ମୁମ୍ବାଇ ୩୦/୦୩: ଆସନ୍ତା ଏପ୍ରିଲ ୧୨ ତାରିଖରୁ ନେଟ୍ଫ୍ଲିକ୍ସରେ ପ୍ରସାରିତ ହେବ ଫିଲ୍ମ ‘ଅମର ସିଂହ ଚମ୍କିଲା’ । ଗତ ଗୁରୁବାର ଏହାର ଟ୍ରେଲର୍ ରିଲିଜ୍ ହୋଇଛି । ଫିଲ୍ମର ଟାଇଟଲ୍ ଭୂମିକାରେ ଅଭିନୟ କରିଛନ୍ତି ଦିଲଜିତ ଦୋସାଂଝ । ଅମର ସିଂହ ଚମ୍କିଲାଙ୍କ ପତ୍ନୀ ଅମରଜୋତ ଭୂମିକାରେ ନଜର ଆସିବେ ପରିଣୀତି ଚୋପ୍ରା । ଏହି ଫିଲ୍ମ ଜରିଆରେ ନିର୍ଦ୍ଦେଶକ ଇମ୍ତିଆଜ ଅଲିଙ୍କ ସହ କାମ କରିବାର ଦୀର୍ଘ ଦିନର ଇଚ୍ଛା ତାଙ୍କର ପୂରଣ ହୋଇଥିବା ଟ୍ରେଲର୍ ଲଞ୍ଚ୍ ଅବସରରେ ପରିଣୀତି କହିଛନ୍ତି । ପ୍ରାୟ ୧ ଦଶନ୍ଧି ଧରି ସେ ଇମ୍ତିଆଜଙ୍କ ସହ କାମ କରିବାକୁ ଅପେକ୍ଷା କରି ରହିଥିଲେ ।
ପରିଣୀତି ପୂର୍ବରୁ ଫିଲ୍ମ ‘ମେରି ପ୍ୟାରୀ ବିନ୍ଦୁ’ ଓ ‘କେଶରୀ’ରେ ଅଭିନୟ ସହିତ କଣ୍ଠଦାନ ମଧ୍ୟ କରିଥିଲେ । ‘ଚମ୍କିଲା’ ଫିଲ୍ମ ପାଇଁ ଇମ୍ତିଆଜ ଓ ଏହାର ସଙ୍ଗୀତ ନିର୍ଦ୍ଦେଶକ ଏ ଆର୍ ରହମାନ ପରିଣୀତିଙ୍କ ଅଡିସନ୍ ନେଇଥିଲେ । ଜୁମ୍ କଲ୍ରେ ତାଙ୍କର ଅଡିସନ୍ ନିଆଯାଇଥିଲା । ରହମାନ ତାଙ୍କୁ ପଚାରିଥିଲେ ‘ଗୀତ କେମିତି ଗାଆନ୍ତି, ତୁମେ ଜାଣ?’ ପରୀ କହିଥିଲେ ‘ମୁଁ ଗାଇବାକୁ ପସନ୍ଦ କରେ ।’ ସଙ୍ଗେସଙ୍ଗେ ଗାଇବାକୁ ସେ ପରୀଙ୍କୁ କହିଥିଲେ । ପରୀ ‘ଦମା ଦମ୍ ମସ୍ତ କଲନ୍ଦର’ ଓ କିଛି ପଞ୍ଜାବୀ ଗୀତ ଗାଇଲେ । ଏଭଳି ଭାବେ ତାଙ୍କର ଅଡିସନ୍ ହୋଇଥିବା ପରୀ କହିଛନ୍ତି । ୮୦ ଦଶକର ଲୋକପ୍ରିୟ ପଞ୍ଜାବୀ ଗାୟକ ଅମର ସିଂହ ଚମ୍କିଲାଙ୍କ ଜୀବନ ଉପରେ ଫିଲ୍ମଟି ପର୍ଯ୍ୟବସିତ । ୧୯୮୮ ମସିହାରେ ତାଙ୍କୁ ଓ ତାଙ୍କ ଗାୟିକା ପତ୍ନୀ ଅମରଜୋତଙ୍କୁ ଗୁଳି କରି ହତ୍ୟା କରାଯାଇଥିଲା । ‘ଚମ୍କିଲା’ରେ କାମ କରିବା ପରୀଙ୍କ ପାଇଁ ସବୁ ଫିଲ୍ମଠାରୁ ଭିନ୍ନ ଅନୁଭବ । ସର୍ବଶ୍ରେଷ୍ଠ ନିର୍ଦ୍ଦେଶକ, ସହକଳାକାର ଓ ସଙ୍ଗୀତ ନିର୍ଦ୍ଦେଶକଙ୍କ ସହ କାମ କରି ଜୀବନ ସାର୍ଥକ ହୋଇଥିବା ସେ କହିଛନ୍ତି ।
