜୁ ହୋଇଥିବା ମାମଲା ଏବେ ଭୁବନେଶ୍ୱର ଜେଏମ୍ଏଫ୍ସିରେ ବିଚରାଧୀନ । କେନ୍ଦ୍ରାପଡ଼ା ମହାକାଳପଡ଼ାରୁ ସ୍ୱାଧୀନ ଭାବେ ଲଢ଼ୁଥିବା ରାଜକିଶୋର ପ୍ରଧାନ ମଧ୍ୟ ଦୁଷ୍କର୍ମ ମାମଲାରେ ଛନ୍ଦି ହୋଇଛନ୍ତି । ତାଙ୍କ ନାଁରେ ୨୦୦୯ ମସିହାରେ କେନ୍ଦ୍ରାପଡ଼ା ଟାଉନ୍ ଥାନାରେ ବଳାତ୍କାର, ବିବାହ ପାଇଁ ବଳପୂର୍ବକ ଅପହରଣ ଓ ଠକେଇ ନେଇ ଏକ ମାମଲା ରୁଜୁ ହୋଇଥିଲା ।
ଚାନ୍ଦବାଲିରୁ ଲଢ଼ୁଥିବା ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ନାଁରେ ୩ଟି ମାମଲା ଅଛି । ବିଜେଡି ନେତ୍ରୀ ତଥା ଓଲିଉଡ୍ ଅଭିନେତ୍ରୀ ବର୍ଷା ପ୍ରିୟଦର୍ଶିନୀ ମଧ୍ୟ ୫ଟି ମାମଲାରେ ଛନ୍ଦି ହୋଇଛନ୍ତି । ସେ ବିଜେଡି ଟିକଟ୍ରୁ ଯାଜପୁର ବଡ଼ଚଣା ପାଇଁ ଲଢ଼ୁଛନ୍ତି । ତାଙ୍କ ନାଁରେ ୪ଟି ସଙ୍ଗୀନ ଦଫା ଲାଗିଛି । କଂଗ୍ରେସ ଯୁବନେତା ଲୋକନାଥ ମହାରଥୀ ଏଥର କେନ୍ଦ୍ରାପଡ଼ା ମହାକାଳପଡ଼ାରୁ ଲଢ଼ୁଛନ୍ତି । ୨୦୧୬ ମସିହାରୁ ତାଙ୍କ ନାଁରେ ୬ ମାମଲା ଭୁନବେଶ୍ୱରର ବିଭିନ୍ନ ଥାନାରେ ଗଡୁଛି । ବିଜେପିର ଯୁବନେତା ତଥା ପାଟକୁରା ବିଜେପି ପ୍ରାର୍ଥୀ ତେଜେଶ୍ୱର ପରିଡାଙ୍କ ନାଁରେ ୩ଟି ମାମଲା ଅଛି ।
ବିଜେପି ଯୁବନେତା ସୂର୍ଯ୍ୟବଂଶୀ ସୂରଜ ସ୍ଥିତପ୍ରଜ୍ଞ ମଧ୍ୟ ଜଣେ ଦାଗୀ ନେତା । ୨୦୨୧ରୁ ତାଙ୍କ ନାଁରେ ୫ଟି ମାମଲା ରୁଜୁ ହୋଇଛି । ମହିଳାଙ୍କୁ ବିବାହ ପାଇଁ ବାଧ୍ୟ କରି ଅପହରଣ ଓ ଦଙ୍ଗା ଭିଆଇବା ଭଳି ୬ଟି ସଙ୍ଗୀନ ଦଫା ଲାଗିଛି । ନିମାପଡ଼ାରୁ ଲଢ଼ୁଥିବା ବିଜେପିର ବରିଷ୍ଠ ନେତ୍ରୀ ପ୍ରଭାତୀ ପରିଡ଼ାଙ୍କ ନାଁରେ ୨୦୧୭ ମସିହାରୁ ୯ଟି ମାମଲା ଥାନାରେ ଗଡୁଛି । ଯାଜପୁର ଧର୍ମଶାଳାର ବିଜେପି ପ୍ରାର୍ଥୀ ସ୍ମୃତିରେଖା ପାହିଙ୍କ ନାଁରେ ଚୋରି, ଡକାୟତି ଭଳି ୭ଟି ମାମଲା ଅଛି ।
ବିଜେପିର ବାସୁଦେବପୁର ପ୍ରାର୍ଥୀ ବାଣୀକଲ୍ୟାଣ ମହାନ୍ତିଙ୍କ ନାଁରେ ୧୩ଟି, ଜଳେଶ୍ୱରର ବିଜେପି ପ୍ରାର୍ଥୀ ବ୍ରଜମୋହନ ପ୍ରଧାନଙ୍କ ନାଁରେ ୧୧ଟି, ବାଲେଶ୍ୱର ବିଜେଡି ପ୍ରାର୍ଥୀ ସ୍ୱରୁପ ଦାସଙ୍କ ନାଁରେ ୯ଟି ଓ ବିଜେପିର ବାରିପଦା ପ୍ରାର୍ଥୀ ପ୍ରକାଶ ସୋରେନ୍ଙ୍କ ନାଁରେ ୬ଟି ମାମଲା ରହିଛି ।