ନୂଆଦିଲ୍ଳୀ, ୦୮/୦୬ : ଓଡ଼ିଶାରେ ବିଜେପିର ସଫଳତାରେ ଅଭିଭୂତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଶୁକ୍ରବାର ଏନ୍ଡିଏ ସଂସଦୀୟ ଦଳର ନେତା ନିର୍ବାଚିତ ହେବା ପରେ ଏ ପ୍ରଧାନମନ୍ତ୍ରୀ ଏ ସଫଳତା ପାଇଁ ମହାପ୍ରଭୁ ଶ୍ରୀ ଜଗନ୍ନାଥ ଓ ଓଡ଼ିଶାବାସୀଙ୍କୁ କୃତଜ୍ଞତା ଜଣାଇଛନ୍ତି । ଆସନ୍ତା ୨୫ବର୍ଷ ମଧ୍ୟରେ ମହାପ୍ରଭୁ ଜଗନ୍ନାଥଙ୍କ କୃପାରୁ ଓଡ଼ିଶା ଦେଶ ବିକାଶ ଯାତ୍ରାରେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇବ । ଦେଶ ପାଇଁ ଅଭିବୃଦ୍ଧିର ଇଂଜିନ୍ ଓଡ଼ିଶା ହିଁ ହେବ ବୋଲି ପ୍ରଧାନମନ୍ତ୍ରୀ କହିଥିଲେ । ପ୍ରଧାନମନ୍ତ୍ରୀଙ୍କର ଓଡ଼ିଶାକୁ ଏଭଳି ପ୍ରଶଂସା ବେଳେ ପୁରୁଣା ସଂସଦ ଭବନର କେନ୍ଦ୍ରୀୟ କକ୍ଷରେ ଜୟ ଜଗନ୍ନାଥ ଧ୍ୱନି ଗୁଞ୍ଜରିତ ହୋଇଥିଲା ।
ଶୁକ୍ରବାର ପୁରୁଣା ସଂସଦ ଭବନ କେନ୍ଦ୍ରୀୟ କକ୍ଷରେ ଏନ୍ଡିଏ ସଂସଦୀୟ ଦଳର ବୈଠକ ବସିଥିଲା । ବୈଠକରେ ମୋଦି ଏନଡିଏ ସଂସଦୀୟ ଦଳର ନେତା ନିର୍ବାଚିତ ହେବା ପରେ ତାଙ୍କ ଉଦ୍ବୋଧନରେ ଓଡିଶାରେ ବିଜେପିର ସଫଳତାକୁ ବିଶେଷ ଭାବେ ଉଲ୍ଲେଖ କରିଥିଲେ । ସେ କହିଲେ, ଓଡିଶାରେ ଦଳ ଯେଉଁ ସଫଳତା ପାଇଛି ତାହା ଅବିଶ୍ୱସନୀୟ । ଏହା ହେଉଛି ଏକ କ୍ରାନ୍ତିର ପରିଣାମ । ପୂର୍ବରୁ ଅନେକ କ୍ରାନ୍ତି ଦେଖାଦେଇଛି । କିନ୍ତୁ ଓଡ଼ିଶାରେ ଯେଭଳି ପରିବର୍ତ୍ତନ ଆସିଲା ତାହା ଅଭୂତପୂର୍ବ । ବିକଶିତ ଭାରତ ଗଠନରେ ଓଡ଼ିଶାର ଏହି କ୍ରାନ୍ତି ଢେର ସହାୟକ ହେବ ବୋଲି ମୋଦି ଉଲ୍ଲେଖ କରିଥିଲେ । ନିଜ ସମ୍ବୋଧନରେ ପ୍ରଧାନମନ୍ତ୍ରୀ ମହାପ୍ରଭୁ ଶ୍ରୀଜଗନ୍ନାଥଙ୍କୁ ସ୍ମରଣ କରିଥିଲେ । ମୋଦି କହିଲେ, ‘ଭଗବାନଙ୍କର ଅନେକ ରୂପ ରହିଛି । ମୁଁ ମହାପ୍ରଭୁ ଜଗନ୍ନାଥଙ୍କୁ ସ୍ମରଣ କରେ । ସେ ହେଉଛନ୍ତି ଗରିବଙ୍କ ଦେବତା ।’ ମହାପ୍ରଭୁ ଜଗନ୍ନାଥଙ୍କ ଅସୀମ କୃପାରୁ ଓଡିଶାରେ ବିଜେପିର ବିଜୟ ସମ୍ଭବ ହୋଇପାରିଛି । ପ୍ରଧାନମନ୍ତ୍ରୀ ଏହା କହିଲା ବେଳକୁ ସେଣ୍ଟ୍ରାଲ ହଲରେ ଶୁଭିଲା ଜୟ ଜଗନ୍ନାଥ ଧ୍ୱନି । ଓଡ଼ିଶାର ସାଂସଦମାନେ ଉତ୍ସାହିତ ଓ ଉଲ୍ଲସିତ ସ୍ୱରରେ କହୁଥିଲେ-ଜୟ ଜଗନ୍ନାଥ । ଓଡ଼ିଶାରେ ଦଳର ସଫଳତା ପାଇଁ ବରିଷ୍ଠ ନେତାମାନେ ରାଜ୍ୟ ବିଜେପିର ହେଭିୱେଟମାନଙ୍କୁ ମଧ୍ୟ ଜଣାଇଥିଲେ ଶୁଭେଚ୍ଛା ।